1 Hesekiya nayali na miyaka makumi meli na jihano loyaluche kulongoza, nakalongoza ako Yelusalemu kwa miyaka makumi meli na tisa. Mayake nayali yochemigwa Abiya, mhinza wa Sekaliya. 2 Nakadita ganojile hali Mkulu Nguluwi, kota vyoyaditile Daudi, sekulu wa heye.

3 Mndewa Hesekiya nakachumula lwizi ja ng'handa ya Mkulu Nguluwi na kuzenga kahi lwizi alyo kuli mwezi wa mwaluko wa mwaka wa mwaluko wa ulongozi wa heye. 4 Nakawenjiza watambika na Walawi mgati mwa ng'handa ayo, hamba nakawakungajiza hamwe kuli lugagala kuli ubanzi wa kolilawilaga isanya, 5 nakawalonjela, "Mnyhulichize hemwe Walawi! Miyelize na muyelize ng'handa ya Mkulu Nguluwi, Nguluwi wa wasekulu wa hemwe. Mlavye wavu weng'ha uwele kuli honhu helile. 6 Wahaza wa hetwe hawawele wa kukundigwa, nawadita wihe hali Mkulu Nguluwi, Nguluwi wa hetwe na kumleka. Nawahinduchila kumeho kwa hewo kutali na kuhawichila chigosi haluga ha Mkulu Nguluwi. 7 Nawahinda lwizi ja chituka cha ng'handa ya Nguluwi na kuzima vyenje vyake. Hawafunyhize ubani ne kulavya nhambiko yoneche ya kulakazwa hali honhu helile ha Nguluwi wa Isilaeli. 8 Kwa chiwalo achi, Mkulu Nguluwi nakawazudila ng'hatu wanhu wa Yuda na wa Yelusalemu na gala goyawaditile nagawabubuwaza na kuwadumbiza wanhu weng'ha. Aga geng'ha namgona kwa meho ga hemwe. 9 Kwa chiwalo acho, wahaza wa hetwe nawakopoligwa kuli ngondo, nawo wana wa hetwe na wahinza wa hetwe na wache wa hetwe nawaditigwa wawe wapogozi. 10 Lelo nanuwila ng'hatu kuwika ilagano na Mkulu Nguluwi, Nguluwi wa Isilaeli, leka yaleche kutuzudila lukami. 11 Lelo wang'holozangu Walawi, mleche kuibeza mbuli ayi, kwa vila Mkulu Nguluwi nakawahagula hemwe leka mwime hali heye na kumkolela mijito. Mkawalongoze wanhu wa heye kuli kumfugamila na kumfunyizila ubani."

12 Walawi wano nawaluka mijito. Kulawa lukolo lwa Kohati, nawali Mahati, mwana wa Amasayi na Yoeli, mwana wa Asaliya. Kulawa kuli lukolo lwa Melali, nawali Kishi, mwana wa Abidi na Asaliya, mwana wa Yehaleli na kulawa kuli lukolo lwa Gelishoni, nayali Yowa mwana wa Sima na Edeni, mwana wa Yowa. 13 Kulawa kuli lukolo lwa Elisafani nawali, Shimuli na Yeieli na kulawa kuli lukolo lwa Asafu, nawali Sekaliya na Mataniya. 14 Kulawa kuli lukolo lwa Hemani, nawali Yehieli na Shimeyi na kulawa kuli lukolo lwa Yedutuni, nawali Shemaya na Usieli.

15 Vilongozi awo nawawakungajiza hamwe Walawi wanji na kiyeliza. Hamba nawaluka kuyeliza ng'handa ya Nguluwi kwa kuwinza malajizo ga Mkulu Nguluwi, kota mndewa Hesekiya vyoyalajize. 16 Watambika nawenjila kuli ng'handa ya Mkulu Nguluwi leka kuheliza. Nawosa ukokomoche weng'ha uwele nawaufika kuli ng'handa ya Mkulu Nguluwi na kuuwika kuli lugagala. Hamba Walawi nawauhola na kuuhilika kuli Ibindi lya Kidiloni.

17 Nawaluka mijito ajo ja kuyeliza ng'handa ya Nguluwi kuli zuwa lya mwaluko lya mwezi wa mwaluko mbaka kuli zuwa ya nane lya mwezi awo nawali wafichile hali chituka cha ng'handa ya Mkulu Nguluwi. Nawalutilila na mijito ajo kwa mazuwa ganji nane, ahyo kwa mazuwa kumi na sita ga mwezi wuwo wa mwaluko nawasinda mijito ajo.

18 Hamba, Walawi nawaluta kwa mndewa Hesekiya na kumlonjela, "Natuyeliza ng'handa ya Mkulu Nguluwi yeng'ha na honhu ha kulavila nhambiko za kulakazwa hamwe na vinhu vyake vyeng'ha na chisaga cha mibumunda jiwichigwe chiuyeng'ha hamwe na vinhu vyake vyeng'ha. 19 Natuviwika goya na kuvyeliza vinhu vyeng'ha viwele mndewa Ahasi nayali yavilavile loyawele mndewa, loyambelenhuche Nguluwi. Lelo vinhu avyo vya hali honhu ha kulavila nhambiko ha Mkulu Nguluwi."

20 Mndewa Hesekiya nakenuka lufuku na kuwakungajiza vilongozi wa muji, nakaluta nawo kuli ng'handa ya Mkulu Nguluwi. 21 Nawegala mibuguma saba na ming'holo milume saba na ming'holo myana milume saba na mipongo saba leka jiwe nhambiko ya kusa gehile kwa chiwalo cha ivyazi lya chiundewa na kwa chiwalo cha honhu helile na kwa chiwalo cha wanhu wa Yuda. Mndewa nakawalajiza watambika wawele ndo walelwa wa Aluni, wajilavye nhambiko migongolo ajo mchanya mwa honhu ha kulavila nhambiko ha Mkulu Nguluwi. 22 Watambika nawajidumula singo jila mibuguma, nawaihola danda na kumizila mchanya mwa honhu ha kulavila nhambiko, hamba nawajidumula singo jila ming'holo milume saba na kumizila danda ya ming'holo ajo kuli honhu ha kulavila nhambiko. Kahi nawajidumula singo jila ming'holo myana saba na kumizila danda kuli honhu ha kulavila nhambiko. 23 Jila mipongo jiwele najali kwa chiwalo cha nhambiko ja kusa gehile najigaligwa hali mndewa na wanhu weng'ha wawele aho nawawika moko ga hewo mchanya mwa mipongo ajo. 24 Watambika nawajidumula singo mipongo ajo na kubohola danda mchanya mwa honhu ha kulavila nhambiko kwa chiwalo cha nhambiko ya gehile leka kudita uhanyisi kwa chiwalo cha Waisilaeli weng'ha, kwa vila mndewa nayali yalajize nhambiko ayo ya kulakazwa na yila nhambiko ya gehile zilavigwe kwa chiwalo cha Waisilaeli weng'ha.

25 Mndewa Hesekiya nakawawika Walawi kuli ng'handa ya Nguluwi wawele na matowazi na ving'weleng'wele na migombogombo kota vyoilajizwe na Daudi na Gadi, mloli wa mndewa na mloli Natani, kwa vila mbuli ayi nayali ilajizwe na Mkulu Nguluwi kwa kukolela waloli wa heye. 26 Ahyo, Walawi nawema wawele na vinhu vya muzichi vya Daudi na watambika nawali wemile wawele na mhalamhanda za hewo. 27 Hesekiya nakalajiza nhambiko ya kulakazwa ilavigwe hali honhu ha kulavila nhambiko. Vyowaluche kulavya ayo nhambiko, wanhu nawaluka kumwimbila Mkulu Nguluwi kwa mhalamhanda na vinhu vya muzichi vya Daudi, mndewa wa Isilaeli. 28 Wanhu weng'ha nawali hamwe kuli kumfugamila Mkulu Nguluwi. Walingwimba nawalutilila kwimba na walingupemba mhalamhanda nawalutilila kupemba mhalamhanda mbaka mijito geng'ha ja kulavya nhambiko ya kulakazwa lojimalile. 29 Lowasindile kulavya nhambiko, mndewa Hesekiya na wanhu weng'ha wawele hamwe na heye, nawenamiza na kumfugamila Mkulu Nguluwi. 30 Mndewa Hesekiya na vilongozi wa heye nawawalajiza Walawi wamtogole Mkulu Nguluwi kwa nzimbo za mndewa Daudi na za mloli Asafu. Lelo wanhu weng'ha nawamtogola Nguluwi kwa kusangalala na kumfugamila.

31 Hamba Hesekiya nakawalonjela wanhu, "Lelo namiyeliza kwa Mkulu Nguluwi. Muye migale nhambiko za kulonga malumbo na nhambiko zinji kuli ng'handa ya Mkulu Nguluwi." Ahyo wanhu nawegala nhambiko za hewo za kulonga malumbo na wanhu wanji weng'ha nawegala nhambiko za kulakazwa kwa kunuwila kwa hewo. 32 Hisabu ya nhambiko za kulakazwa ziwele nazigaligwa na wanhu nazali mibuguma makumi saba (70) na ming'holo milume miya imwe (100) na ming'holo myana miya mbili (200). Migongolo ajo jeng'ha najali kwa chiwalo cha nhambiko za kulakazwa kwa Mkulu Nguluwi. 33 Misenga jiwichigwe chiuyeng'ha kwa chiwalo cha nhambiko ya kulakazwa najali mibuguma miya sita (600), hamwe na ming'holo na mhene elufu zidatu (3,000). 34 Watambika nawali wachefu kuweza kuwambula migozi ja migongolo jila ja nhambiko ya kulakazwa, lelo wang'holozawo Walawi nawawatanza mijito ajo mbaka nawasinda na mbaka watambika wanji lowelizwe, kwa vila Walawi nawekangaza ng'hatu kiyeliza kusinda vyowawele watambika. 35 Nakwali na nhambiko nyinji za kulakazwa, hamwe na mafuta ga migongolo ja nhambiko za kikala goya na nhambiko za vyakunwa, ziwele nazali hamwe na nhambiko za kulakazwa. Lelo mijito ja ng'handa ya Mkulu Nguluwi najaluchizwa kahi. 36 Mndewa Hesekiya na wanhu weng'ha nawasangalala kwa chiwalo cha mbuli iwele Nguluwi nakawaditila wanhu, kwa vila mbuli ayo nailawila baho du.