1 Kuli mwaka wa mwaluko wa ulongozi wa Koleshi, mndewa wa Pelisiya, Mkulu Nguluwi nakamdita Koleshi, mndewa wa Pelisiya, yawikule mbuli ayi kuli undewa wa heye na kuuwika kuli maandiko, leka kweneza ulonzi wa Mkulu Nguluwi woyaulonjile kwa nzila ya mloli Yelemiya.

2 Ahi ndo vyoyalingulonga Koleshi, mndewa wa Pelisiya, "Mkulu Nguluwi, Nguluwi wa kilanga, nakamha heni undewa wa isi zeng'ha na nakandajiza ndimzenjele ng'handa Yelusalemu, kuli Yuda. 3 Lelo, chila munhu hali hemwe mweng'ha muwele ndo wanhu wa heye, yalute Yelusalemu ako Yuda na kuizenga kahi ng'handa ya Mkulu Nguluwi, Nguluwi wa Isilaeli, Nguluwi yalingufugamilwa ako Yelusalemu. Ndangulanda leka Nguluwi wa hemwe yawe hamwe na hemwe na kuwatanza homluta ako. 4 Chila yumwe yawele nakasigala mkomu kuli isi ya chijenzi, wone kogana utanzi wa kuhiluka kuli isi ya heye, walingikalasa habehi na heye wamtanze kwa kumha sendi na zahabu na lufufu na migongolo na nhambiko za kunuwila kwa chiwalo cha ng'handa ya Nguluwi ako Yelusalemu."

5 Lelo, vilongozi wa ng'holo za nhanzi za Yuda na Benjamini na watambika na Walawi na chila munhu yawele Nguluwi nakamha nhumbula ya kuluta kuzenga kahi ng'handa ya Mkulu Nguluwi, iwele Yelusalemu, weng'ha nawewika goya kuka. 6 Walingikalasa habehi na hewo nawawatanza wanhu awo kwa kuwapa vinhu vya sendi na vya zahabu na migongolo na vinhu viyage vya sendi nyinji, kuleka vila vilavigwe kwa kunuwila.

7 Mndewa Koleshi nakawahilusila vinhu viwele mndewa Nebukadinesa nayali yaviholile kulawa Yelusalemu kuli ng'handa ya Mkulu Nguluwi na kuviwika kuli ng'handa ya milungu ja heye. 8 Koleshi, mndewa wa Pelisiya, nakamha vinhu avyo Mitiledati, yalingulolela ng'hano, yawele nakaviwaza hali Sheshibasa, chilongozi wa Yuda. 9 Vinhu avyo navyali ndo visaye makumi gadatu (30) vya zahabu na visaye elufu imwe (1,000) vya sendi na vifunyizi makumi meli na tisa (29) 10 na visaye vidodo vya zahabu makumi gadatu (30) na visaye vidodo vya sendi miya zine na kumi (410) na vinhu viyage elufu imwe (1,000).

11 Vinhu vyeng'ha vya zahabu na sendi, hamwe na vinhu viyage, navyali elufu zihano na miya zine (5,400). Vinhu vyeng'ha avi Sheshibasa nakavihilika mbaka Yelusalemu, mhela uwele heye na wanhu wanji vyowalavigwe kulawa kuli isi ya chijenzi ako Babuloni, kuluta Yelusalemu.