1 Lelo, logakwete ago geng'ha, kuli mhela wa ulongozi wa Alitashasta, mndewa wa Pelisiya, Esila nakoka kulawa Babuloni. Esila nayali mwana wa Selaya, mwana wa Asaliya, mwana wa Hilikiya, 2 mwana wa Shalumu, mwana wa Sadoki, mwana wa Ahitubu, 3 mwana wa Amaliya, mwana wa Asaliya, mwana Melayoti, 4 mwana wa Selahiya, mwana wa Usi, mwana wa Buki, 5 mwana wa Abishua, mwana wa Finehasi, mwana wa Eleasali, mwana wa Aluni, mtambika mkulu. 6 Ayo Esila nayali yalingwandika yawele na uwanzi winji ng'hatu kuli malajizo gawele Mkulu Nguluwi, Nguluwi wa Isilaeli, nayali yampele Musa. Mndewa nakamha Esila chila chinhu choyaganile, kwa vila Mkulu Nguluwi nayali hamwe na heye. 7 Kuli mwaka wa saba wa ulongozi wa mndewa Alitashasta, Esila nakaluka majendo kulawa Babuloni kuluta Yelusalemu. Wanhu wamwenga wa Isilaeli na watambika na Walawi na walingwimba na walingwamila lwizi na vitumagwa wa ng'handa ya Nguluwi nawaluta hamwe na heye.

8 Esila nakafika mujini Yelusalemu kuli zuwa lya mwaluko lya mwezi wa kahano kuli mwaka wa saba wa ulongozi wa mndewa Alitashasta. 9 Mkulu Nguluwi nakagadita majendo ga hewo gowaluche kuli zuwa lya mwaluko lya mwezi wa mwaluko, galutilile goya. 10 Esila nayali yelavile kwa nhumbula ya heye yeng'ha kilangusa malajizo ga Mkulu Nguluwi na kugahulichiza na kuwalangusa wanhu wa Isilaeli malajizo na mizilo ja Nguluwi.

11 Ayi ndo baluwa iwele mndewa Alitashasta nakamha Esila, mtambika na yalingwandika na yawele na uwanzi kuli mizilo na malajizo gawele Mkulu Nguluwi nakawapa wanhu wa Isilaeli. 12 Baluwa ayo nailonga hino, "Kulawa kwa heni Alitashasta, mndewa wa wandewa, kuluta kwa Esila, mtambika na munhu yawele na uwanzi kuli malajizo ga Mkulu Nguluwi wa kilanga. Ndangukulamsa. 13 Ndangulajiza kota kuli ulongozi wa heni, Muisilaeli yoneche mbaka mtambika wa hewo ama Mlawi, wone yagane kuhiluka Yelusalemu kwa kunuwila kwa heye, koweza kuluta hamwe na hegwe. 14 Heni mndewa, hamwe na wanhu wa heni saba walingundonjela mbuli zilivinji, ndangukulajiza ulute ukapugajize ako Yuda na Yelusalemu, leka kona kota malajizo ga Nguluwi wa hegwe, gawele nakupegwa ganguwinzigwa goya. 15 Kohola sendi na zahabu viwele heni na wanhu wa heni walingundonjela mbuli zinojile natumlavila kwa kunuwila Nguluwi wa Isilaeli, yawele ng'handa ya heye ya ako mujini Yelusalemu. 16 Kahi kohola sendi na zahabu yeng'ha iwele koikungajiza kulawa kuli honhu heng'ha ha Babuloni, hamwe na nhambiko za kunuwila ziwele Waisilaeli na watambika wa hewo nawalavya kwa kunuwila kwa hewo kwa chiwalo cha ng'handa ya Nguluwi wa hewo iwele ako Yelusalemu. 17 Kwa sendi azo kogula mibuguma na ming'holo milume na ming'holo myana na nyhule na divai na kuvilavya kuli honhu ha kulavila nhambiko kuli ng'handa ya Nguluwi iwele Yelusalemu. 18 Sendi na zahabu iwele yosigala koweza kutumiya hamwe na wenyeng'haye wayago kota vyomgana, kwa igano lya Nguluwi. 19 Vila vinhu vyoupegwe kwa chiwalo cha kufugamila kuli ng'handa ya Nguluwi wa hegwe, komlavila Nguluwi wa Yelusalemu. 20 Wone ugane chinhu choneche kwa chiwalo cha kulavya kuli ng'handa ya Nguluwi wa hegwe, koweza kuhola kulawa kuli ng'hano ya mndewa na kulavya. 21 Heni mndewa Alitashasta, ndangulajiza kwa walinguwika ng'hano weng'ha kuli mkowa wa kolizinjilaga isanya mwa lwanda lwa Eyufulate kota choneche choyogana Esila, mtambika na yalingwandika malajizo ga Nguluwi, yapegwe kwa nhumbula igoloche, 22 chasi choneche choyogana mbaka kufika kilo elufu zidatu na miya zine (3,400) za sendi na ngano kilo elufu kumi (10,000) na divai lita elufu mbili (2,000) na mafuta lita elufu mbili (2,000) na mwino chasi choneche choyogana. 23 Choneche chiwele Nguluwi wa kilanga nakalajiza, chikoleche kwa kukundigwa kwa chiwalo cha ng'handa ya Nguluwi wa kilanga. Lekachoni ng'halazi ya heye ifiche kuli ulongozi wa heni ama wana wa heni? 24 Mvizele kahi kota mwahela ludali lwa kukongoza kodi ama ada kulawa kwa watambika na Walawi na walingwimba na wamizi wa lwizi na vitumagwa wa ng'handa ya Nguluwi ama wakola mijito wanji wa kuli ng'handa ya Nguluwi. 25 Nagwe Esila, kwa luhala alo loyakupele Nguluwi wa hegwe, uhagule watagusa na walingwamula walingugazela malajizo ga Nguluwi wa hemwe, leka walavye hachi kwa wanhu weng'ha wa mkowa wa kolizinjilaga isanya mwa lwanda lwa Eyufulate. Nagwe umlanguse yawele hambe yagazelele. 26 Munhu yoneche yawele howinza malajizo ga Nguluwi wa hemwe na ga mndewa, yatagusigwe kubagama ama kuhilikwa hanze ha isi ama kusukuligwa lufufu lwa heye ama kuwichigwa mchinweng'ho."

27 Esila nakalonga, "Yatogoligwe Mkulu Nguluwi, Nguluwi wa wasekulu wa hetwe, yawele nakamha mndewa nhumbula ya kuipa lutogo ng'handa ya Mkulu Nguluwi iwele ako Yelusalemu. 28 Kwa igano lya kwimilila lya heye Nguluwi, namhata utanzi wa mndewa na wang'hangala wa heye wawele na ludali lukulu. Nang'hangaza ndiliyeka kwa vila Mkulu Nguluwi, Nguluwi wa heni, nayali hamwe na heni mbaka nandiwakungajiza vilongozi wa Isilaeli leka wahiluche hamwe na heni."