1 Kuli mwezi wa saba wa mwaka, Waisilaeli wawele nawali wochikala kuli miji ja hewo, nawekungajiza mujini Yelusalemu. 2 Yeshuwa, mwana wa Yosadaki na watambika wayage na Selubabeli, mwana wa Shealitieli, hamwe na ivyazi lya heye, nawazenga kahi honhu ha kulavila nhambiko ha Nguluwi wa Isilaeli, leka wamlavile nhambiko za kulakazwa kota vyoyandichigwe kuli malajizo ga Musa, munhu wa Nguluwi. 3 Nawahazenga honhu ha kulavila nhambiko kuli honhu hahala ha katali, hanga nawawadumba wanhu wawele nawali wochikala habehi. Hamba nawali womlavila Mkulu Nguluwi nhambiko za kulakazwa mchanya mwake chila zuwa lufuku na matinazo. 4 Hamba nawaidita mnvina ya vibumuli kota vyoyandichigwe kuli malajizo, chila zuwa nawalavya nhambiko za kulakazwa ziwele nazali ziganigwa kwa chiwalo cha zuwa alyo. 5 Hamba nawalavya nhambiko za kulakazwa za hihi hela na nhambiko za mnvina ya kulawa kwa nyelezi na nhambiko zeng'ha za mnvina zelile za Mkulu Nguluwi ziwichigwe, hamwe na zila nhambiko za kunuwila ziwele nazilavigwa kwa Mkulu Nguluwi. 6 Hanga msisi wa ng'handa lya Mkulu Nguluwi nawali ung'hali kuwichigwa, wanhu nawaluka kulavya nhambiko za kulakazwa kulawa zuwa lya mwaluko lya mwezi wa saba.

7 Wanhu nawalavya sendi za kuwapa walingugongomanya vinhu vya mbawo na walinguzenga. Kahi nawalavya chilyo na vyakunwa na mafuta leka vihilikwe kuli miji ja Tilo na Sidoni leka kupata mizinga ja migodi ja mielezi kulawa Lebanoni. Mizinga ajo najihilikwa kwa nzila ya bahali mbaka Yopa. Aga geng'ha nagakoleka kwa ludali lwa Koleshi, mndewa wa Pelisiya. 8 Lelo, wanhu nawaluka mijito kuli mwezi wa keli wa mwaka wa keli lowafichile kuli honhu ha kuzenga ng'handa ya Nguluwi ako mujini Yelusalemu. Selubabeli, mwana wa Shealitieli na Yeshuwa, mwana wa Yosadaki na wang'holozawo wanji, wawele ndo watambika na Walawi na weng'ha wawele nawahiluka Yelusalemu kulawa kuli isi ya chijenzi, nawaluka mijito ajo. Nawawahagula Walawi wawele nawali na miyaka makumi meli ama mzidi, leka wawe vilongozi wa mijito ja kuzenga kahi ng'handa ya Mkulu Nguluwi. 9 Yeshuwa na wanage na ivyazi lya heye hamwe na Kadimieli na wanage, wawele ndo wa lukolo wa Yuda, nawelumba kuli mijito ja kwimilila kuzenga kahi ng'handa ya Nguluwi. Nawatanzigwa na walelwa wa Henadadi na wang'holozawo Walawi.

10 Walinguzenga lowaluche kuwika msisi wa ng'handa ya Mkulu Nguluwi, watambika wawele nawali wavalile mivalo ja hewo ja utambika, nawema honhu ha hewo na mhalamhanda mmoko. Walawi wa lukolo lwa Asafu nawema na matowazi ga hewo, nawamtogola Mkulu Nguluwi kwa kuwinza malajizo ga Daudi, mndewa wa Isilaeli. 11 Nawemba kuno womtogola na kumha ukulu Mkulu Nguluwi.

"Heye ndo yanojile,

igano lya kwimilila lya heye kwa Isilaeli,

lyangikala mazuwa gose."

Wanhu weng'ha nawatowa iyowe kwa mong'ho wa hewo weng'ha, nawamtogola Mkulu Nguluwi kwa chiwalo cha kwaluka kuzenga msisi wa ng'handa ya Mkulu Nguluwi. 12 Ila watambika wenji na Walawi na vilongozi wa ng'holo wawele ndo wasekulu na wala wawele nawayona ng'handa ya mwaluko, nawalila kwa lizi likulu lowauwene msisi wa ng'handa ayi wanguwichigwa, hanga wanhu wanji wenji nawatowa iyowe kwa kusangalala. 13 Wanhu hawawezile kubagula hali lizi lya kusangalala na lizi lya kulila, kwa vila wanhu nawatowa iyowe ng'hatu na alyo iyowe naliluta kutali ng'hatu.