1 Yehoshafati, mndewa wa Yuda, nakahiluka kwa kikala goya kuli ng'handa ya chiundewa ako Yelusalemu. 2 Mlaguzi Yehu, mwana wa Hanani, nakaluta kumbochela mndewa Yehoshafati, nakamlonjela, "Ndaze, kwangona ndo mbuli inojile kuwatanza wehile na kuwagana wala walingumzudila Mkulu Nguluwi? Kwa chiwalo cha mbuli ayi, Mkulu Nguluwi kangukuzudila. 3 Ila, hana ganojile nagoneka kwa hegwe, kwa vila nakusa kuli isi jimalukolo jeng'ha ja mizengo ja jimalukolo ja Ashela na nakumpala ng'hatu Nguluwi kwa nhumbula ya hegwe yeng'ha."

4 Hanga mndewa Yehoshafati nakekala ako Yelusalemu, nakawajendelaga wanhu wa Beeli-sheba ya kusini mbaka kuli isi ya vidunda vya Efulaimu ubanzi wa kasikazini. Nakadita ahyo leka kuwadedeza wanhu wamhiluchile Mkulu Nguluwi, Nguluwi wa wasekulu wa hewo. 5 Nakahagula na kuwika watagusa kuli miji jeng'ha jiwele na ngome kuli isi ya Yuda. 6 Nakawalonjela, "Milolele ng'hatu homtagusa, kwa vila hamlingutagusa kwa chiwalo cha munhu, ila kwa chiwalo cha Mkulu Nguluwi, yawele ka hamwe na hemwe chila homtagusa. 7 Lelo, mumdumbe Mkulu Nguluwi. Milolele homtagusa, kwa vila kwa Mkulu Nguluwi wa hetwe haduhu mbuli ilihela hachi ne uganililo ne kubochela chinhu kwa chiwalo cha kwajiliza hachi."

8 Kuli muji wa Yelusalemu, Yehoshafati nakawawika Walawi wamwenga na watambika na wakulu wa ivyazi lya Waisilaeli, leka wawe wotagusa kwa chiwalo cha Mkulu Nguluwi na kwamula kilewa. 9 Nakawalajiza yolonga, "Mkole mijito kwa kumdumba Mkulu Nguluwi na kwa kukundigwa na kwa nhumbula za hemwe zeng'ha. 10 Kuli chila mbuli iwele yowafichila hemwe ilinguwawala wenyeng'haye wa hemwe, wone mbuli ayo iwe ya kukopola ama mbuli ziyage zilinguwala malajizo ama utaguso ama mizilo, mwanguganigwa kuwakanya leka waleche kwinjila kuli nongwa hali Mkulu Nguluwi. Wone haiwa ahyo, kuzudila kwa Mkulu Nguluwi kowafika hemwe na wenyeng'haye wa hemwe. Mdite ahyo, namwe mowa mlihela nongwa. 11 Amaliya, mtambika mkulu, kowa chilongozi wa hemwe kuli mbuli yoneche kuwala Mkulu Nguluwi na Sebadiya, mwana wa Ishimaeli, chilongozi wa Yuda, kowa chilongozi wa hemwe kuli mbuli yoneche ilingumuwala mndewa na Walawi wowa wokola mijito kota vilongozi hali hemwe. Mikangaze kudita mbuli azo, kwa vila Mkulu Nguluwi kowa hamwe na wala walingudita ganojile."