1 Awa ndo vilongozi wa ng'holo na hisabu ya wanhu wawele nawahiluka hamwe na heni Esila kulawa Babuloni, mhela wa ulongozi wa mndewa Alitashasta. 2 Kulawa kuli lukolo lwa Finehasi, nayali Gelishomu na kulawa kuli lukolo lwa Itamali, nayali Danyeli na kulawa kuli lukolo lwa Daudi, nayali Hatushi, 3 yawele nayali ndo mwana wa Shekaniya na kulawa kuli lukolo lwa Paloshi, nayali Sekaliya, hamwe na walume miya imwe na makumi gahano (150) wa lukolo lwa heye wawele nawandichigwa hamwe na heye. 4 Kulawa kuli lukolo lwa Pahati-moabu, nayali Eliehoenayi, mwana wa Selahiya, hamwe na walume miya mbili (200). 5 Kulawa kuli lukolo lwa Satu, nayali Shekaniya, mwana wa Yahasieli, hamwe na walume miya zidatu (300). 6 Kulawa kuli lukolo lwa Adini, nayali Ebedi, mwana wa Yonatani, hamwe na walume makumi gahano (50). 7 Kulawa kuli lukolo wa Elamu, nayali Yeshaya, mwana wa Ataliya, hamwe na walume makumi saba (70). 8 Kulawa kuli lukolo lwa Shefatiya, nayali Sebadiya, mwana wa Mikaeli, hamwe na walume makumi nane (80). 9 Kulawa kuli lukolo lwa Yoabu, nayali Obadiya, mwana wa Yehieli, hamwe na walume miya mbili na kumi na nane (218). 10 Kulawa kuli lukolo lwa Bani, nayali Shelomiti, mwana wa Yosifiya, hamwe na walume miya imwe na makumi sita (160). 11 Kulawa kuli lukolo lwa Bebayi, nayali Sekaliya, mwana wa Bebayi, hamwe na walume makumi meli na nane (28). 12 Kulawa kuli lukolo lwa Asigadi, nayali Yohanani, mwana wa Hakatani, hamwe na walume miya imwe na kumi (110). 13 Kulawa kuli lukolo lwa Adonikamu, nawali ndo Elifeleti na Yeueli na Shemaya, hamwe na walume makumi sita (60). 14 Kulawa kuli lukolo lwa Bigwayi, nawali Utayi na Sakuli, hamwe na walume makumi saba (70).

15 Nandiwakungajiza wanhu weng'ha hafungo ha lwanda lulingulutila kuli muji wa Ahava. Ako, natuwika kambi kwa mhela wa mazuwa gadatu. Nandiwakagula wanhu weng'ha hamwe na watambika, ila siwapatile Walawi hali hewo. 16 Lelo nandiwachema vilongozi tisa, wawele ndo Elieseli na Alieli na Shemaya na Elinatani na Yalibu na Elinatani na Natani na Sekaliya na Meshulamu, hamwe na wawele na uwanzi weli, wawele ndo Yoyalibu na Elinatani. 17 Nandiwalajiza kwa Ido, yawele ndo chilongozi wa wanhu wa kula Kasifiya. Nandimlanda heye na wayage, wawele ndo wakola mijito kuli ng'handa ya Nguluwi, leka watigalile wanhu wawele wokola mijito kuli ng'handa ya Nguluwi wa hetwe. 18 Kwa vila kunoga kwa Nguluwi wa hetwe nakwali hamwe na hetwe, nawatigalila Shelebiya. Munhu ayo nayali na luhala, yawele nayali ndo lulelo lwa Mahili, mwana wa Lawi, mwana wa Isilaeli, hamwe na wanage hamwe na wang'holoze walume kumi na nane. 19 Nawatigalila kahi Hashabiya na Yeshaya, weng'ha wa lukolo lwa Melali, hamwe na wang'holozawo na wana wa hewo makumi meli (20). 20 Kahi nakwali na wakola mijito wa kuli ng'handa ya Nguluwi miya mbili na makumi meli (220) wawele wasekulu wa hewo nawali wahaguligwe na mndewa Daudi na vilongozi wa heye, kuwatanza Walawi. Matagwa ga wanhu weng'ha awa nagandichigwa.

21 Hafungo ha lwanda lwa Ahava nandiwikula kwesela kulya leka tinyenyeteze hali Nguluwi wa hetwe na kumlanda yatulongoze na kutwamila kuli majendo ga hetwe hamwe na wana wa hetwe na lufufu lwa hetwe lweng'ha. 22 Yahawele soni kwa heni kumlanda mndewa wamizi na wakwina falasi wa kutwamila mnzila kwa chiwalo cha wang'honyo wa hetwe, kwa vila nandimlonjela mndewa, "Moko wa kunoga wa Nguluwi wa hetwe wa hamwe na chila yumwe yalingumpala, ila ng'halazi ya heye ing'ang'ale yowa kwa weng'ha walingumleka." 23 Lelo natwesela kulya na kumlanda Nguluwi kuwala mbuli ayi, naye nakedichila kulanda kwa hetwe.

24 Hamba nandiwabagula vilongozi wa watambika kumi na weli, hamwe na Shelebiya na Hashabiya na wang'holozawo kumi, 25 nandiwapimila sendi na zahabu na vinhu kwa chiwalo cha nhambiko ya ng'handa ya Nguluwi wa hetwe. Vinhu avyo navilavigwa na mndewa na wanhu wa heye walingumlonjela mbuli zinojile na vilongozi wa heye hamwe na wanhu weng'ha wa Isilaeli. 26 Vinhu avyo ndo sendi kilo elufu makumi meli na mbili (22,000) na vinhu vya sendi kilo elufu zidatu na miya zine (3,400) na zahabu kilo elufu zidatu na miya zine (3,400) 27 na visaye makumi meli (20) vya zahabu, viwele na itunyo lya kilo nane na nusu (8.5) na vinhu vili vya shaba inojile ilingupulika ya sendi nyinji kota zahabu.

28 Hamba nandiwalonjela, "Hemwe mwa welile hali Mkulu Nguluwi na vinhu avi kahi navibaguligwa kwa chiwalo cha Nguluwi na sendi na zahabu ndo nhambiko za kunuwila kwa Mkulu Nguluwi, Nguluwi wa wasekulu wa hemwe. 29 Ndanguwalanda hemwe mvyamile mbaka homvipima hali watambika wakulu na Walawi na vilongozi wa ng'holo za Isilaeli ako Yelusalemu kuli vihengo vya ng'handa ya Mkulu Nguluwi." 30 Lelo watambika na Walawi nawabochela sendi na zahabu na vinhu vyeng'ha vyowapimilwe, leka wavihiliche mujini Yelusalemu kuli ng'handa ya Nguluwi wa hetwe.

31 Kuli zuwa lya kumi na mbili (12) lya mwezi wa mwaluko, natwaluka majendo kulawa kuli lwanda lwa Ahava na kuluta Yelusalemu. Nguluwi wa hetwe nayali hamwe na hetwe, nakatwamila leka tuwe kutali na wang'honyo na walinguvaba. 32 Lotufichile Yelusalemu, natwesela kwa mhela wa mazuwa gadatu. 33 Kuli zuwa lya kane, mgati mwa ng'handa ya Nguluwi wa hetwe, natupima yila sendi na zahabu na vila vinhu, hamba natumha mtambika Melemoti, mwana wa Uliya. Eleasali, mwana wa Finehasi, nayali hamwe na heye, kahi nakwali na Walawi weli wawele ndo Yosabadi, mwana wa Yeshuwa na Noadiya, mwana wa Binuyi. 34 Chila chinhu nachiwazigwa na kupimigwa kwa itunyo. Itunyo lya chila chinhu nalyandichigwa.

35 Hamba, wanhu weng'ha wawele nawahiluka kulawa kuli isi ya chijenzi nawamlavila Nguluwi wa Isilaeli nhambiko za hewo za kulakazwa. Nawalavya mibuguma kumi na mili (12) kwa chiwalo cha Waisilaeli weng'ha na ming'holo milume makumi tisa na sita (96) na ming'holo myana makumi saba na saba (77) na mipongo kumi na mili (12) leka jiwe nhambiko ya kusa gehile. Migongolo ajo jeng'ha najilavigwa leka jiwe nhambiko ya kulakazwa kwa Mkulu Nguluwi. 36 Nawawapa kahi vilongozi wa mkowa wa kolizinjilaga isanya mwa lwanda lwa Eyufulate malajizo gowapegwe na mndewa Alitashasta, nawo nawalavya utanzi kwa wanhu na kwa chiwalo cha ng'handa ya Nguluwi.