1 Yehoshafati, mwana wa Asa, nakalongoza honhu ha mhaza wa heye, nakewika nzinzili kwa chiwalo cha Waisilaeli. 2 Nakawika wamizi kuli miji jeng'ha ja Yuda jiwele na ngome na kuwika wamizi hali honhu hanji ha Yuda na kuli miji ja Efulaimu, jiwele Asa, mhaza wa heye, nayali yajiholile. 3 Mkulu Nguluwi nakamtambichiza Yehoshafati, kwa vila nakawinza nzila za mwaluko za miyaka ja kuli kikala kwa mhaza wa heye. Hamfugamile mlungu Baali, 4 ila nakampala Nguluwi wa wasekulu wa heye na kuwinza malajizo ga heye, honhu ha kuwinza vihendo vya wanhu wa Isilaeli. 5 Mkulu Nguluwi nakawimiza nzinzili undewa wa Yuda hali ulongozi wa Yehoshafati, wanhu weng'ha wa Yuda nawamigalila ndolendole, ahyo nakawa na lufufu lwinji na nayali kahi munhu yalinguhulichizwa. 6 Nhumbula ya heye nayali igana lukami kuwinza nzila za Mkulu Nguluwi na mzidi wa ago nakosa honhu ha kufugamila milungu na mizengo ja Maashela kuli isi ya Yuda.

7 Kuli mwaka wa kadatu wa ulongozi wa heye, Yehoshafati nakawalajiza vilongozi wa heye, wawele ndo Beni-haili na Obadiya na Sekaliya na Netanaeli na Mikaya, leka wakawalanguse wanhu wa kuli miji ja Yuda. 8 Walawi wamwenga nawali hamwe na hewo. Walawi awo ndo Shemaya na Netaniya na Sebadiya na Asaeli na Shemilamoti na Yehonatani na Adoniya na Tobiya na Tobi-adoniya. Kahi nawali hamwe na watambika, wawele ndo Elishama na Yeholamu. 9 Nawachihola chitabu cha malajizo ga Mkulu Nguluwi, nawajenda nacho kuli miji jeng'ha ja Yuda wowalangusa wanhu.

10 Mkulu Nguluwi nakaupa lunhwinhwi undewa weng'ha uwele hafungo mwa Yuda, ahyo naudumba kitowa ngondo na Yehoshafati. 11 Wafilisti wamwenga nawamigalila Yehoshafati ndolendole hamwe na sendi kota ushulu na Waalabu nawamigalila ming'holo milume elufu saba na miya saba (7,700) na mipongo elufu saba na miya saba (7,700). 12 Ahyo, Yehoshafati nakalutilila kuwa na mong'ho ng'hatu. Nakazenga ngome na miji ja ng'hano kuli Yuda, 13 nayali kahi na vinhu vinji lukami kuli miji ja Yuda. Ako Yelusalemu, nakawika wamizi wazidahe kitowa ngondo. 14 Nawandichigwa kwa kuwinza ng'holo za wasekulu wa hewo, kulawa Yuda, Adina nakalongoza vilongozi elufu imwe (1,000), wawele nawalongoza wamizi lachi zidatu (300,000). 15 Wa keli kuli ulongozi nayali Yehohanani, ayu nayali na wamizi lachi mbili na elufu makumi nane (280,000) 16 na wa kadatu kuli ulongozi nayali Amasiya, mwana wa Sikili, yawele nakelavya yuye kumkolela mijito Mkulu Nguluwi. Heye nayali na wamizi lachi mbili (200,000). 17 Vilongozi wa wamizi kulawa kuli nhanzi ya Benjamini, wa mwaluko nayali Eliada, mwamizi yazidahe. Ayo nayali na wamizi lachi mbili (200,000), wawele na misale na ngawo. 18 Wa keli nayali Yehosabadi, nayali na wamizi lachi imwe na elufu makumi nane (180,000) wewichile goya kitowa ngondo. 19 Vilongozi awo weng'ha nawali womkolela mijito mndewa ako Yelusalemu. Mzidi wa ago, mndewa nakawawika wamizi wanji kuli miji jiyage jiwele na ngome kuli isi yeng'ha ya Yuda.