1 Mndewa Daliyo nakalajiza upugajizi ukoleche kuli muji wa Babuloni kuli ng'handa iwele na vitabu vya kukumbuchila kwa chiundewa. 2 Chitabu chimwe nachifichigwa kuli muji wa Ekibatana kuli mkowa wa Mediya, nacho nachali chandichigwe hino, 3 "Kuli mwaka wa mwaluko wa ulongozi wa mndewa Koleshi, heye yuye nakalajiza kuwala ng'handa ya Nguluwi iwele Yelusalemu kota ng'handa ya Nguluwi izenjigwe hali honhu hahala hawele Wayahudi nawali wolavya nhambiko, hali msisi wuwula. Ng'handa ayo iwe na wimo wa mita makumi meli na saba (27) na ugazi wa mita makumi meli na saba (27). 4 Ng'hanzi za ng'handa ayo zizenjigwe kwa misitali jidatu ja maganga makulu, hamba hawe na msitali umwe wa mbawo. Sendi zeng'ha zilipigwe kulawa kuli ng'hano ya mndewa. 5 Kahi, vinhu vyeng'ha vya zahabu na vya sendi viwele mndewa Nebukadinesa nakavigala Babuloni kulawa kuli ng'handa ya Nguluwi ya Yelusalemu, vihiluswe na chila chimwe chiwichigwe hali honhu hake mgati mwa ng'handa ya Nguluwi."

6 Daliyo nakahilika usenga awu, "Kwa hegwe Tatenayi, chilongozi wa mkowa wa kolizinjilaga isanya mwa Eyufulate na Shetali-bosenayi na vilongozi wayago kuli mkowa, mleche kuluta ako kuli honhu ha kuzenga ng'handa ya Nguluwi, 7 na mleche mijito ja kuzenga kahi ng'handa ya Nguluwi jilutilile. Mumleche chilongozi wa Yuda na vilongozi wa Wayahudi walutilile kuizenga kahi ng'handa ya Nguluwi hali honhu hake. 8 Mzidi wa ago, ndangulajiza kuwala chomlinguganigwa kudita kwa chiwalo cha wasekulu wa Wayahudi kuli mijito ja ng'handa ayo. Sendi zeng'ha za kuwapa wanhu walingukola mijito ajo zolipigwa ne kukawila kulawa kuli ng'hano ya mndewa ilingulawa kuli kodi kulawa kuli mkowa wa kolizinjilaga isanya mwa lwanda Eyufulate, leka mijito jilutilile. 9 Choneche chilinguganigwa na watambika ako Yelusalemu kota milogota milume na ming'holo milume na ming'holo myana kwa chiwalo cha nhambiko za kulakazwa kwa Nguluwi wa kilanga na ngano na mwino na divai na mafuta, wanguganigwa kupegwa chila zuwa ne kuleka. 10 Aga geng'ha gakoleche leka wamlavile Nguluwi wa kilanga nhambiko zilingumnojeza na walande kwa chiwalo cha kikala kwa heni mndewa na wana wa heni. 11 Mzidi wa ago, ndangulajiza kota munhu yoneche yawele kogalula malajizo aga, boliti ilavigwe kulawa kuli ng'handa ya heye na kuhongoligwa ubanzi umwe, hamba yahomigwe na boliti ayo, kahi ng'handa ya heye iditigwe iwe mahame, kwa chiwalo cha nongwa ayo. 12 Nguluwi yawele nakaliwika itagwa lya heye ako kuli muji wa Yelusalemu, yamgwise mndewa yoneche ama wanhu wa isi yoneche wawele wolema kuhulichiza malajizo aga ama kujeza kuiwifya ng'handa ya Nguluwi iwele kuli muji wa Yelusalemu. Heni Daliyo nandavya malajizo aga, ganguganigwa kuwinzigwa."

13 Tatenayi, chilongozi wa mkowa wa kolizinjilaga isanya mwa Eyufulate na Shetali-bosenayi na vilongozi wayawo nawagakolela mijito malajizo goyalavile mndewa Daliyo. 14 Vilongozi wa Wayahudi nawalutilila goya ng'hatu na mijito ja kuzenga kahi ng'handa ya Nguluwi, wokangazwa nhumbula na waloli, wawele ndo Hagayi na Sekaliya, mwana wa Ido. Nawasinda kuzenga kahi ng'handa ya Nguluwi kota vyowalajizwe na Nguluwi wa Isilaeli na kwa malajizo ga mndewa Koleshi na mndewa Daliyo na mndewa Alitashasta wa Pelisiya. 15 Kuzenjigwa kahi kwa ng'handa ayo nakusinda kuli zuwa lya kadatu lya mwezi wa Adali, uwele ndo mwezi wa kadatu kuli mwaka wa sita wa ulongozi wa mndewa Daliyo. 16 Hamba wanhu wa Isilaeli, wawele ndo watambika na Walawi na wanhu wanji wawele nawahiluka kulawa kuli isi ya chijenzi, nawaiwika chiuyeng'ha ng'handa ya Nguluwi kwa kusangalala ng'hatu. 17 Lowawele woiwika chiuyeng'ha ng'handa ya Nguluwi, nawalavya mibuguma miya imwe (100) na ming'holo milume miya mbili (200) na ming'holo myana miya zine (400). Kahi nawalavya mipongo kumi na mili (12) kwa chiwalo cha nhambiko ya kusa gehile, chila mhene kwa chiwalo cha nhanzi ya Isilaeli. 18 Nawawawika watambika kuli honhu ha hewo na Walawi nawawichigwa kuli vilundo vya hewo vya kukola mijito kwa Nguluwi ako Yelusalemu, kota vyoyandichigwe kuli chitabu cha Musa.

19 Kuli zuwa lya kumi na zine lya mwezi wa mwaluko, wanhu wawele nawahiluka kulawa kuli isi ya chijenzi nawadita mnvina ya Pasaka. 20 Watambika na Walawi nawali wewelize, weng'ha nawali welizwe ng'hatu. Nawalidumula singo ing'holo lyana lya mnvina ya Pasaka kwa chiwalo cha wanhu weng'ha wawele nawahiluka kulawa kuli isi ya chijenzi na wang'holozawo watambika na kwa chiwalo cha hewo wawo. 21 Ahyo Waisilaeli weng'ha wawele nawahiluka kulawa kuli isi ya chijenzi nawalya Pasaka hamwe na wala wawele nawewika kutali na mbuli zikokomoche za wanhu wa isi za habehi, leka kumpala Mkulu Nguluwi, Nguluwi wa Isilaeli. 22 Kwa mhela wa mazuwa saba wanhu nawaidita mnvina ya mibumunda johajiwichigwe usaso kwa kusangalala, kwa vila Mkulu Nguluwi nakawadita wasangalale kwa kugalula kunuwila kwa mndewa wa Ashulu, kota yawatanze kuli mijito ja kuzenga kahi ng'handa ya Nguluwi, Nguluwi wa Isilaeli.