1 Lehoboamu nakaluta Shekemu kwa vila Waisilaeli weng'ha nawali walutile ako leka kumdita heye yawe mndewa. 2 Yeloboamu, mwana wa Nebati loyahuliche mbuli ayo, nakahiluka kulawa Misili. Yeloboamu nayali Misili kuwele nakabilimila ako leka yawe kutali na mndewa Solomoni. 3 Ahyo Waisilaeli nawamchema Yeloboamu, hamba Yeloboamu hamwe na Waisilaeli weng'ha nawaluta kwa Lehoboamu, nawamlonjela, 4 "Mhaza wa hegwe nakatudwika ngwamo ng'hulu, lelo utupunguzile itunyo ali natwe tokukolela mijito." 5 Lehoboamu nakawedichila, "Mhiluche kwa heni kahi mazuwa gadatu hamba." Lelo wanhu awo nawaluta.

6 Hamba mndewa Lehoboamu nakagana utanzi kwa wasekulu wawele nawali womkolela mijito Solomoni, mhaza wa heye loyawele yang'hali mkomu. Nakawauza, "Ndaze, ndiwedichile ndaze wanhu awa?" 7 Wasekulu awo nawamwidichila, "Wone lehano kowa chitumagwa wa wanhu wano na kuwakolela mijito na kuwedichila goya, nawo wowa vitumagwa wa hegwe mazuwa gose." 8 Ila Lehoboamu nakagaleka majesa goyapegwe na wasekulu, nakaluta kuwauza wasongolo walingiwhana na heye wawele nawali womkolela mijito. 9 Nakawauza, "Mwangijesa ndaze? Tuwedichile ndaze wanhu wano walingundonjela, ‘Utupunguzile itunyo ali natwe tokukolela mijito.’ " 10 Wasongolo awo nawamwidichila, "Walonjele ahi wanhu awo wawele nawakulonjela, ‘Mhaza wa hegwe nakatudwika ngwamo ng'hulu, lelo utupunguzile itunyo ali,’ kota, ‘Chidole cha heni chidodo nachineneha kusinda chuno cha mhaza wa heni. 11 Mhaza wa heni nakawadwika hemwe ngwamo ng'hulu, ila heni ndowadwika ng'hulu kusinda yila. Mhaza wa heni nakawazapa hemwe kwa ng'weso za ngozi, ila heni ndowazapa kwa nyinje.’ "

12 Ahyo, zuwa lya kadatu Yeloboamu hamwe na wanhu weng'ha nawahiluka kwa mndewa Lehoboamu kota mndewa vyoyawalonjele. 13 Mndewa nakawedichila kwa lizi lya kung'ang'ala, nakagalema majesa goyapegwe na wasekulu, 14 nakawinza majesa ga wasongolo wayage na kulonga, "Mhaza wa heni nakawadwika hemwe ngwamo ng'hulu, ila heni ndowadwika ng'hulu kusinda yila. Mhaza wa heni nakawazapa hemwe kwa ng'weso za ngozi, ila heni ndowazapa kwa nyinje."

15 Ahyo, mndewa hawahulichize wala wanhu, kwa vila mbuli ayi nayambuzwa na Nguluwi, leka kweneza ulonzi uwele Mkulu Nguluwi nayali yamlonjele Yeloboamu, mwana wa Nebati, kukolela kwa Ahiya, Mshiloni. 16 Ila wanhu weng'ha wa nhanzi za kasikazini mwa Isilaeli vyowawene kota mndewa nakalema kuwahulichiza, nawamwidichila,

"Tuna uhalizi wachi kwa Daudi?

Twahela uhalizi kwa mwana wa Yese.

Mhiluche kaye, hemwe wanhu wa Isilaeli.

Uyamile ng'handa ya hegwe, gwa Daudi."

Ahyo, wanhu weng'ha wa Isilaeli nawahiluka kuli mihema ja hewo. 17 Ila Lehoboamu nakalutilila kuwalongoza wanhu wa Isilaeli wawele nawali wochikala kuli miji ja Yuda. 18 Mndewa Lehoboamu nakamlajiza Hadolamu, yawele nayali yowamilila wala walingukola mijito kwa lupichi, ila wanhu wa Isilaeli nawamtowa kwa maganga mbaka nakabagama. Mndewa Lehoboamu nakakwina himahima kuli mutuka wa heye na kubilimila Yelusalemu. 19 Ahyo wanhu weng'ha wa nhanzi za kasikazini mwa Isilaeli nawalibelenhuka ivyazi lya Daudi kulawa mhela wula.