1 Manase nayali na miyaka kumi na mili loyaluche kulongoza, nakalongoza ako Yelusalemu kwa miyaka makumi gahano na jihano (55). 2 Nakadita gehile hali Mkulu Nguluwi kwa kuwinza vihendo vya kuzudiza vya wanhu wa isi wawele Mkulu Nguluwi nayali yawawinjile hali Waisilaeli. 3 Nakahagongomanya kahi honhu ha kufugamila milungu hawele nahabomoligwa na Hesekiya, mhaza wa heye, nakahazenga kahi honhu ha kulavila nhambiko ha kufugamila Mabaali na nakagongomanya mizengo ja jimalukolo ja Ashela. Kahi nakavifugamila vinhu vyeng'ha vya kuli ulanga na kuvikolela mijito. 4 Nakazenga honhu ha kulavila nhambiko ha milungu, kuli ng'handa ya Mkulu Nguluwi, honhu hawele Mkulu Nguluwi nayali yalonjile, "Itagwa lya heni lyowa hali Yelusalemu mazuwa gose." 5 Kuli lugagala lweng'ha lwa ng'handa ya Mkulu Nguluwi, nakazenga honhu ha kulavila nhambiko kwa chiwalo cha vinhu vyeng'ha vya kuli ulanga. 6 Nakawalavya wanage kota nhambiko ya kulakazwa kuli ibindi lya Beni-hinomu. Nakadita uhawi na kulagula na kuluta kulanda utanzi kwa walaguzi na kwa wanhu walingulongasa na mihoka. Nakadita gehile ng'hatu hali Mkulu Nguluwi, nakamzudiza. 7 Nakalihola limalukolo lyoyalihongole na kuliwika kuli ng'handa ya Nguluwi honhu hawele Nguluwi nayali yawalonjele Daudi na Solomoni, mwanage, "Kuli ng'handa ayi na kuli Yelusalemu, muji uwele nandiuhagula kulawa kuli nhanzi zeng'ha za Isilaeli, ndoliwika itagwa lya heni mazuwa gose. 8 Wone wanhu wa Isilaeli wowa wololela kuli kudita geng'ha gondiwalajize na kibatilila malajizo geng'ha na mizilo jeng'ha, jiwele najilavigwa kwa kukolela Musa, ahyo siwaleka wawinjigwe kulawa kuli isi ayo iwele nandiwapa wasekulu wa hewo." 9 Ila Manase nakawajiliza wanhu wa Yuda na wenyeng'haye wa Yelusalemu, nawadita gehile ng'hatu kusinda wanhu wa isi wawele Mkulu Nguluwi nayali yawadumye hali Waisilaeli.

10 Mkulu Nguluwi nakawakanya Manase na wanhu wa heye, ila hawamhulichize. 11 Ahyo, Mkulu Nguluwi nakawahilika wakulu wa wamizi wa mndewa wa Ashulu, wawele nawamibata Manase na kuwika ndowano kuli mhenyelo ya heye na kumuwopa kwa pingu za shaba na kumuhilika mbaka Babuloni. 12 Kuli magazo ga heye nakamdedeza Mkulu Nguluwi, Nguluwi wa heye, nakenyenyeteza ng'hatu hali Nguluwi wa wasekulu wa heye. 13 Nakamlanda Nguluwi, naye Nguluwi nakabochela kulanda kwa heye nakamhilusa Yelusalemu na kuli undewa wa heye. Ahyo Manase nakavizela kota Mkulu Nguluwi ndo Nguluwi.

14 Hamba Manase nakazenga lukanzi lwa kunze lwa muji wa Daudi ako kolilawilaga isanya mwa nzasa ya Gihoni, kuli ibindi, mbaka kuli Lwizi lwa Somba na mbaka Ofeli, nakaludita lukanzi luwe ng'wemang'wema lukami. Hamwe na ago, nakawawika wakulu wa wamizi kuli miji jeng'ha ja Yuda jiwele na ngome. 15 Nakosa milungu jeng'ha na lila limalukolo liwele kuli ng'handa ya Nguluwi na honhu heng'ha ha kulavila nhambiko kuli chidunda cha ng'handa ya Mkulu Nguluwi na kuli Yelusalemu, nakavitoza hanze ha muji. 16 Hamba nakahilusa honhu ha kulavila nhambiko ha Mkulu Nguluwi na kulavya nhambiko za kikala goya na nhambiko za kulonga malumbo mchanya mwake, nakawalajiza wanhu wa Yuda wamfugamile Mkulu Nguluwi, Nguluwi wa Isilaeli.

17 Ila wanhu nawalutilila kulavya nhambiko kuli honhu ha kujifugamila milungu, ila kwa Mkulu Nguluwi, Nguluwi wa hewo hela.

18 Mbuli zinji za ulongozi wa Manase na kulanda kwa heye kwa Nguluwi wa heye na ulonzi woyalonjelwe na waloli wawele nawalongasa na heye kwa itagwa lya Mkulu Nguluwi, Nguluwi wa Isilaeli, navyandichigwa kuli chitabu cha kukumbuchila kwa wandewa wa Isilaeli. 19 Kulanda kwa heye, hamwe na vila Nguluwi navyoyanojezwe na kudedeza kwa heye, kahi gehile ga heye geng'ha na kuwa yalihela makundo kwa heye na honhu heng'ha hawele nakahazenga kwa chiwalo cha kujifugamila milungu na mizengo ja jimalukolo ja Ashela joyajimize na jimalukolo loyawele yang'hali kinyenyeteza, geng'ha gandichigwa kuli kukumbuchila kwa waloli. 20 Manase nakabagama na kutiligwa kuli ng'handa ya heye ya chiundewa. Amoni, mwanage, nakalongoza honhu hake.

21 Amoni nayali na miyaka makumi meli na mili (22) loyaluche kulongoza. Nakalongoza kwa miyaka mili ako Yelusalemu. 22 Nakadita wihe hali Mkulu Nguluwi, kota vila Manase, mhaza wa heye vyoyaditile. Amoni nakalavya nhambiko na kujifugamila jimalukolo joyajigongomanye Manase, mhaza wa heye. 23 Manase, mhaza wa Amoni, nakenyenyeteza hali Mkulu Nguluwi, ila Amoni haditile kota mhaza wa heye, nakonjeza kudita gehile ng'hatu. 24 Hamba vitumagwa wa heye nawamkopola kuli ng'handa ya heye. 25 Wanhu wa isi ya Yuda nawawakopola weng'ha wawele nawamkopola mndewa Amoni. Nawamdita Yosiya mwanage, yawe mndewa honhu ha heye.