1 Wenyeng'haye wa Yelusalemu nawamha undewa Ahasiya, mwana mdodo wa Yeholamu, yalongoze honhu ha mhaza wa heye, kwa vila wakulugwe weng'ha nawakopoligwa na chilundo chimwe chuyile kuli kambi hamwe na Waalabu. Ahyo, Ahasiya, mwana wa Yeholamu, mndewa wa Yuda, nakaluka kulongoza. 2 Ahasiya nakaluka kulongoza yawele na miyaka makumi meli na mili (22), nakalongoza kuli Yelusalemu kwa mhela wa mwaka umwe. Mayake nayali yochemigwa Ataliya, mzukulu wa Omuli. 3 Nakawinza nzila za ivyazi lya Ahabu, kwa vila mayake nakamlongoza kudita wihe. 4 Nakadita mbuli zihile hali Mkulu Nguluwi kota ivyazi lya Ahabu vyoliditile, kwa vila mhaza wa heye loyabagame, ivyazi lya Ahabu nalyali limlonjela mbuli zilivinji, mbaka kudumigwa kwa heye. 5 Nakawinza ulonzi wa hewo, nakaluta hamwe na mndewa Yolamu, mwana wa Ahabu, mndewa wa Isilaeli, kitowa ngondo na Hasaeli, mndewa wa Alamu ako Lamoti-gileadi. Waalamu nawamlumiza Yolamu. 6 Hamba nakahiluka kuli muji wa Yesileeli leka kuvilolela vilonda vyoyalumizwe ako Lama, loyawele yochitowa na Hasaeli, mndewa wa Alamu. Naye Ahasiya, mwana wa Yeholamu, mndewa wa Yuda, nakaluta kumjendela Yolamu, mwana wa Ahabu, ako Yesileeli, kwa vila nayali yalumizwe.

7 Mkulu Nguluwi nayali yalajize kota kugwa kwa Ahasiya kwahalawile hoyoluta kumjendela Yolamu. Ahasiya loyafichile ako, nakalawa na Yolamu kuluta kiting'hana na Yehu, mwana wa Nimushi, yawele Mkulu Nguluwi nayali yambakalize mafuta leka kulidumya ivyazi lya Ahabu. 8 Mhela Yehu loyawele yolitagusa ivyazi lya Ahabu, nakawafika wakulu wa Yuda hamwe na wana wa wang'holoze Ahasiya, womkolela mijito Ahasiya, nakawakopola. 9 Nakampala Ahasiya, wanhu wa heye nawamibata Ahasiya yawele yevisile ako Samaliya. Nawamigala mbaka kwa Yehu, naye Yehu nakamkopola. Lukuli lwake nawalutila kwa vila nawalonga, "Nayali mwana wa Yehoshafati, yawele yamuwinzile Mkulu Nguluwi kwa nhumbula ya heye yeng'ha."

Ahyo, haponile munhu ne yumwe kuli ivyazi lya Ahasiya, yawele yoweza kuwa mndewa.

10 Mhela Ataliya, mayake mndewa Ahasiya, loyawene kota mwanage nakabagama, nakanuwila kulidumya lulelo lweng'ha lwa chiundewa lwa Yuda. 11 Ila Yehosheba, mhinza wa mndewa Yeholamu, nakamhola kwa uviso Yoashi, mwana wa Ahasiya, kulawa hali wana wa mndewa wawele nawali wogana kukopoligwa. Nakamuwika Yoashi hamwe na munhu wa kumhembuliza mwana wa heye mgati mwa chihengo cha kuwasa. Ahyo Yehosheba, mhinza wa mndewa Yeholamu, yawele kahi ndo mche wa mtambika Yehoyada na lumbulye Ahasiya, nakamvisa Yoashi leka Ataliya yaleche kumkopola. 12 Yoashi nakasigala na hewo kwa mhela wa miyaka sita yawele yavisigwe mgati mwa ng'handa ya Nguluwi, mhela Ataliya loyawele yoilongoza isi.