1 6 15 Hamba wang'honyo wa wanhu wa Yuda na wa Benjamini lowahuliche kota wanhu wawele nawahiluka kulawa kuli isi ya chijenzi wanguzenga kahi ng'handa ya Mkulu Nguluwi, Nguluwi wa Isilaeli, 2 nawaluta kwa Selubabeli na vilongozi wa ng'holo na kuwalonjela, "Dedede tilumbe kuli kuzenga ng'handa ya Nguluwi. Natwe twa kota hemwe, twangumfugamila Nguluwi wa hemwe na natwali tumlavila nhambiko kulawa katali kuli mhela wa ulongozi wa Esalihadoni, mndewa wa Ashulu, yawele nayali nakatugala hano."

3 Ila Selubabeli na Yeshuwa na vilongozi wanji wa ng'holo za Isilaeli nawawalonjela, "Hatulingugana utanzi woneche kulawa kwa hemwe leka kuzenga ng'handa kahi ya Nguluwi wa hetwe. Toweza kumzenjela Mkulu Nguluwi, Nguluwi wa Isilaeli, kota Koleshi, mndewa wa Pelisiya, vyoyatulajize." 4 Ahyo, wanhu wawele nawali wochikala habehi na honhu aho nawaluka kuwadita wanhu watweguche nhumbula na kuwakabusa wanhu wa Yuda leka waleche kulutilila na mijito ja kuzenga kahi ng'handa. 5 Kahi nawawapa vinhu kwa uviso vilongozi wa ulongozi wa Pelisiya leka wetwanze na majesa ga wanhu wa Yuda. Nawalutilila kudita ahyo kuli mhela weng'ha ulongozi wa Koleshi mbaka mhela wa ulongozi wa Daliyo, mndewa wa Pelisiya.

6 Kuli mwaluko wa ulongozi wa mndewa Ahasuelo, wang'honyo awo nawandika ulonjelezi kuwala wanhu wa Yuda na wa Yelusalemu.

7 Kahi mhela wa ulongozi wa Alitashasta, mndewa wa Pelisiya, Bishilamu na Mitiledati na Tabeeli, hamwe na wayawo, nawamwandichila baluwa mndewa Alitashasta. Baluwa ayo nayandichigwa kwa ndonga ya Chialamu na kutang'huligwa kwa chiwalo cha mndewa.

8 Lehumu, yawele nayali chilongozi mkulu na Shimushayi, yalingwandika wa mkowa, nawamwandichila Alitashasta baluwa kwa chiwalo cha Yelusalemu. 9 Kulawa kwa Lehumu, chilongozi mkulu na Shimushayi, yalingwandika wa mkowa, hamwe na wayage na watagusa na vilongozi na walingwandika, wawele nawalawa Eleki na Babuloni na Susa kuli isi ya Elamu, 10 hamwe na wanhu wa isi zinji wawele Asulibanipali, yawele nayali chilongozi na kahi yawele na mong'ho, nakawalavya na kuwawika kuli muji wa Samaliya na honhu hanji kuli mkowa wa kolizinjilaga isanya mwa Eyufulate.

11 Baluwa ayo nayali ahi, "Kwa mndewa Alitashasta. Hetwe vitumagwa wa hegwe wa kuli mkowa wa kolizinjilaga isanya mwa Eyufulate, twangukulamsa. 12 Uvizele kota Wayahudi wawele nawalawa kuli isi ya hegwe nawahiluka Yelusalemu na sambi wanguuzenga kahi wula muji ulingubelenhuka. Ena, wa habehi kusinda kuuzenga misisi na ng'hanzi zake. 13 Twangugana uvizele gwa mndewa, kota wone wosinda kuuzenga muji na ng'hanzi zake, wanhu hawolipa kodi ne ushulu ne ada, ahyo ng'hano ya hegwe yopungula. 14 Lelo, kwa vila twangukuwinza hegwe kwa kukundigwa, hatulingugana kukona kwangubasigwa soni, ahyo natona inoga kukulonjela mbuli ayo 15 leka upugajize kuli vitabu vya kukumbuchila kwa wasekulu wa hegwe. Amo kovizela kota kulawa katali muji awo nawali muji wa kubelenhuka na nauwatunya ng'hatu wandewa na vilongozi wa mikowa. Kulawa katali wanhu wake ndo walingwambuza kubelenhuka. Acho ndo chiwalo cha muji awo kudumigwa. 16 Ahyo twangukuzelesa kota wone wosinda kuuzenga muji awo na ng'hanzi zake, hauweza kuulongoza mkowa wa kolizinjilaga isanya mwa Eyufulate."

17 Lelo mndewa nakedichila hino, "Kwa hegwe Lehumu chilongozi mkulu na kwa Shimushayi, yalingwandika wa mkowa, hamwe na wayenu weng'ha walingikala Samaliya na honhu hanji kuli mkowa wa kolizinjilaga isanya mwa Eyufulate, ndanguwalamsa. 18 Baluwa yomlajize kwa heni naitang'huligwa na kusomigwa hali heni. 19 Nandajiza upugajizi ukoleche, ahyo naizeleka kota kulawa katali wanhu wa muji awo wa Yelusalemu nawali wowalema wandewa na nawali wobelenhuka na kwambuza kilewa. 20 Aho hamwande muji awo wa Yelusalemu nauwahika kuwa na wandewa wawele na mong'ho, wawele nawailongoza isi yeng'ha iwele ako kumwambu mwa lwanda lwa Eyufulate, wokongoza kodi na ushulu na ada. 21 Ahyo, mlavye mzilo kota wanhu awo waleche kuuzenga kahi muji awo mbaka aho hondilavya malajizo gayage. 22 Milolele ng'hatu, mleche kukawila kudita ahyo, leka ndeche kwajiliza lufufu kuli undewa."

23 Lehumu na Shimushayi na wayawo, vyowasomelwe baluwa ayo kulawa kwa mndewa Alitashasta, nawadita himahima kuluta Yelusalemu na kuwalemeza Wayahudi kulutilila kuuzenga kahi muji awo.

24 Mijito ja kuzenga kahi ng'handa ya Nguluwi kuli muji wa Yelusalemu nayali jimile ng'hatu, mbuli ayo nailutilila mbaka kuli mwaka wa keli wa ulongozi wa Daliyo, mndewa wa Pelisiya.