1 Lelo, awa ndo wanhu wa mkowa wawele nawahiluka kulawa kuli isi ya chijenzi, wawele Nebukadinesa, mndewa wa Babuloni nayali yawahiliche kwa lupichi ako Babuloni. Nawahiluka Yelusalemu na Yuda, chila munhu kuli muji wa heye. 2 Vilongozi wa hewo nawali Selubabeli na Yeshuwa na Nehemiya na Selaya na Leelaya na Molidekayi na Bilishani na Misipali na Bigwayi na Lehumu na Baana. Ilinguya ndo hisabu ya wanhu weng'ha wa ng'holo za Isilaeli wawele nawahiluka kulawa kuli isi ya chijenzi. 3 Kulawa kuli lukolo lwa Paloshi, nawali elufu mbili na miya imwe na makumi saba na weli (2,172) 4 na kulawa kuli lukolo lwa Shefatiya, nawali miya zidatu na makumi saba na weli (372) 5 na kulawa kuli lukolo lwa Ala, nawali miya saba na makumi saba na wahano (775) 6 na kulawa kuli lukolo lwa Pahati-moabu, wawele ndo walelwa wa Yeshuwa na Yoabu, nawali elufu mbili na miya nane na kumi na weli (2,812) 7 na kulawa kuli lukolo lwa Elamu, nawali elufu imwe na miya mbili na makumi gahano na wane (1,254) 8 na kulawa kuli lukolo lwa Satu, nawali miya tisa na makumi gane na wahano (945) 9 na kulawa kuli lukolo lwa Sakayi, nawali miya saba na makumi sita (760). 10 Kulawa kuli lukolo lwa Bani, nawali miya sita na makumi gane na weli (642) 11 na kulawa kuli lukolo lwa Bebayi, nawali miya sita na makumi meli na wadatu (623) 12 na kulawa kuli lukolo lwa Asigadi, nawali elufu imwe na miya mbili na makumi meli na weli (1,222) 13 na kulawa kuli lukolo lwa Adonikamu, nawali miya sita na makumi sita na sita (666) 14 na kulawa kuli lukolo lwa Bigwayi, nawali elufu mbili na makumi gahano na sita (2,056) 15 na kulawa kuli lukolo lwa Adini, nawali miya zine na makumi gahano na wane (454). 16 Kulawa kuli lukolo lwa Ateli, yawele nakalawa kuli ivyazi lya Hesekiya, nawali makumi tisa na nane (98) 17 na kulawa kuli lukolo lwa Besayi, nawali miya zidatu na makumi meli na wadatu (323) 18 na kulawa kuli lukolo lwa Yola, nawali miya imwe na kumi na weli (112) 19 na kulawa kuli lukolo lwa Hashumu, nawali miya mbili na makumi meli na wadatu (223) 20 na kulawa kuli lukolo lwa Gibali, nawali makumi tisa na wahano (95).

21 Wanhu wa muji wa Betelehemu, nawali miya imwe na makumi meli na wadatu (123) 22 na wa muji wa Netofahi, nawali makumi gahano na sita (56) 23 na wa muji wa Anatoti, nawali miya imwe na makumi meli na nane (128) 24 na wa muji wa Asimaweti, nawali makumi gane na weli (42) 25 na wa miji ja Kiliati-yealimu na Kefila na Beeloti, nawali miya saba na makumi gane na wadatu (743). 26 Wanhu wa miji ja Lama na Geba, nawali miya sita na makumi meli na yumwe (621) 27 na wa muji wa Mikimashi, nawali miya imwe na makumi meli na weli (122) 28 na wa miji ja Beteli na Ayi, nawali miya mbili na makumi meli na wadatu (223) 29 na wa muji wa Nebo, nawali makumi gahano na weli (52) 30 na wa muji wa Magibishi, nawali miya imwe na makumi gahano na sita (156). 31 Wanhu wa muji wa Elamu yinji, nawali elufu imwe na miya mbili na makumi gahano na wane (1,254) 32 na wa muji wa Halimu, nawali miya zidatu na makumi meli (320) 33 na wa miji ja Lodi na Hadidi na Ono, nawali miya saba na makumi meli na wahano (725) 34 na wa muji wa Yeliko, nawali miya zidatu na makumi gane na wahano (345) 35 na wa muji wa Senaa, nawali elufu zidatu na miya sita na makumi gadatu (3,630).

36 Ayi ndo hisabu ya watambika wawele nawahiluka kulawa kuli isi ya chijenzi. Watambika wa lukolo lwa Yedaya, wawele ndo walelwa wa Yeshuwa, nawali miya tisa na makumi saba na wadatu (973) 37 na wa lukolo lwa Imeli, nawali elufu imwe na makumi gahano na weli (1,052) 38 na wa lukolo lwa Pashuli, nawali elufu imwe na miya mbili na makumi gane na saba (1,247) 39 na wa lukolo lwa Halimu, nawali elufu imwe na kumi na saba (1,017).

40 Ayi ndo hisabu ya Walawi wawele nawahiluka kulawa kuli isi ya chijenzi. Kulawa kuli lulelo lwa Yeshuwa na lwa Kadimieli, wa lulelo lwa Hodaviya, nawali makumi saba na wane (74). 41 Walingwimba, wawele ndo walelwa wa Asafu, nawali miya imwe na makumi meli na nane (128). 42 Wamizi wa lwizi lwa ng'handa ya Nguluwi, wawele ndo walelwa wa Shalumu na wa Ateli na wa Talimoni na wa Akubu na wa Hatita na wa Shobayi, nawali miya imwe na makumi gadatu na tisa (139).

43 Vitumagwa wa ng'handa ya Nguluwi wawele nawahiluka kulawa kuli isi ya chijenzi, nawalawa kuli lulelo lwa Siha na lwa Hasufa na lwa Tabaoti 44 na lulelo lwa Kelosi na lwa Siaha na lwa Padoni 45 na lwa Lebana na lwa Hagaba na lwa Akubu 46 na lwa Hagabu na lwa Shamulayi na lwa Hanani 47 na lwa Gideli na lwa Gahali na lwa Leaya 48 na lwa Lesini na lwa Nekoda na lwa Gasamu 49 na lwa Usa na lwa Paseya na lwa Besayi 50 na lwa Asina na lwa Meunimu na lwa Nefisimu 51 na lwa Bakibuki na lwa Hakufa na lwa Halihuli 52 na lwa Basiluti na lwa Mehida na lwa Halisha 53 na lwa Balikosi na lwa Sisela na lwa Tema 54 na lwa Nesiya na lwa Hatifa.

55 Vitumagwa wa Solomoni wawele nawahiluka kulawa kuli isi ya chijenzi, nawalawa kuli lulelo lwa Sotayi na Hasofeleti na lwa Peluda 56 na lwa Yaala na lwa Dalikoni na lwa Gideli 57 na lwa Shefatiya na lwa Hatili na lwa Pokeleti-hasebaimu na lwa Ami.

58 Vitumagwa weng'ha wa ng'handa ya Nguluwi na walelwa wa vitumagwa wa Solomoni wawele nawahiluka kulawa kuli isi ya chijenzi, nawali wanhu miya zidatu na makumi tisa na weli (392). 59 Wanhu wa miji ja Teli-mela na Teli-halisha na Kelubu na Adani na Imeli, nawo nawahiluka, ila hawawezile kutawiza kota nawali walelwa wa Waisilaeli. 60 Hewo nawali walelwa wa Delaya na wa Tobiya na wa Nekoda, weng'ha nawali wanhu miya sita na makumi gahano na weli (652). 61 Wanhu wa ng'holo za watambika kahi nawahiluka. Wanhu awo nawali kulawa kuli lukolo lwa Habaya na lwa Hakosi na lwa Balisilayi. Ayo Balisilayi nayali yamhesile mhinza wa Balisilayi wa Gileadi, ahyo nakamula kuhola itagwa lilyo, Balisilayi. 62 Awo nawapala hisabu ya hewo kuli kukumbuchila kwa vitabu vya ng'holo, ila hawoneche amo. Lelo hawakundizwe kuuhola utambika kwa vila nawoneka ndo wakokomoche. 63 Chilongozi wa mkowa nakawalonjela kota hawalingukundigwa kihanza kuli chilyo chelile ng'hatu, mbaka yawe baho mtambika yawele yoweza kulavya ulonzi wa Ulimu na Sumimu.

64 Wanhu weng'ha wawele nawahiluka kulawa kuli isi ya chijenzi, hisabu ya hewo nayali elufu makumi gane na mbili na miya zidatu na makumi sita (42,360), 65 kuleka awo, nakwali na vitumagwa walume na wadala elufu saba na miya zidatu na makumi gadatu na saba (7,337). Kahi nawali walingwimba miya mbili (200) walume na wadala. 66 Nawali na falasi miya saba na makumi gadatu na sita (736) na migongolo kota midogowi mikulu miya mbili na makumi gane na jihano (245) 67 na ngamiya miya zine na makumi gadatu na jihano (435) na midogowi elufu sita na miya saba na makumi meli (6,720).

68 Wanhu awo walawile kuli isi ya chijenzi, lowafichile kuli ng'handa ya Mkulu Nguluwi kuli muji wa Yelusalemu, vilongozi wamwenga wa ng'holo azo nawalavya ndolendole ya kunuwila kwa hewo wawo kwa chiwalo cha kutanza kuzenga kahi ng'handa ya Nguluwi. 69 Chila chilongozi nakalavya kota vyoyawezile kwa chiwalo cha mijito ajo. Hisabu ya ndolendole azo nayali kilo miya zihano (500) za zahabu na kilo elufu mbili na miya nane (2,800) za sendi na mivalo miya imwe (100) kwa chiwalo cha watambika. 70 Lelo, watambika na Walawi na wanhu wamwenga wanji nawaluka kikala mujini Yelusalemu na honhu hanji ha habehi na muji awo. Walingwimba na wamizi wa lwizi lwa ng'handa ya Nguluwi na vitumagwa wa ng'handa ya Nguluwi nawaluka kikala kuli miji ja hewo, Waisilaeli weng'ha nawekala kuli miji ja hewo.