1 Kuli mwaka wa makumi gadatu na sita wa ulongozi wa mndewa Asa, Baasha, mndewa wa Isilaeli, nakaitowa isi ya Yuda na kwaluka kuzenga ngome kuli muji wa Lama, leka yamlemeze munhu yoneche yaleche kulawa ne kwinjila kuli isi ya Asa, mndewa wa Yuda. 2 Hamba mndewa Asa nakahola sendi na zahabu kulawa kuli ng'hano za ng'handa ya Mkulu Nguluwi na kuli ng'hano za ng'handa ya mndewa na kuwalajiza vitumagwa wa heye wavihiliche kwa Beni-hadadi, mndewa wa Alamu, yawele nayali yochikala ako Damasiko, nakalonga, 3 "Tuwiche ilagano hali heni na hegwe, kota vyowaditile mhaza wa heni na mhaza wa hegwe. Ulole, nandikugalila sendi na zahabu. Lelo ulute ukabene ilagano lya hegwe na Baasha, mndewa wa Isilaeli, leka yaleche kitowa na heni."

4 Mndewa Beni-hadadi nakakunda kuwinza ulonzi wa mndewa Asa, nakalajiza wakulu wa wamizi wa heye na wamizi wa heye kuluta kujitowa miji ja Isilaeli. Nawajihola miji ja Iyoni na Dani na Abeli-maimu na miji jeng'ha ja Nafutali jiwele na ng'hano ya chilyo. 5 Mndewa Baasha loyahuliche mbuli ayo, nakaleka kuuzenga muji wa Lama, nakalechelela mijito ya heye. 6 Hamba mndewa Asa nakawahilika Wayuda weng'ha na kuwalonjela wahole maganga na mbawo kulawa Lama, vinhu viwele Baasha nayali yovitumiya ako kwa kuzenjela. Mndewa Asa nakatumiya mbawo azo kuzenjela Misipa na Geba.

7 Mhela awo, mloli Hanani nakaluta kwa Asa, mndewa wa Yuda, nakamlonjela, "Kwa vila nawali umtumbila mndewa wa Shamu, nakuleka kitumbila kwa Mkulu Nguluwi, Nguluwi wa hegwe, wamizi wa Alamu nawasulupuka mmoko mwa hegwe. 8 Ndaze, hambe ukumbuchile gala galawile kwa Wakushi na Walibiya? Nawali wamizi wawele na mong'ho na mituka minji ja kitowa ngondo na wakwina falasi wenji lukami. Ila kwa vila nawali uchitumbila kwa Mkulu Nguluwi, heye nakawawika mmoko mwa hegwe. 9 Mkulu Nguluwi kanguilolela goya isi yeng'ha, leka yawape mong'ho wala wawele wa kukundigwa kwa heye. Nakudita mbuli ya upoka, ahyo kulawa sambi na kulutilila, hegwe kowa na ngondo chila mhela."

10 Ulonzi awo wa mloli Hanani, naumzudiza lukami Asa mbaka nakamhindila mloli Hanani mchinweng'ho. Mhela wuwo du, Asa nakaluka kuwabunza lukami wanhu wamwenga.

11 Madito ganji geng'ha ga ulongozi wa mndewa Asa kulawa mwaluko mbaka kuduma, nagandichigwa kuli chitabu cha kukumbuchila kwa Wandewa wa Yuda na Isilaeli. 12 Kuli mwaka wa makumi gadatu na tisa (39) wa ulongozi wa mndewa Asa, heye yuye mndewa Asa nakafichigwa na utamwa kuli magulu ga heye. Hanga utamwa awo nawali ulutilila, hapalile utanzi kulawa kwa Mkulu Nguluwi, ila nakepalila utanzi kulawa kwa wateleka mikwandi. 13 Kuli mwaka wa makumi gane na umwe (41) wa ulongozi wa heye, Asa nakabagama. 14 Nakatiligwa kuli chilaga choyebawile heye yuye mitalawe, kuli muji wa Daudi. Nawamuwika kuli chinhanda cha kupapila mtufi, chiwele chimemezwe unhunyhililo wa vilivinji ugongomanyigwe na wawanzi wa kugongomanya unhunyhililo, nawo nawabwina chiluli chikulu lukami kwa lutogo lwa heye.