1 Hamba Yehoshafati nakabagama na kutiligwa hamwe na wasekulu wa heye kuli vilaga vya chiundewa kuli muji wa Daudi. Yeholamu, mwanage, nakawa mndewa honhu ha heye.

2 Yeholamu nayali na wadodoze walume wamwenga, wawele ndo Asaliya na Yehieli na Sekaliya na Asaliya na Mikaeli na Shefatiya. Awa weng'ha nawali ndo wana wa Yehoshafati, mndewa wa Yuda. 3 Mhaza wa hewo nakawapa ndolendole nyinji za sendi na zahabu na vinhu vya sendi nyinji, hamwe na miji ja Yuda jiwele na ngome, ila undewa nakamha Yeholamu, kwa vila nayali ndo mwanage wa mwaluko. 4 Undewa wa Yeholamu lowimile nzinzili, nakawakopola kwa ipanga wadodoze walume weng'ha na vilongozi wamwenga wa Isilaeli.

5 Yeholamu nakaluka kulongoza loyawele na miyaka makumi gadatu na mili (32). Nakalongoza ako Yelusalemu kwa miyaka nane. 6 Nakawinza nzila zihile za wandewa wa Isilaeli, kota ivyazi lya Ahabu vyoliditile, kwa vila nakamhesa mhinza wa Ahabu. Nakadita gehile hali Mkulu Nguluwi, 7 ila Mkulu Nguluwi haganile kulidumya ivyazi lya Daudi, kwa chiwalo cha ilagano liwele Mkulu Nguluwi nayali yaliditile na Daudi. Nguluwi nakalagana kota lulelo lwa heye lolutilila kulongoza mazuwa gose.

8 Mhela wa ulongozi wa Yeholamu, wanhu wa Edomu nawaubelenhuka ulongozi wa Yuda na kiwichila mndewa wa hewo wawo. 9 Ahyo, Yeholamu nakaluta ako hamwe na vilongozi wa heye na mituka ja heye ja ngondo jeng'ha. Waedomu nawamzunguluta heye na wakulu wa wamizi wa heye wa mituka ja heye ja ngondo, mhela wa nechilo nakaweza kukola hagati ha Waedomu na wamizi wa heye. 10 Ahyo wanhu wa Edomu nawaubelenhuka ulongozi wa Yuda kulawa mhela wula. Mhela wuwo kahi, wenyeng'haye wa Libuna nawo nawaubelenhuka ulongozi wa Yeholamu. Mbuli azi zeng'ha nazilawila kwa vila Yeholamu nayali yamlechile Mkulu Nguluwi, Nguluwi wa wasekulu wa heye. 11 Nakagongomanya kahi honhu ha kufugamila milungu kuli vidunda vya Yuda na kuwambuza wenyeng'haye wa Yelusalemu kujifugamila milungu kota wang'hondwa, ahyo nakawajiliza wanhu wa Yuda.

12 Yeholamu nakabochela baluwa kulawa kwa mloli Eliya, nayali yandichigwe hino, "Awu ndo ulonzi uwele Mkulu Nguluwi, Nguluwi wa sekulu wa hegwe Daudi, ‘Huwinzile nzila za mhaza wa hegwe Yehoshafati ama za Asa, mndewa wa Yuda. 13 Nakuwinza nzila za wandewa wa Isilaeli na kuwalongoza wanhu wa Yuda na wa Yelusalemu kudita ung'hondwa kwa kujifugamila milungu kota vila ivyazi lya Ahabu vyoliditile. Kahi nakuwakopola wadodozo walume wa mhaza wa hegwe, wanhu wawele nawali wanojile ng'hatu kusinda hegwe. 14 Ahyo, Mkulu Nguluwi, kowatowa wanhu wa hegwe na wanago na wache wa hegwe na kuwifya lufufu lwako lweng'ha. 15 Nagwe kokugula utamwa wa mnundu kwa mhela winji mbaka kobagama.’ "

16 Lelo Mkulu Nguluwi nakawadita Wafilisti wamwenga na Waalabu wawele nawali wochikala habehi na Wakushi, wamzudile lukami Yeholamu na kitowa naye. 17 Lelo nawaivaba na kuitowa isi ya Yuda. Nawahola lufufu lweng'ha luwele kuli ng'handa ya chiundewa na kuwahola wache wa heye na wanage. Nawamleka Ahasiya yaliyeka, mwana wa Yeholamu, yawele mhela awo nayali mdodo kusinda weng'ha.

18 Logakwete ago geng'ha, Mkulu Nguluwi nakamtowa Yeholamu kwa utamwa wa munda uwele haulingupona. 19 Loukolile mhela umwenga, kuli kuduma kwa mwaka wa keli wa kugula kwa heye, Yeholamu nakabagama kuno yawele na usungu lukami. Wanhu wa heye hawabwinile chiluli kwa chiwalo cha kulombocheza kubagama kwa heye, kota vyowaditile kwa wasekulu wa heye.

20 Yeholamu nakaluka kulongoza loyawele na miyaka makumi gadatu na mili (32), nakalongoza ako Yelusalemu kwa mhela wa miyaka nane. Loyabagame, nakwali haduhu munhu yoneche yawele na masinzo kwa chiwalo cha kubagama kwa heye, nakatiligwa kuli muji wa Daudi, ila haiwele kuli vilaga vya chiundewa.