1 Mnvina ya Pasaka loimalile, Waisilaeli wawele nawali kuli mnvina ayo nawaluta kuli miji ja Yuda, nawabenanga jila mizengo ja maganga na kujitemanga mizengo ja jimalukolo ja Ashela. Nawahawifya honhu ha kufugamila milungu na honhu hake ha kulavila nhambiko chila honhu kuli Yuda na Benjamini na kuli Efulaimu na Manase. Lowasindile kuviwifya vinhu avyo vyeng'ha, Waisilaeli nawahiluka kuli miji ja hewo, chila munhu haluga hake.

2 Mndewa Hesekiya nakawawika watambika na Walawi kuli vilundo, chila chilundo na mijito ja hewo, wone wawe watambika ama Walawi, leka kulavya nhambiko za kulakazwa na nhambiko za kikala goya na kukola mijito kuli lwizi ja haluga ha Mkulu Nguluwi na kulonga malumbo kwa Nguluwi na kwimba nzimbo za kutogola. 3 Mndewa nakalavya ndolendole kulawa kuli lufufu lwa heye kwa chiwalo cha nhambiko za kulakazwa za mitondo na za matinazo na nhambiko za kulakazwa kwa chiwalo cha mazuwa ga Kwesela na kwa chiwalo cha mnvina za kulawa kwa nyelezi na kwa chiwalo cha mnvina ziwichigwe kota vyoyandichigwe kuli malajizo ga Mkulu Nguluwi. 4 Mndewa nakawalajiza wanhu wa Yelusalemu walavye honhu ha nhambiko hawele watambika na Walawi wanguganigwa kupegwa, leka Walawi awo welavye ng'hatu kuli kukola mijito ja hewo kuli malajizo ga Mkulu Nguluwi. 5 Hala du ilajizo alyo holilavigwe, wanhu wa Isilaeli nawalavya kwa kunuwila mbena za hewo za mwaluko za nyhule na divai na mafuta na hanombwa na mbena zinji za kuli migunda. Kahi nawahilika honhu hamwe ha kumi ha chila chinhu. 6 Wanhu wa Isilaeli na Yuda walingikala kuli miji ja Yuda kahi nawegala honhu hamwe ha kumi ha hewo ha misenga na honhu hamwe ha kumi ha ming'holo na mhene na honhu hamwe ha kumi ha vinhu vyelile viwele naviwichigwa chiuyeng'ha kwa chiwalo cha Mkulu Nguluwi, Nguluwi wa hewo na kuvikungajiza kuli vilundo.

7 Nawaluka kudita mbuli kuli mwezi wa kadatu na kusinda mijito ajo kuli mwezi wa saba. 8 Mndewa Hesekiya na wakulu wa heye, lowoyile kulola vilundo avyo, nawamtogola Mkulu Nguluwi na kuwatambichiza wanhu wa Isilaeli. 9 Mndewa Hesekiya nakawauza watambika na Walawi kuwala vilundo avyo, 10 naye Asaliya, yawele nayali mtambika mkulu, kulawa kuli ivyazi lya Sadoki nakamwidichila, "Kulawa wanhu lowaluche kigala nhambiko za hewo kuli ng'handa ya Mkulu Nguluwi, natwali na vilyo vya kuhega na vinhu vinji mzidi vya kuwika kuli ng'hano, kwa vila Mkulu Nguluwi nakawatambichiza wanhu wa heye, ahyo natwali na chasi chinji chisigale."

11 Mndewa Hesekiya nakalajiza wawiche goya ng'hano kuli ng'handa ya Mkulu Nguluwi, nawo nawadita ahyo. 12 Hamba, kwa kukundigwa, nawawika mbena azo za mwaluko na honhu hamwe ha kumi na vinhu vyeng'ha viwichigwe chiuyeng'ha. Konaniya, Mlawi, nakawichigwa leka yawe chilongozi wa kulolela vinhu avyo, naye Shimeyi mng'holoze nayali yomtanza. 13 Nawo Yehieli na Asasiya na Nahati na Asaheli na Yelimoti na Yosabadi na Elieli na Isimakiya na Mahati na Benaya, nawali walolezi hali ulongozi wa Konaniya na Shimeyi mng'holoze, wawele nawawichigwa na mndewa Hesekiya na Asaliya, yawele nayali mtambika mkulu wa ng'handa ya Nguluwi. 14 Kole, mwana wa Imuna, Mlawi, yawele nayali mwamizi wa Lwizi lwa Kolilawilaga isanya, nayali yololela nhambiko za kunuwila ziwele nazilavigwa kwa Nguluwi, yowagawila watambika nhambiko azo ziwele nazilavigwa kwa Mkulu Nguluwi na zila nhambiko ziwele naziwichigwa chiuyeng'ha. 15 Kole nayali na wanhu sita wawele nawali womtanza. Wanhu awo ndo Edeni na Miniyamini na Yeshuwa na Shemaya na Amaliya na Shekaniya. Nawamtanza kukola mijito ajo kwa kukundigwa kuli miji ja watambika, wowagawila vilyo watambika wayawo wasekulu na wasongolo kwa kiwhana na mijito ja hewo. 16 Kahi ne kulola ng'holo nawawagawila wala wasongolo wawele nawali na miyaka jidatu na mzidi na wala wawele nawenjila kuli ng'handa ya Mkulu Nguluwi chila zuwa kukola mijito ja hewo. Chila yumwe wa hewo nakapegwa honhu hake kwa kiwhana na mijito joyakolile kuli kiwalila kwa heye. 17 Watambika nawandichigwa kwa kiwhana na ivyazi lya hewo, ila Walawi wawele nawali na miyaka makumi meli na mzidi, nawandichigwa kwa kiwhana na mijito ja hewo ja chila zuwa. 18 Watambika nawandichigwa weng'ha hamwe na wana wa hewo na wache wa hewo, kwa vila nawali wa kukundigwa kuli kiyeliza leka kumkolela mijito Mkulu Nguluwi. 19 Kuwala watambika, hali walelwa wa Aluni wawele nawali wochikala kuli migunda jiwele hanze ha miji ja hewo, nakwali na wanhu wawele nawandichigwa kuli miji ajo, wawele nawawagawila honhu hawo ha vilyo. Nawawagawila chila mlume kuli ivyazi lya watambika na chila yumwe yawele nayali nakandichigwa hali Walawi.

20 Ahi ndo mndewa Hesekiya vyoyaditile kuli isi yeng'ha ya Yuda, nakadita ganojile na galingukundigwa na ga hachi hali Mkulu Nguluwi, Nguluwi wa heye. 21 Kuli chila mijito joyajikolile kuli uchitumagwa wa ng'handa ya Nguluwi na kuli kuhulichiza malajizo na mizilo ja Nguluwi, nakampala Nguluwi wa heye na kukola mijito kwa nhumbula ya heye yeng'ha, hamba mbuli za heye nazilutilila goya.