1 Hamba Hilamu, mndewa wa Tilo, nakalajiza wasenga kwa mndewa Daudi, kahi nakamhilichila migodi ja mielezi na wanhu walinguzenga kwa maganga na wanhu walingugongomanya vinhu vya mbawo, kwa chiwalo cha kuzenga ng'handa ya mndewa Daudi. 2 Ahyo, Daudi nakavizela kota Mkulu Nguluwi nakamwimiza nzinzili leka yawe mndewa hali Isilaeli na kota undewa wa heye nauditigwa uwe ukulu ng'hatu kwa chiwalo cha Waisilaeli, wanhu wa heye.

3 Ako Yelusalemu, Daudi nakahesa wadala wanji, naye nakawa na wana wenji, walume na wadala. 4 Wana wawele nawapondigwa hala Yelusalemu nawali ndo Shamuwa na Shobabu na Natani na Solomoni 5 na Ibihali na Elishuwa na Elipeleti 6 na Noga na Nefegi na Yafiya 7 na Elishama na Beeliada na Elifeleti.

8 Wafilisti lowahuliche kota Daudi nakabakalizwa mafuta leka yawe mndewa wa isi yeng'ha ya Isilaeli, weng'ha nawaluta na wamizi wa hewo weng'ha leka kumpala. Daudi loyahuliche mbuli ayo, naye nakaluta kitowa na hewo. 9 Wafilisti nawafika kuli ibindi lya Lefaimu na kwaluka kuwatowa wenyeng'haye wa hala na kuhola vinhu vya hewo. 10 Lelo Daudi nakamuuza Nguluwi, "Ndaze, ndute kuwatowa Wafilisti? Ndaze, kowawika mmoko mwangu?" Mkulu Nguluwi, nakamwidichila, "Ulute, kwa vila ndowawika mmoko mwako."

11 Ahyo Daudi hamwe na wanhu wa heye nawaluta mbaka Baali-pelasimu. Ako Daudi nakawasumya Wafilisti, hamba nakalonga, "Kota mazi tendema, Nguluwi nakawadumya wang'honyo wa heni kwa kukolela moko ga heni." Ahyo, honhu aho nahachemigwa Baali-pelasimu*. 12 Wafilisti nawabilima na kujileka jimalukolo ja milungu ja hewo. Lelo Daudi nakalajiza jilakazwe kwa chiluli.

13 Hamba Wafilisti nawaluta lwa keli kuwatowa wenyeng'haye wa ibindi lila. 14 Ahyo Daudi nakamuuza kahi Nguluwi, naye Nguluwi nakamwidichila, "Uleche kuwatowa kulawa hano, ila uwazungulute na kuwatowa kulawila kumwando mwa migodi ja mifolosadi. 15 Louhulika lizi lya wamizi walingujenda kwa magulu kuli vinhembenhembe vya migodi ajo, lelo ulute kuli ngondo, kwa vila heni Nguluwi nandikulongola leka kuwatowa wamizi wa Wafilisti." 16 Ahyo Daudi nakadita kota vyoyalajizwe na Nguluwi. Nakachitowa chilundo cha wamizi wa Wafilisti kulawa Gibeoni mbaka Geseli. 17 Lelo lutogo lwa Daudi nalwenela kuli chila isi, naye Mkulu Nguluwi nakawadita wanhu wa isi zeng'ha wamdumbe Daudi.