1 Mndewa wa chidala wa ako Sheba loyahuliche lutogo lwa Solomoni, nakaluta Yelusalemu leka yamjeze Solomoni kwa kumuuza mbuli zing'ang'ale. Nakafika Yelusalemu yawele na wanhu wenji lukami, hamwe na ngamiya wapichile vinhu vilingunhunyhilila na zahabu nyinji na maganga ga sendi nyinji. Loyafichile kwa Solomoni, nakamlonjela kuwala mbuli zeng'ha ziwele mnhumbula mwa heye. 2 Mndewa Solomoni nakamwidichila mbuli zeng'ha, hakuwele na mbuli yoneche iwele nakalemwela kumlonjela. 3 Mndewa wa chidala wa Sheba loyavizele ndaze luhala lweng'ha lwa mndewa Solomoni vyoluwele na kuyona ng'handa ya chiundewa yaizenjile 4 na chilyo chiwele kuli chisaga cha heye na ndaze wang'hangala wa heye vyowekalise na wakola mijito wa heye na mikanzu jawo na walingigala vyakunwa wa heye na mikanzu jawo na nhambiko za heye za kulakazwa zoyazilavile kuli ng'handa ya Mkulu Nguluwi, nakabubuwala lukami. 5 Lelo, nakamlonjela mndewa, "Mbuli zeng'ha zonyhuliche kuli isi ya heni kuwala mbuli za hegwe zilingulutilila goya na kuwala luhala lwa hegwe ndo za kukomya. 6 Ila sikundile kuwala mbuli azo mbaka lombuyile na kulola. Ena, silonjelwe ne nusu yake. Ukulu wa luhala lwa hegwe na lufufu navipuluta kusinda yila mbuli yonyhuliche. 7 Nawatambichizwa wanhu wa hegwe! Nawatambichizwa wano vitumagwa wa hegwe walingwima hali hegwe mazuwa gose na kuhulichiza luhala lwa hegwe! 8 Yatogoligwe Mkulu Nguluwi, Nguluwi wa hegwe, yula yanojezwe lukami na hegwe na kukuwika kuli chigoda cha heye cha undewa leka uwe mndewa honhu ha heye Mkulu Nguluwi, Nguluwi wa hegwe. Kwa vila Nguluwi wa hegwe nakawagana Waisilaeli na nakanuwila kuwemiza nzinzili mazuwa gose, nakakudita uwe mndewa leka udite hachi na kutanganika."

9 Hamba mndewa wa chidala nakamha mndewa Solomoni zahabu kilo elufu zine na miya imwe (4,100) na chasi chikulu ng'hatu cha vinhu vilingunhunyhilila na maganga ga sendi nyinji. Hailawile ne hado kuhilikwa unhunyhililo winji kota wula, uwele mndewa wa chidala wa Sheba nakauhilika kwa mndewa Solomoni. 10 Hihyo du kwa vitumagwa wa Hilamu hamwe na wa Solomoni, nawahilika zahabu nyinji lukami na mizinga minji lukami ja migodi ja misandali na maganga ga sendi nyinji kulawa Ofili. 11 Mndewa Solomoni nakajikolela mijito ajo mizinga ja migodi ja misandali leka jiwe vikwinilo vya ng'handa ya Mkulu Nguluwi na kwa ng'handa ya chiundewa na kahi kugongomanyila ving'hweleng'hwele na migombogombo kwa chiwalo cha walingwimba. Vinhu kota avyo hainalawila koneka kuli isi ya Yuda kulawa zuwa lila.

12 Naye mndewa Solomoni nakamha mndewa wa chidala wa Sheba chila chinhu choyaganile na kulanda, mzidi wa vila vinhu vyoyagalilwe na mndewa. Hamba, mndewa ayo wa chidala nakahiluka kuli isi ya heye yawele na vitumagwa wa heye.

13 Chila mwaka Solomoni nayali yobochela zahabu kilo elufu makumi meli na zidatu (23,000), 14 ne kuwaza vinhu vihilichigwe kulawa kwa walingugula na kuguza vinhu. Wandewa weng'ha wa Alabiya na vilongozi wa isi nawamhilichila Solomoni zahabu na sendi. 15 Mndewa Solomoni nakagongomanya ngawo ng'hulu miya mbili kwa zahabu ipondigwe, chila ngawo nayali na itunyo lya kilo saba. 16 Nakagongomanya ngawo ndodo miya zidatu kwa zahabu ipondigwe, chila ngawo nayali na itunyo lya kilo zidatu na nusu za zahabu, hamba mndewa nakaziwika kuli ng'handa ya chiundewa ya Chihulo cha Lebanoni. 17 Hamba mndewa nakagongomanya chigoda chikulu cha undewa kwa mizino ja nhembo na kuchigubika kwa zahabu inojile ng'hatu. 18 Chigoda acho cha undewa nachali na chikwinilo chiwele na magulu sita na honhu ha kuwichila magulu ha zahabu, vyeng'ha avyo navyali vya zahabu. Kuli banzi zeng'ha za chigoda nakwali na honhu ha kuwichila moko na jimalukolo ja misimba mili jimile hafungo ha moko ago. 19 Nakwali kahi na jimalukolo kumi na mili ja misimba jimile, mili kuli chila mgulu wa chikwinilo, kumoso limwe na kudilo limwe. Nakwali haduhu chinhu kota acho chiwele nachigongomanyigwa kuli undewa woneche. 20 Vizombe vyeng'ha vya kunwela mndewa Solomoni navyali vya zahabu na vinhu vyeng'ha vya kuli Ng'handa ya chiundewa ya Chihulo cha Lebanoni navyali vya zahabu inojile. Hakuwele na chinhu chiwele nachigongomanyigwa kwa sendi, kwa vila sendi nayali yokoneka kota yahela lutogo ng'hatu kuli mhela wa ulongozi wa mndewa Solomoni. 21 Mndewa Solomoni nayali na meli nyinji za kugula na kuguza vinhu kuli bahali ziwele nazali zilongozwa na vitumagwa wa Hilamu. Mala imwe kuli chila miyaka jidatu meli azo za Talishishi nazali zihiluka kuno ziwele na zahabu na sendi na mizino ja nhembo na minyabu na minjedele. 22 Ahyo, mndewa Solomoni nayali na lufufu na luhala lwinji kusinda wandewa weng'ha wa kuli isi. 23 Wandewa wa isi zeng'ha nawali wopala kiting'hana na mndewa Solomoni leka kuhulichiza luhala luwele Nguluwi nayali yampele. 24 Chila mwaka, chila munhu yawele nayali yoluta, nayali yomhilichila ndolendole. Ndolendole azo ndo vinhu vya sendi na zahabu na mikanzu na vinhu vya kitowa ngondo na vinhu vilingunhunyhilila na falasi na migongolo kota midogowi mikulu. 25 Mndewa Solomoni nayali na vibumuli elufu zine (4,000) vya kuwichila falasi na mituka ja ngondo na falasi elufu kumi na mbili (12,000) wawele nakawawika kuli miji ja mituka ja ngondo na Yelusalemu hamwe na heye. 26 Mndewa Solomoni nakawalongoza wandewa weng'ha kulawa lwanda lwa Eyufulate mbaka kuli isi ya Wafilisti na kulutilila kuli mbaka wa Misili. 27 Mndewa Solomoni nakaidita sendi kuli Yelusalemu iwe chinhu cha hihi hela kota maganga, kahi mbawo za mielezi nakazidita ziwe nyinji kota mikuyu ja Shefela. 28 Falasi wa mndewa Solomoni nawegaligwa kulawa Misili na kuli isi zinji zeng'ha.

29 Mbuli zinji za mndewa Solomoni kulawa mwaluko mbaka kuduma nazandichigwa kuli chitabu cha ndano ya mloli Natani na kuli uloli wa Ahiya Mshiloni na kuli ulaguzi wa Ido mlaguzi, gawele gangumuwala kahi Yeloboamu, mwana wa Nebati. 30 Kulawa Yelusalemu, Solomoni nakailongoza isi yeng'ha ya Isilaeli kwa mhela wa miyaka makumi gane. 31 Hamba Solomoni nakabagama, nakatiligwa Yelusalemu, muji wa Daudi, mhaza wa heye. Lehoboamu, mwanage, nakalongoza honhu ha heye.