1 Yotamu nayali na miyaka makumi meli na jihano loyaluche kulongoza, naye nakalongoza ako Yelusalemu kwa mhela wa miyaka kumi na sita. Mayake nayali yochemigwa Yelusha, mhinza wa Sadoki. 2 Nakadita ganojile hali Mkulu Nguluwi, kota vila Usiya, mhaza wa heye vyoyaditile, ila heye henjile kufunyiza ubani kuli ng'handa ya Mkulu Nguluwi. Wanhu nawali wang'hali wolutilila kudita wihe. 3 Yotamu nakazenga kahi Lwizi lwa Kuchanya lwa ng'handa ya Mkulu Nguluwi na kukola mijito minji kuli lukanzi hali honhu ha muji wa Yelusalemu halinguchemigwa Ofeli. 4 Nakazenga miji kuli vidunda vya Yuda na ako kisolo nakazenga ngome na milingo. 5 Hamba Yotamu naketowa ngondo na mndewa wa Waamoni na kumsumya. Kuli mwaka awo Waamoni nawamha Yotamu kilo elufu zidatu na miya zine (3,400) za sendi na lita milioni mbili na lachi mbili (2,200,000) za ngano na lita milioni mbili na lachi mbili (2,200,000) za shayili. Waamoni nawalutilila kumigalila vinhu avyo kuli mwaka wa keli na wa kadatu. 6 Mndewa Yotamu nakalutilila kuwa na mong'ho, kwa vila nakekala kwa kumhulichiza Mkulu Nguluwi, Nguluwi wa heye. 7 Madito ganji ga ulongozi wa Yotamu na ngondo za heye zeng'ha na mbuli zinji zoyaziditile, navyandichigwa kuli chitabu cha kukumbuchila kwa wandewa wa Isilaeli na wa Yuda. 8 Yotamu nayali na miyaka makumi meli na jihano loyaluche kulongoza, naye nakalongoza ako Yelusalemu kwa miyaka kumi na sita. 9 Yotamu nakabagama na nakatiligwa kuli muji wa Daudi. Naye Ahasi, mwanage, nakalongoza honhu ha heye.