1 Yoashi nakaluka kulongoza Yuda loyawele na miyaka saba. Nakalongoza kwa miyaka makumi gane (40) ako Yelusalemu. Mayake nayali yochemigwa Sibiya, kulawa Beeli-sheba. 2 Yoashi nakadita ganojile hali Mkulu Nguluwi kuli miyaka jeng'ha ja ulongozi wa mtambika Yehoyada. 3 Yehoyada nakamhesela Yoashi wache weli, nawo nawampondela wana walume na wadala.

4 Hamba Yoashi nakamula kuizenga kahi ng'handa ya Mkulu Nguluwi. 5 Lelo, nakawachema watambika na Walawi nakuwalonjela, "Mlute kuli muji wa Yuda, mkakongoze sendi zowalinguganigwa kulavya chila mwaka kulawa kwa Waisilaeli weng'ha, leka tuzenjele kahi ng'handa ya Nguluwi wa hemwe. Mdite himahima." Ila Walawi hawaditile himahima. 6 Lelo mndewa nakamchema Yehoyada, mtambika mkulu na kumuuza, "Lekachoni huwalonjele Walawi wegale kodi kulawa kwa wanhu wa Yuda na Yelusalemu, kodi iwele Musa, chitumagwa wa Nguluwi nayali yaiwichile, hamwe na wanhu wa Isilaeli kwa chiwalo cha ihema lya Mkulu Nguluwi?" 7 Kwa vila wana wa Ataliya, yula mdala mwihe, nawabena ng'handa ya Mkulu Nguluwi na kwinjila mgati, ahyo nawatumiya mbaka vila vinhu viwele naviwichigwa chiuyeng'ha kwa Mkulu Nguluwi. Nawatumiya vinhu avyo kwa chiwalo cha kuwafugamila mabaali.

8 Lelo mndewa nakawalajiza Walawi wagongomanye isanduku, nawo nawagongomanya isanduku na kuliwika hanze ha lwizi lwa ng'handa ya Mkulu Nguluwi. 9 Hamba nawawikula kuli isi ya Yuda na Yelusalemu, kota wanhu weng'ha wamlavile Mkulu Nguluwi kodi yila iwele Musa, chitumagwa wa Nguluwi nayali yawalajize Waisilaeli wamlavile Nguluwi lowawele kuchiwala. 10 Wakulu weng'ha na wanhu weng'ha nawegala kodi za hewo kwa kusangalala na kuziwika kuli isanduku alyo mbaka nalimema. 11 Ahyo, chila mhela Walawi lowalihiliche isanduku mgati mwa ng'handa ya Nguluwi kwa wakulu wa mndewa, nawo lowawene kota mna chasi chikulu cha sendi, yalingwandika wa mndewa na chilongozi wa mtambika mkulu, nawali woluta kuzihola sendi azo na kulihilusa kahi isanduku alyo kuli honhu hake. Nawali wodita ahyo chila zuwa na nawali wopata sendi nyinji lukami.

12 Mndewa na Yehoyada nawazilavya sendi azo na kuwapa wala vilongozi wa wanhu wawele nawali wokola mijito ja kuzenga kahi ng'handa ya Mkulu Nguluwi. Nawo nawawawika wanhu wakole mijito ja kuzenga ng'handa na kuhongola maganga na migodi, leka wakole mijito ja kuinoliga ng'handa ya Mkulu Nguluwi. Nawawawika kahi wawanzi wa kugongomanya vinhu vya chuma na shaba leka kuizenga kahi ng'handa ya Mkulu Nguluwi. 13 Ahyo wawanzi awo nawakola mijito ajo kwa kikangaza na mijito najilutilila goya. Nawaizenga kahi ng'handa ya Mkulu Nguluwi mbaka nayali kota vyoiwele hamwande na nayali nzinzili. 14 Lowasindile kuzenga kahi ng'handa ya Mkulu Nguluwi, sendi zisigale nawamha mndewa na Yehoyada, nawo kwa sendi azo nawagongomanya vinhu kwa chiwalo cha ng'handa ya Mkulu Nguluwi. Vinhu avyo ndo kwa chiwalo cha kukolela mijito na kwa chiwalo cha nhambiko za kulakazwa na visaye na vinhu vinji vya zahabu na sendi. Mhela weng'ha Yehoyada loyawele mkomu, nhambiko za kulakazwa nazali zilavigwa mhela weng'ha kuli ng'handa ya Nguluwi.

15 Lelo Yehoyada nayali yalalile lukami, nakabagama yawele na miyaka miya imwe na makumi gadatu (130). 16 Nawamtila kuli muji wa Daudi, kuli vilaga vya wandewa leka kulajila kota kangutogoligwa kwa vila nakadita mbuli zinojile kuli Isilaeli kwa chiwalo cha Nguluwi na kwa ng'handa ya Nguluwi.

17 Yehoyada loyabagame, wakulu wa Yuda nawaluta kwa mndewa Yoashi na kumfugamila, naye mndewa nakawahulichiza. 18 Lelo wanhu nawaileka ng'handa ya Mkulu Nguluwi, Nguluwi wa wasekulu wa hewo, nawaluka kujifugamila mizengo ja Maashela na jimalukolo. Kwa chiwalo cha nongwa ya hewo, ng'halazi ya Nguluwi naiwafika wanhu wa Yuda na wa Yelusalemu. 19 Hanga Mkulu Nguluwi nakawalajiza waloli wawahiluse wanhu kwa heye na kuwakanya, ila hewo hawawahulichize waloli. 20 Ahyo, muhe wa Nguluwi naumuyila Sekaliya, mwana wa mtambika Yehoyada. Sekaliya nakema hali wanhu nakalonga, "Mkulu Nguluwi kanguwauza hemwe kota lekachoni mwangulema kuwinza mizilo ja heye? Mbuli za hemwe haziweza kulutilila goya, kwa vila namumleka, naye kahi nakawaleka hemwe."

21 Ila nawamditila mbuli zihile na kwa malajizo ga mndewa nawamtowa kwa maganga kuli chipepela cha ng'handa ya Mkulu Nguluwi, nawamkopola. 22 Mndewa Yoashi nakagasemwa ganojile goyaditilwe na Yehoyada, mhaza wa Sekaliya, nakamkopola Sekaliya. Naye Sekaliya loyawele habehi kubagama nakalonga, "Mkulu Nguluwi yagone madito ga hemwe, yawahilulile chibida."

23 Kuli kuduma kwa wula mwaka, chilundo cha wamizi wa Waalamu nachuya kitowa na Yoashi, nachiwatowa wanhu wa Yuda na wa Yelusalemu na kuwakopola vilongozi weng'ha. Nawawaboka lufufu lwawo lweng'ha na kumhilichila mndewa wa hewo ako Damasiko. 24 Hanga chilundo cha wamizi wa Waalamu nachali chuyile na wamizi wado hela, Mkulu Nguluwi nakachidita chichisumye chilundo chikulu cha wamizi wa Yuda. Magazo ago nagamfika Yoashi na wanhu wa Yuda, kwa vila nawamleka Mkulu Nguluwi, Nguluwi wa wasekulu wa hewo. 25 Waalamu nawoka na kumleka Yoashi yawele yalumizwe lukami. Vilongozi wa heye nawamditila vibi kwa vila nakamkopola mwana wa mtambika Yehoyada, nawo nawamkopola loyawele kuli chinhanda cha heye. Ahyo nakabagama na kutiligwa kuli muji wa Daudi, ila haiwele kuli vilaga vya wandewa. 26 Wanhu wawele nawamditila vibi nawali Sabadi, mwana wa mdala Mwamoni yalinguchemigwa Shimeati na Yehosabadi, mwana wa mdala Mmoabu, itagwa lyake Shimuliti. 27 Mbuli za wanage Yoashi kuwala kuizenga kahi ng'handa ya Mkulu Nguluwi na uloli weng'ha kumuwala heye, navyandichigwa kuli chitabu cha kukumbuchila kwa wandewa. Amasiya, mwanage, nakalongoza honhu ha heye.