1 Abiya nakaluka kulongoza ako Yuda kuli mwaka wa kumi na nane wa ulongozi wa mndewa Yeloboamu. 2 Nakalongoza ako Yelusalemu kwa miyaka jidatu. Mayake nayali yochemigwa Maaka, mhinza wa Ulieli wa Gibeya.

Lelo nakwali na ngondo hali Abiya na Yeloboamu. 3 Abiya nakaluta kitowa ngondo yawele na wamizi wazidahe lachi zine (400,000), naye Yeloboamu nayali yewichile goya kitowa na Abiya, yawele na wamizi wazidahe lachi nane (800,000). 4 Mndewa Abiya nakema mchanya mwa chidunda cha Semalaimu, kuli isi ya vidunda vya Efulaimu, nakalonga, "Yeloboamu na wanhu weng'ha wa Isilaeli, mnyhulichize! 5 Hamvizelele kota Mkulu Nguluwi, Nguluwi wa Isilaeli, nakamha Daudi na lulelo lwa heye undewa kuli isi ya Isilaeli kwa ilagano lya mazuwa gose? 6 Ila Yeloboamu, mwana wa Nebati, chitumagwa wa Solomoni, nakambelenhuka mkulu wa heye. 7 Hamba, nakekungajizila chilundo cha wanhu wapoka, wohambe watanze chinhu choneche, nawo nawamdedeza Lehoboamu, mwana wa Solomoni, yakunde kudita gala gowaganile hewo, naye hawezile kuwalemeza kwa vila mhela awo nayali yang'hali msongolo na yalihela uwanzi winji.

8 "Lelo, hemwe mwangijesa kota moweza kitwanza na undewa wa Mkulu Nguluwi uwele mmoko mwa lulelo lwa Daudi, kwa vila mwanacho chilundo chikulu cha wamizi na mwanajo jimalukolo ja milogota ja zahabu, jiwele Yeloboamu nakajigongomanya leka jiwe milungu ja hemwe. 9 Ndaze, hamuwawinjile watambika wa Mkulu Nguluwi, wawele ndo wana wa Aluni na Walawi na kiditila watambika wa hemwe kota vyowalingudita wanhu wa isi zinji? Yoneche yalinguya kwa hemwe kidita mtambika yawele na ilogota ilume ama ming'holo milume saba, koweza kuwa mtambika wa chinhu chiwele ndo mlungu kwa hemwe.

10 "Ila kuwala hetwe, Mkulu Nguluwi, ndo Nguluwi wa hetwe, hatumlechile. Twanawo watambika wa lulelo lwa Aluni wawele wangumkolela mijito Mkulu Nguluwi, walingutanzigwa na Walawi. 11 Chila zuwa mitondo na matinazo watambika awo wangulavyaga nhambiko za kulakazwa na kufunyiza ubani ulingunhunyilila goya kwa Mkulu Nguluwi. Wanguwikaga kahi mibumunda mchanya mwa chisaga cha zahabu inojile na ja kuwichigwa kumwando kwa Mkulu Nguluwi na kubwina chenje kuli chinhu cha kuwichila chenje cha zahabu chila matinazo. Hetwe twanguwinza malajizo ga Mkulu Nguluwi, Nguluwi wa hetwe, ila hemwe namumleka. 12 Nguluwi ka hamwe na hetwe, heye ndo chilongozi wa hetwe. Watambika wa heye wawele na mhalamanda za hewo wopemba azo mhalamhanda kwa chiwalo cha kitowa ngondo na hemwe. Hemwe wanhu wa Isilaeli, mleche kitowa ngondo na Mkulu Nguluwi, Nguluwi wa wasekulu wa hemwe, kwa vila hamuweza kusumya."

13 Yeloboamu nayali yawalajize wamizi kuuzunguluta kumbele muji wa Yuda, leka wone yawe kumwando mwa Yuda, chilundo cha wamizi chiwavabe kwa kumbele. 14 Wanhu wa Yuda vyowawene kota nawazungulutwa, nawamlilila Mkulu Nguluwi, nawo watambika nawapemba mhalamhanda za hewo. 15 Wanhu wa Yuda nawatowa iyowe lya ngondo, naye Nguluwi nakawawinga Yeloboamu na Waisilaeli weng'ha hali mndewa Abiya na wanhu wa Yuda. 16 Waisilaeli nawabilima hali wanhu wa Yuda, naye Nguluwi nakawawika Waisilaeli mmoko mwa hewo. 17 Abiya na wanhu wa heye nawawatowa ng'hatu na kuwasumya. Nakawakopola wamizi wa Isilaeli lachi zihano (500,000) wazidahe ng'hatu kitowa ngondo kuli Isilaeli. 18 Ahyo, wanhu wa Yuda nawawasumya Waisilaeli kwa vila nawali wochitumbila kwa Mkulu Nguluwi, Nguluwi wa wasekulu wa hewo. 19 Abiya nakamuwinga Yeloboamu na kujihola miji jimwenga, jiwele ndo Beteli na Yeshana na Elifoni, hamwe na vijiji viwele hafungo ha miji ajo. 20 Yeloboamu hawele na mong'ho kahi mhela wa ulongozi wa Abiya. Naye Mkulu Nguluwi nakamtowa Yeloboamu, naye nakabagama. 21 Ila Abiya nakalutilila kuwa na mong'ho ng'hatu. Nakahesa wache kumi na wane na nayali na wana walume makumi meli na mbili na wahinza kumi na sita. 22 Madito ganji ga ulongozi wa Abiya, hamwe na mbuli zoyaditile na ulonzi wa heye, navyandichigwa kuli chitabu cha mbuli za mloli Ido.