1 Kuli mwaka wa saba, mtambika Yehoyada nakalajila mong'ho wa heye. Nakadita ilagano na wakulu wa wamizi miya imwe, wawele ndo Asaliya, mwana wa Yeholamu na Ishimaeli, mwana wa Yehohanani na Asaliya, mwana wa Obedi na Maaseya, mwana wa Adaya na Elishafati, mwana wa Sikili. 2 Nawazunguluta kuli miji jeng'ha ja Yuda wowakungajiza Walawi na vilongozi wa nhanzi za Isilaeli. Lowafichile Yelusalemu, 3 nhing'hano yeng'ha naidita ilagano na mndewa kuli ng'handa ya Nguluwi. Yehoyada nakawalonjela, "Lole, Mwana wa mndewa kolongoza, kota Mkulu Nguluwi vyoyalagane kuwala lulelo lwa Daudi. 4 Ahi ndo vyomlinguganigwa kudita. Honhu hamwe ha kadatu ha hemwe watambika na Walawi, mlingwinjila kwa kuwalila kuli zuwa lya Kwesela, mokwamila lwizi 5 na imwe ya kadatu yinji mokwamila kuli ng'handa ya mndewa na imwe ya kadatu isigale, mowa kuli Lwizi lwa Msisi. Wanhu wanji weng'ha mowa mgati mwa lugagala lwa ng'handa ya Mkulu Nguluwi. 6 Munhu yoneche yaleche kwinjila kuli ng'handa ya Mkulu Nguluwi ila watambika na wala Walawi wawele wowa wokola mijito amo zuwa alyo. Awo woweza kwinjila kwa vila hewo ndo welile, ila wanhu wanji weng'ha, wokwamila chila chowalajizwe na Mkulu Nguluwi. 7 Walawi mumzungulute mndewa kuno chila yumwe yawele na vinhu vya heye vya kitowela ngondo. Yoneche yawele kokwinjila kuli ng'handa ya Mkulu Nguluwi, kanguganigwa kukopoligwa. Muwe hamwe na mndewa honeche hoyoluta."

8 Walawi na Wayuda weng'ha nawadita kota vyowalajizwe na mtambika Yehoyada. Chila yumwe nakawahola wanhu wa heye, wala wawele nawali wokwinjila kwa kiwalila kuli zuwa lya Kwesela na wala wawele nawali woluta kwesela, kwa vila mtambika Yehoyada nayali hawakundize wanhu woche. 9 Mtambika Yehoyada nakawapa wala wakulu wa vilundo migoha na ngawo ndodo na ng'hulu, viwele navyali vya mndewa Daudi, viwele navyali mgati mwa ng'handa ya Nguluwi.

10 Hamba nakawawika goya wamizi weng'ha kumwamila mndewa, chila yumwe yawele na vinhu vya heye vya kitowela ngondo mmoko mwake, habehi na honhu ha kulavila nhambiko na ng'handa ya Nguluwi, kwaluchila ubanzi wa kusini mbaka ubanzi wa kasikazini mwa ng'handa ya Nguluwi. 11 Hamba Yehoyada na mwanage nawamlavya mgati Yoashi, mwana wa mndewa na kumvaliza kofia ya chiundewa na kumha kalatasi ya ilagano na kumuwikula kota heye ndo mndewa. Yehoyada na mwanage nawambakaliza mafuta na kutowa iyowe wolonga, "Mndewa yekale kwa mhela winji!"

12 Ataliya loyahuliche iyowe lya wanhu wobilima na kumtogola mndewa, nakaluta kwa wala wanhu hala kuli ng'handa ya Mkulu Nguluwi. 13 Nakalola na kumona mndewa yemile habehi na izengo lya heye kuli lwizi. Vilongozi na wapemba mhalamhanda nawali hafungo ha mndewa na wanhu weng'ha wotowa luchenze na kupemba mhalamhanda na walingwimba wawele na vinhu vya hewo vya kwimbila wolongoza nzimbo za kutogola. Ahyo Ataliya nakadadula mivalo ja heye na kulila, "Kubelenhuka! Kubelenhuka!"

14 Hamba mtambika Yehoyada nakawalajiza wakulu wa vilundo vya wamizi yowalonjela, "Mumhiliche kunze hagati ha wamizi na mumkopole kwa ipanga munhu yoneche yalingumuwinza." Kwa vila mtambika nayali yalonjile, "Mleche kumkopola yawele mgati mwa ng'handa ya Mkulu Nguluwi."

15 Ahyo nawamibata Ataliya na lowafichile hali lwizi lwa falasi kuli ng'handa ya mndewa, nawamkopola aho.

16 Yehoyada nakadita ilagano kota heye na wanhu weng'ha na mndewa, wowa wanhu wa Mkulu Nguluwi. 17 Hamba wanhu weng'ha nawaluta kuli ng'handa ya Baali na kuibomola. Nawahabomola honhu ha kulavila nhambiko na jimalukolo na kumkopola Matani, mtambika wa Baali hali aho honhu ha kulavila nhambiko. 18 Hamba mtambika Yehoyada nakawawika vilongozi wa kuilolela ng'handa ya Mkulu Nguluwi hali ulolezi wa watambika, wawele ndo Walawi, wawele mndewa Daudi nayali yawawichile leka kukola mijito kuli ng'handa ya Mkulu Nguluwi kwa chiwalo cha kulavya nhambiko za kulakazwa za Mkulu Nguluwi kota vyoyandichigwe kuli malajizo ga Musa, wotowa luchenze na kwimba kwa kuwinza malajizo ga Daudi. 19 Nakawawika kahi wamizi hali lwizi lwa ng'handa ya Mkulu Nguluwi leka munhu yoneche yakokomoche yaleche kwinjila.

20 Nakawahola wakulu wa wamizi miya imwe na wakulu na vilongozi wa wanhu na wanhu weng'ha wa isi, nawamhola mndewa kulawa kuli ng'handa ya Mkulu Nguluwi na kumhilika kuli ng'handa ya mndewa, kuno wokolela nzila ya lwizi lwa kuchanya ilinguluta kuli ng'handa ya mndewa na kumdita mndewa yakalise kuli chigoda cha undewa. 21 Ahyo, wanhu weng'ha wa isi nawasangalala. Muji nausindamala kwa vila Ataliya nayali yakopoligwe kwa ipanga.