1 Yehoshafati, mndewa wa Yuda, nakawa na lufufu na lutogo. Nakadita ilagano hali heye na Ahabu leka mwana wa Yehoshafati yamhese mhinza wa Ahabu. 2 Lojipulute miyaka jimwenga, Yehoshafati nakaluta kumjendela mndewa Ahabu ako Samaliya. Ahabu nakajidumula singo misenga na ming'holo minji kwa chiwalo cha Yehoshafati na wanhu wawele hamwe na heye. Hamba Ahabu nakamdedeza welumbe kuluta kuutowa muji wa Lamoti-gileadi. 3 Nakamuuza, "Ndaze, tolutasa kitowa ngondo ako Lamoti-gileadi?" Naye Yehoshafati nakamwidichila, "Ena, heni na hegwe ndo chinhu chimwe na wanhu wa heni ndo kota wanhu wa hegwe. Towa hamwe kuli kitowa ngondo." 4 Yehoshafati nakalutilila kumlonjela mndewa wa Isilaeli, "Waluche kumuuza Mkulu Nguluwi tandi."

5 Ahyo, Ahabu, mndewa wa Isilaeli, nakawegala waloli kota miya zine (400), nakawauza, "Ndaze, ndute kitowa ako Lamoti-gileadi ama ndeche kuluta?" Nawo nawamwidichila, "Ulute, kwa vila Nguluwi kouwika muji wa Lamoti-gileadi mmoko mwa mndewa." 6 Ila Yehoshafati nakauza, "Ndaze, haduhu mloli yunji wa Mkulu Nguluwi hano yawele toweza kumuuza?" 7 Mndewa wa Isilaeli nakamwidichila Yehoshafati, "Kabaha, nakasigala munhu yumwe yawele kwa kukolela heye toweza kumuuza Mkulu Nguluwi, ila ndangumzudila kwa vila halingulavya uloli unojile kuwala heni, ila kangulavyaga uloli wihile hela. Mloli ayo ndo Mikaya, mwana wa Imula." Yehoshafati nakedichila, "Mndewa halinguganigwa kulonga ahyo."

8 Lelo Ahabu, mndewa wa Isilaeli, nakamchema chilongozi yumwe na kumlonjela, "Migale himahima Mikaya, mwana wa Imula." 9 Lowawele wavalile mikanzu ja hewo ja chiundewa, mndewa wa Isilaeli na Yehoshafati, mndewa wa Yuda, nawali wekalise kuli vigoda vya hewo vya chiundewa, kuli honhu ha kupululila nyhule, hali lwizi lwa kwinjilila Samaliya, hamwe na waloli weng'ha wawele wolavya uloli hali hewo. 10 Mhela awo Sedekiya, mwana wa Kenaana, nayali yagongomanye mbalati za chuma, nakawikula yolonga hino, "Mkulu Nguluwi kangulonga hino, ‘Kwa mbalati azi kowatowa na kuwahilula kumbele Waalamu mbaka howodumigwa.’ " 11 Waloli weng'ha nawali wolavya uloli wuwula wolonga, "Utowe muji wa Lamoti-gileadi leka usumye, kwa vila Mkulu Nguluwi kouwika mmoko mwa hegwe."

12 Mhela awo, yula msenga yalajizwe kumchema Mikaya, nakamlonjela, "Ulole, waloli weng'ha ndo kota munhu yumwe, wangulavya uloli kuwala kusumya kwa mndewa. Fola nagwe uwe kota hewo, ulavye uloli ulinguwala ganojile kuwala mndewa." 13 Ila Mikaya nakalonga, "Ndangilaha kwa Mkulu Nguluwi yawele mkomu, ndolonga gala goyondonjela Mkulu Nguluwi."

14 Mikaya loyafichile hali mndewa, mndewa nakamuuza, "Ndaze Mikaya, ndute kitowa ngondo ako Lamoti-gileadi ama ndeche kuluta?" Mikaya nakedichila, "Ulute na usumye, kwa vila Mkulu Nguluwi koiwika mmoko mwako." 15 Ila mndewa nakamlonjela, "Ndokudita wilahe mala zilinga leka uleche kundonjela chinhu choneche ila kukomya hela kwa itagwa lya Mkulu Nguluwi?" 16 Ahyo Mikaya nakedichila, "Nambona wanhu weng'ha wa Isilaeli nawasambaluka kuli vidunda kota ming'holo jilihela mdimi, naye Mkulu Nguluwi nakalonga, ‘Wanhu wano wahela chilongozi. Waleche leka chila munhu yalute haluga ha heye kwa kikala goya.’ "

17 Mndewa wa Isilaeli nakamlonjela Yehoshafati, "Sikulonjele kota kangulavyaga uloli kuwala mbuli zihile hela, haziwele zinojile?" 18 Mikaya nakalutilila kulonga, "Lelo uhuliche ulonzi wa Mkulu Nguluwi. Nandimona Mkulu Nguluwi yekalise kuli chigoda cha heye cha undewa na wahilisi weng'ha wa kilanga wawele wemile hafungo ha heye kuli ubanzi wa heye wa kumoso na wa kudilo. 19 Mkulu Nguluwi nakauza, ‘Whaani yomhada Ahabu, mndewa wa Isilaeli, yalute kuutowa muji wa Lamoti-gileadi, leka yabagame ako?’ Chila mhilisi nakedichila kota vyoyejesile. 20 Hamba muhe nawuya na kwima hali Mkulu Nguluwi na kulonga, ‘Ndomhada.’ Mkulu Nguluwi nakauuza, ‘Kwa nzila yachi?’ 21 Nawo nawidichila, ‘Ndoluta na kuwadita waloli wa heye weng'ha walonje udesi.’ Mkulu Nguluwi nakaulonjela, ‘Koweza kumhada. Lelo ulute ukadite ahyo.’ 22 Ahyo, Mkulu Nguluwi nakawadita awa waloli wa hegwe walonje udesi. Mkulu Nguluwi nakalajiza kubagama kukuyile."

23 Hamba Sedekiya, mwana wa Kenaana, nakamhejelela Mikaya na kumzabula mizeze na kumuuza, "Kulawa nili awo Muhe wa Mkulu Nguluwi naundeka na kuya kulongasa na hegwe?" 24 Mikaya nakedichila, "Kovizela zuwa alyo louluta na kivisa kuli chihengo cha mgati."

25 Hamba mndewa wa Isilaeli nakalajiza, "Mumhole Mikaya na mumhiluse kwa Amoni, mkulu wa muji na kwa Yoashi, mwana wa mndewa. 26 Mkalonje kota mndewa kangulonga hino, ‘Mumuwiche mchinweng'ho munhu ayo na mleche kumha chinhu choneche chila, ila ibumunda na mazi mbaka hondihiluka kwa kikala goya.’ " 27 Mikaya nakalonga, "Wone kohiluka kwa kikala goya, Mkulu Nguluwi kowa halongase na heni." Hamba nakalutilila kulonga, "Mhulichize ulonzi wa heni hemwe mweng'ha!"

28 Lelo mndewa wa Isilaeli na Yehoshafati, mndewa wa Yuda, nawaluta Lamoti-gileadi. 29 Mndewa wa Isilaeli nakamlonjela Yehoshafati, "Ndokwinjila kuli kitowa ngondo kuno mbele ndilivinji kwa kuvala mivalo johajiwele ja chiundewa, ila hegwe uvale ikanzu lya hegwe lya chiundewa." Ahyo mndewa wa Isilaeli nakaluta kitowa ngondo ne kuvala mivalo ja chiundewa.

30 Mhela awo, mndewa wa Alamu nayali yawalajize wakulu wa wamizi wa heye wa mituka ja kitowa ngondo, yolonga, "Mleche kitowa na munhu yoneche yula, yawe mkulu ama mdodo, ila mitowe na mndewa wa Isilaeli hela." 31 Wala wakulu wa mituka ja ngondo lowamonile Yehoshafati, nawelongasa, "Ayu ndo mndewa wa Isilaeli." Ahyo nawaluta kwa heye leka wamtowe, ila Yehoshafati nakatowa iyowe na Mkulu Nguluwi nakamtanza. Nguluwi nakawadita wala wawele nawali habehi kumtowa, woche. 32 Lelo, wala wakulu wa wamizi lowawene kota hawele mndewa wa Isilaeli, nawaleka kumuwinza. 33 Ila munhu yumwenga nakakwega upinde wa heye ne kunuwila na kumhoma mndewa wa Isilaeli hagati ha honhu halinguting'hana mivalo ja heye ja chuma. Mndewa nakamlonjela yalingwendesa mutuka wa heye, "Galamula mutuka na umbuse kuli kitowa, nandumizwa." 34 Ngondo nailutilila nemisi yeng'ha kuno mndewa nakegamizwa mgati mwa mutuka yochilola na Waalamu mbaka matinazo. Hamba, loufichile mhela wa matinazo, nakabagama.