1 Wanhu wa Yuda nawamhola Yehoahasi, mwana wa Yosiya na kumuwika yawe mndewa honhu ha mhaza wa heye ako Yelusalemu. 2 Yehoahasi nayali na miyaka makumi meli na gadatu (23) loyaluche kulongoza. Nakalongoza ako Yelusalemu kwa myezi jidatu. 3 Hamba mndewa wa Misili nakamusa kuli ulongozi ako Yelusalemu. Nakailajiza isi ya Yuda ilavye kodi, kilo elufu zidatu na miya zine (3,400) za sendi na kilo makumi gadatu na zine (34) za zahabu. 4 Falao Neko, mndewa wa Misili, nakamdita Eliyakimu, mng'holoze Yehoahasi yawe mndewa wa Yuda na Yelusalemu na nakaligalula itagwa lya heye, kulawa Eliyakimu na kuwa Yehoyakimu. Hamba Falao Neko nakamhola Yehoahasi na kumhilika Misili.

5 Yehoyakimu nayali na miyaka makumi meli na jihano (25) loyaluche kulongoza. Nakalongoza ako Yelusalemu kwa mhela wa miyaka kumi na umwe. Nakadita wihe hali Mkulu Nguluwi, Nguluwi wa heye. 6 Nebukadinesa, mndewa wa Babuloni, nakaivaba isi ya Yuda na kumuwopa Yehoyakimu kwa pingu za shaba na kumhilika Babuloni. 7 Nebukadinesa kahi nakahola vinhu vimwenga vya kuli ng'handa ya Mkulu Nguluwi nakavihilika Babuloni na kuviwika kuli ng'handa ya heye ya chiundewa, ako Babuloni. 8 Mbuli zinji za madito ga Yehoyakimu, hamwe na mazudizo na geng'ha goyaditile na ganji gawele nagoneka kwa heye, nagandichigwa kuli chitabu cha kukumbuchila kwa wandewa wa Isilaeli na wa Yuda. Yehoyakini, mwanage, nakalongoza honhu ha heye.

9 Yehoyakini nayali na miyaka kumi na nane loyaluche kulongoza. Nakalongoza ako Yelusalemu kwa mhela wa myezi jidatu na mazuwa kumi. Nakadita wihe hali Mkulu Nguluwi. 10 Mwaka loumalile, mndewa Nebukadinesa nakalajiza wasenga, nawamhola Yehoyakini na kumhilika Babuloni, hamwe na vinhu vya sendi nyinji kulawa kuli ng'handa ya Mkulu Nguluwi. Nakamuwika Sedekiya, mng'holoze Yehoyakimu, yawe mndewa wa Yuda na Yelusalemu.

11 Sedekiya nayali na miyaka makumi meli na umwe loyaluche kulongoza. Nakalongoza ako Yelusalemu kwa mhela wa miyaka kumi na umwe. 12 Nakadita wihe hali Mkulu Nguluwi, Nguluwi wa heye, haganile kinyenyeteza hali mloli Yelemiya, yawele nakalonga ulonzi ulawile kwa Mkulu Nguluwi.

13 Sedekiya kahi nakambelenhuka mndewa Nebukadinesa, yawele nayali yamditile yelahe kwa itagwa lya Nguluwi kota hombelenhuka. Nayali na nhumbula igagadale, nakalema kumgalamchila Mkulu Nguluwi, Nguluwi wa Isilaeli. 14 Mbaka watambika na vilongozi wa Yuda, hamwe na wanhu walihela kukundigwa ng'hatu nawali wowinza madito geng'ha ga kuzudiza ga wanhu wa isi zinji, nawaidita ng'handa ya Mkulu Nguluwi iwe ikokomoche, iwele heye yuye Mkulu Nguluwi nayali yaiditile iwe yelile ako Yelusalemu. 15 Mkulu Nguluwi, Nguluwi wa wasekulu wa hewo, nakawahilichila ulonzi kwa kukolela wasenga wa heye chila mhela, kwa vila nayali na isungu kwa wanhu wa heye na haluga hake. 16 Ila hewo nawalutilila kuwabeza wasenga wa Nguluwi, nawaubeza ulonzi wa heye na kuwaseka waloli wa heye mbaka kuzudila kwa Mkulu Nguluwi nakwali kukulu kwa wanhu wa heye mbaka hakuwele na nzila yoneche yila ya kukudita kuzudila ako kusindamale. 17 Ahyo, Mkulu Nguluwi nakamigala mndewa wa Babuloni yawele nakawadumya wasongolo wa hewo kwa ipanga mbaka hagati ha honhu helile, hamlechile ne msongolo ne mhinza ne sekulu. Mkulu Nguluwi nakawawika weng'ha mmoko mwa Nebukadinesa. 18 Nakavihola vinhu vyeng'ha vya ng'handa ya Nguluwi vikulu na vidodo na ng'hano za ng'handa ya Mkulu Nguluwi na ng'hano za mndewa na ng'hano za vilongozi wa heye, vyeng'ha nakavihilika Babuloni. 19 Nakalakaza ng'handa ya Nguluwi na kuzibomola ng'hanzi za muji wa Yelusalemu na kulakaza ng'handa zeng'ha za chiundewa na kuwifyanga vinhu vyake vyeng'ha vya sendi nyinji. 20 Wanhu wasigale kuli kukopoligwa kuli ngondo nawaholigwa na kuhilikwa kuli isi ya chijenzi ako Babuloni. Ako nawali wakola mijito wa heye na wakola mijito wa walelwa wa heye mbaka mwaluko wa undewa wa Pelisiya. 21 Isi nailutilila kusangalala kwa chiwalo cha mazuwa ga Kwesela, kwa mhela weng'ha wa kuditigwa kwake uchiwa nayesela mbaka miyaka makumi saba (70) logenele, leka kweneza ulonzi wa Mkulu Nguluwi uwele naulonjigwa na mloli Yelemiya.

22 Kuli mwaka wa mwaluko wa ulongozi wa Koleshi, mndewa wa Pelisiya, leka kweneza ulonzi wa Mkulu Nguluwi woyaulonjile kwa nzila ya mloli Yelemiya, Mkulu Nguluwi nakaidita nhumbula ya Koleshi, mndewa wa Pelisiya, kuwikula mbuli ayo kuli honhu ha heye heng'ha kwa kuwichigwa kuli maandiko, 23 "Ahi ndo vyoyalingulonga Koleshi, mndewa wa Pelisiya, ‘Mkulu Nguluwi, Nguluwi wa kilanga, nakamha heni undewa wa isi zeng'ha na nakandajiza ndimzenjele ng'handa ako Yelusalemu, kuli Yuda. Lelo chila munhu hali hemwe mweng'ha muwele ndo wanhu wa heye Mkulu Nguluwi, yalute Yelusalemu ako Yuda. Mkulu Nguluwi, Nguluwi wa hemwe, yawe hamwe na hemwe.’ "