1 Mndewa Daudi nakawalonjela wala wanhu weng'ha wawele nawekungajiza, "Mwana wa heni Solomoni, heye yawele Nguluwi nakamhagula, yang'hali mdodo na kahela luhala lwa kuhega. Mijito aji ndo jing'hang'hala, kwa vila ng'handa ayi iwele heye koizenga, haiwele kwa chiwalo cha munhu, ila ndo kwa chiwalo cha Mkulu Nguluwi. 2 Lelo, nandikangaza kwa ludali lwa heni lweng'ha kuwika ng'hano ya vinhu vya kuzenjela ng'handa ya Nguluwi. Vinhu avyo ndo zahabu, kwa chiwalo cha kugongomanyila vinhu vya zahabu na sendi, kwa chiwalo cha kugongomanyila vinhu vya sendi na shaba, kwa chiwalo cha kugongomanyila vinhu vya shaba na chuma, kwa chiwalo cha kugongomanyila vinhu vya chuma na migodi kwa chiwalo cha kugongomanyila vinhu vya migodi. Kahi nandikuwichila goya chasi chikulu cha maganga galinguchemigwa salidoniki na maganga galinguchemigwa kilisopilaso na maganga ga sendi nyinji gawele na lanji zilivinji na mabwe na maganga galingupulika. 3 Kahi, mzidi wa vinhu vyeng'ha vyondivilavile kwa chiwalo cha ng'handa yelile, ndanayo ng'hano ya heni ya zahabu na sendi. Kwa vila ndanguigana ng'handa ya Nguluwi wa heni, lelo ndanguilavya kwa chiwalo cha ng'handa ya Nguluwi wa heni. 4 Ng'hano ayo ndo ya kilo lachi imwe na elufu mbili (102,000) za zahabu kulawa Ofili na kilo lachi mbili na elufu makumi gadatu na nane (238,000) za sendi kwa chiwalo cha kunoliga ng'hanzi 5 na kwa chiwalo cha mijito ja zahabu na mijito ja sendi na kwa mijito jeng'ha jiwele jokoleka na wawanzi. Lelo, whaani yalingugana kumlavila Mkulu Nguluwi lehano?"

6 Ahyo wakulu wa ng'holo na vilongozi wa nhanzi za Isilaeli na wakulu wa wamizi maelufu na mamiya na vilongozi wa mijito ja mndewa nawalavya kwa kunuwila kwa hewo. 7 Kwa chiwalo cha mijito ja ng'handa ya Nguluwi, nawalavya kilo lachi imwe na elufu makumi sita na gahano (165,000) za zahabu na kilo lachi zidatu na elufu makumi gadatu (330,000) za sendi na kilo lachi sita (600,000) za shaba na kilo milioni zidatu na lachi tatu (3,300,000) za chuma. 8 Chila yumwe yawele nayali na maganga ga sendi nyinji nakagalavya leka gawichigwe kuli ng'hano ya Mkulu Nguluwi hali ulongozi wa Yehieli, Mgelishoni. 9 Ahyo wanhu nawasangalala kwa vila nawamlavila Mkulu Nguluwi kwa nhumbula za hewo wawo na kwa kunuwila kwa hewo wawo, naye mndewa Daudi nakasangalala ng'hatu.

10 Daudi nakamtogola Mkulu Nguluwi hali nhing'hano yeng'ha yolonga, "Gwa Mkulu Nguluwi, Nguluwi wa Isilaeli mhaza wa hetwe, utogoligwe kulawa mazuwa gose mbaka mazuwa gose. 11 Gwa Mkulu Nguluwi, ukulu na ludali na mong'ho na kusumya na undewa na vyeng'ha viwele kilanga na muisi ndo vya hegwe. Gwa Mkulu Nguluwi undewa ndo wa hegwe, nagwe nakwinuligwa kusinda vinhu vyeng'ha. 12 Lufufu na kuhulichizwa vyangulawa kwa hegwe, hegwe ndo ulingulongoza vinhu vyeng'ha. Mmoko mwa hegwe hana ludali na mong'ho, leka kuwenula na kuwapa mong'ho weng'ha. 13 Lelo, gwa Nguluwi wa hetwe, twangulonga malumbo na kulitogola itagwa lya hegwe liwele na ukulu.

14 "Ila, heni nda whaani na wanhu wa heni ndo whaani, mbaka tukupe chinhu? Kwa vila vinhu vyeng'ha vyangulawa kwa hegwe, natukulavila vinhu viwele navilawa kwa hegwe. 15 Hetwe twa wajenzi hali hegwe na twa kuli majendo kota vyowawele wasekulu wa hetwe weng'ha. Mazuwa ga hetwe muisi ndo kota lubehelo lulingukola, haduhu kitumbila kwa kikala kwa mhela winji. 16 Gwa Mkulu Nguluwi, Nguluwi wa hetwe, kwa winji weng'ha wa vinhu vyeng'ha viwele natukulavila kwa chiwalo cha kuzenga ng'handa kwa chiwalo cha itagwa lya hegwe lyelile, navilawa mmoko mwa hegwe, navyo vyeng'ha ndo vya hegwe. 17 Nguluwi wa heni, ndanguvizela kota hegwe kwanguijezaga nhumbula na kwangunojezwa na kugoloka. Vinhu avi vyeng'ha nandavya kwa kunuwila kwa heni na kwa nhumbula igoloche. Nani lelo ndanguwona wanhu wa hegwe wawele hano, vyowalingukulavila kwa kusangalala na kwa kunuwila kwa hewo wawo. 18 Gwa Mkulu Nguluwi, Nguluwi wa wasekulu wa hetwe Abulahamu na Isaka na Isilaeli, mazuwa gose uwiche maya aga mgati mwa nhumbula za wanhu wa hegwe na uzidite nhumbula za hewo ziwe za kukundigwa hali hegwe. 19 Umtambichize mwana wa heni Solomoni leka yebatilile mizilo ja hegwe na malajizo ga hegwe na kwamula kwa hegwe kwa nhumbula ya heye yeng'ha, leka yadite geng'ha na yazenje ng'handa ayi ya chiundewa iwele vinhu vyake vya kuzenjela nandiviwika goya."

20 Hamba mndewa Daudi nakailonjela nhing'hano yeng'ha, "Mumtogole Mkulu Nguluwi, Nguluwi wa hemwe." Weng'ha wawele nawekungajiza hala nawamtogola Mkulu Nguluwi, Nguluwi wa wasekulu wa hewo, nawamfugamila Mkulu Nguluwi na kumha lutogo mndewa Daudi. 21 Zuwa lya keli nawamlavila Mkulu Nguluwi ndolendole na nhambiko za kulakazwa, ziwele ndo mibuguma elufu imwe (1,000) na ming'holo milume elufu imwe (1,000) na ming'holo myana elufu imwe (1,000), hamwe na nhambiko za hewo za chakunwa na nhambiko zinji nyinji ng'hatu kwa chiwalo cha Waisilaeli weng'ha. 22 Lelo, zuwa alyo nawalya na kunwa kwa kusangalala hali Mkulu Nguluwi. Nawamdita Solomoni, mwana wa Daudi, leka yawe mndewa kahi. Nawambakaliza mafuta leka yawe chilongozi kwa itagwa lya Mkulu Nguluwi na Sadoki yawe mtambika. 23 Ahyo Solomoni nakekalisa hali chigoda cha undewa chiwele Mkulu Nguluwi nakachimiza nzinzili, honhu ha Daudi, mhaza wa heye. Mbuli za heye nazilutilila goya na wanhu weng'ha wa Isilaeli nawamhulichiza. 24 Vilongozi wakulu weng'ha na wazidahe, hamwe na wana weng'ha wa mndewa Daudi, nawalagana kota womhulichiza mndewa Solomoni. 25 Mkulu Nguluwi nakamdita Solomoni yatogoligwe na Waisilaeli weng'ha, nakamha ukulu wa chiundewa uwele haduhu mndewa yoneche yamlongole yawele nakapegwa.

26 Daudi, mwana wa Yese, nayali mndewa wa Isilaeli yeng'ha. 27 Nakalongoza kuli Isilaeli kwa mhela wa miyaka makumi gane. Kuli mhela awo nakalongoza Hebuloni kwa miyaka saba na Yelusalemu kwa miyaka makumi gadatu na jidatu. 28 Nakabagama yawele na miyaka minji, yawele na lufufu na lutogo. Solomoni mwanage, nakawa mndewa honhu hake. 29 Mbuli za mndewa Daudi kulawa mwaluko mbaka kuduma kwa heye, nazandichigwa kuli kukumbuchila kwa mloli Samweli na kuli kukumbuchila kwa mloli Natani na kuli kukumbuchila kwa mloli Gadi. 30 Mbuli azo zanguwala ulongozi wa heye na ludali lwake na mbuli ziwele nazimfika na ziwele naziwafika Waisilaeli na ziwele kahi naziwafika wandewa weng'ha wa kuli isi zinji zeng'ha.