1 Solomoni, mwana wa mndewa Daudi, nayali nzinzili kuli ulongozi wa heye na Mkulu Nguluwi, Nguluwi wa heye, nayali hamwe na heye, nakamtambichiza na kumdita yawe mkulu ng'hatu. 2 Mndewa Solomoni nakawawikulila Waisilaeli weng'ha, hali hewo nawali vilongozi wa wakulu wa wamizi weng'ha wa vilundo vya wamizi maelufu na vilundo vya wamizi mamiya na watagusa na vilongozi weng'ha wa ng'holo za Isilaeli. 3 Hamba Solomoni nakaluta nawo mbaka honhu ha kufugamila ako Gibeoni. Nawaluta ako kwa vila aho ndo honhu hawele na ihema lya Nguluwi, liwele naligongomanyigwa na Musa chitumagwa wa Mkulu Nguluwi, ako kuchiwala. 4 Ila isanduku lya ilagano nalyali ako Yelusalemu kuli ihema ligongomanyigwe na Daudi, liwele nakaligala kulawa Kiliati-yealimu, 5 kahi honhu ha kulavila nhambiko ha shaba hawele nahagongomanyigwa na Besaleli, mwana wa Uli, mzukulu wa Huli, nahali ako Gibeoni hali ihema lyelile lya Mkulu Nguluwi. Aho mndewa Solomoni na wanhu weng'ha nawamlanda Nguluwi. 6 Solomoni nakahejela mbaka hali honhu ha kulavila nhambiko ha shaba hawele nahali kuli ihema lya Nguluwi hali Mkulu Nguluwi, nakalavya nhambiko za kulakazwa elufu imwe mchanya mwa honhu ha kulavila nhambiko. 7 Nechilo yila Nguluwi nakamlawila Solomoni, nakamlonjela, "Undande choneche nani ndokupa." 8 Solomoni nakamwidichila Nguluwi, "Nakumlajila igano lya kwimilila chitumagwa wa hegwe Daudi, mhaza wa heni na nakundita ndiwe mndewa honhu ha heye. 9 Gwa Mkulu Nguluwi, weneze kulagana kwa hegwe kwa mhaza wa heni Daudi. Nakumbika ndiwe mndewa hali wanhu awa wawele wenji kota nhimbwisi. 10 Ahyo, ndangukulanda umhe heni luhala na uwanzi leka ndiwalongoze goya wanhu wa hegwe. Wone haiwa ahyo, whaani koweza kuwalongoza awa wanhu wa hegwe wawele wenji hino?" 11 Nguluwi nakamwidichila Solomoni, "Kwa vila mbuli ayi ndo maya ga nhumbula ya hegwe, haulandile kuwa na lufufu ne lutogo ne kubagama kwa wang'honyo wa hegwe na kahi haulandile kikala mhela winji, ila nakulanda luhala na uwanzi leka uwalongoze wanhu wa heni wondikupele uwe mndewa wa hewo, 12 lelo, ndangukupa luhala na uwanzi. Kahi ndokupa lufufu na vinhu vinji na lutogo kusinda mndewa yoneche yawele nakakulongola kulongoza na mndewa yoneche yawele kolongoza hamba."

13 Lelo, Solomoni nakoka kulawa kuli honhu aho ha kufugamila ako Gibeoni, honhu hawele ihema lya Nguluwi nalyali aho, nakahiluka Yelusalemu. Nakailongoza Isilaeli. 14 Mndewa Solomoni nakakungajiza mituka ja kitowa ngondo na falasi. Nayali na mituka elufu imwe na miya zine (1,400) na falasi elufu kumi na mbili (12,000), wawele nakawawika kuli miji ja mituka ja falasi na mituka jinji nayali najo ako Yelusalemu. 15 Mndewa Solomoni nakavidita sendi na zahabu viwe vinji lukami mbaka naviwa vinhu vya hihi hela ako Yelusalemu kota maganga, kahi mbawo za mielezi nakazidita ziwe nyinji kota mikuyu ja Shefela. 16 Falasi wa mndewa Solomoni nawegaligwa kulawa Misili na kulawa Kue. Walingugula na kuguza vinhu wa mndewa nawawagula kulawa ako. 17 Najiguligwa mituka na falasi kulawa Misili. Chila mutuka nauguligwa kwa beyi ya migwala miya sita (600) ja sendi na chila falasi nakaguligwa kwa migwala miya imwe na makumi gahano (150) ja sendi. Hamba falasi awo na mituka ajo nawawaguzila wandewa wa Wahiti na wa Waalamu.