1 Mhela awo waloli weli, wawele ndo Hagayi na Sekaliya mwana wa Ido, nawalavya uloli kwa itagwa lya Nguluwi wa Isilaeli, kwa Wayahudi wawele nawali wochikala ako Yuda na Yelusalemu. 2 Selubabeli, mwana wa Shealitieli na Yeshuwa, mwana wa Yosadaki, lowahuliche mbuli ayo nawaluka kuizenga kahi ng'handa ya Nguluwi ako Yelusalemu wotanzigwa na waloli wa Nguluwi.

3 Hamba Tatenayi, chilongozi wa mkowa wa kolizinjilaga isanya kwa Eyufulate na Shetali-bosenayi na wayawo, nawaluta Yelusalemu na kuuza, "Whaani yawalajize kuizenga kahi ng'handa ayi?" 4 Nawauza kahi, "Ndo wanhu wachi walinguzenga kahi ng'handa ayi? Twangugana kugazela matagwa ga hewo." 5 Ila Nguluwi nayali hamwe na vilongozi wa Wayahudi, ahyo vilongozi wa Daliyo hawawalemeze mbaka aho lowamwandichile baluwa mndewa Daliyo na kupegwa majesa ga heye. 6 Ayi ndo baluwa iwele Tatenayi na Shetali-bosenayi na wayawo, nawamwandichila mndewa Daliyo.

7 Mbuli yoyahilichilwe mndewa nayali kota hino, "Kwa mndewa Daliyo, kikala goya kuwe kwa hegwe. 8 Gwa mndewa, twangukuzelesa kota natuluta kuli mkowa wa Yuda kuli ng'handa ya Nguluwi Mkulu. Wanhu wanguizenga kahi ng'handa ayo kwa maganga makulu na kuwika mizengo ja migodi. Mijito ajo jangukoleka kwa kikangaza na himahima ng'hatu hali ulongozi wa hewo. 9 Natuwauza vilongozi wawo, ‘Whaani yawalajize kuizenga kahi ng'handa ayo nakuidita iwe kota vyoiwele aho hamwande?’ 10 Kahi natuwauza matagwa ga vilongozi wa hewo leka tukuzelese wala walingulongoza mijito ajo. 11 Nawatulonjela hino, ‘Hetwe ndo vitumagwa wa Nguluwi wa kilanga na muisi, twanguizenga kahi ng'handa iwele naizenjigwa na mndewa yumwe, yawele ndo mkulu wa Isilaeli, miyaka minji jikolile. 12 Ila kwa vila wasekulu wa hetwe nawamzudiza Nguluwi wa kilanga, heye nakawawika mmoko mwa Nebukadinesa, mndewa wa Babuloni, yawele nakaiwifya ng'handa ayi na kuwahilika wanhu kuli isi ya chijenzi ako Babuloni. 13 Ila kuli mwaka wa mwaluko wa ulongozi wa Koleshi, mndewa wa Babuloni, mndewa ayo nakalajiza ng'handa ya Nguluwi izenjigwe kahi. 14 Kahi nakavihilusa vinhu vya zahabu na vya sendi viwele mndewa Nebukadinesa nayali yaviholile kulawa kuli ng'handa ya Nguluwi ako Yelusalemu na kuviwika kuli ng'handa ya mlungu wa heye ako Babuloni. Vinhu avyo Koleshi nakamha Sheshibasa yawele nayali yamhagule leka yawe chilongozi wa Yuda, nakamlajiza 15 yavihole vinhu avyo na kuvihilusa kuli ng'handa ya Nguluwi ya Yelusalemu na kuizenga kahi ng'handa ya Nguluwi kuli honhu hake. 16 Ahyo Sheshibasa nakaluta na kuuzenga kahi msisi wa ng'handa ya Nguluwi kuli muji wa Yelusalemu. Mijito ja kuzenga kahi najilutilila ila wang'hali kusinda mijito ajo.’ 17 Gwa mndewa, wone konojezwa, ulajize upugajizi uditigwe kuli kukumbuchila kwa chiundewa ako mujini Babuloni, kota mndewa Koleshi nakalajiza ng'handa ya Nguluwi izenjigwe kahi mujini Yelusalemu. Hamba twangukulanda utuzelese choulingijesa kuwala mbuli ayi."