1 Logakwete ago geng'ha, vilongozi nawambuyila na kundonjela, "Wanhu wa Isilaeli na watambika na Walawi hawebagule na wanhu wa isi kuli kudita mbuli za kuzudiza kota zila zowaditile Wakanaani na Wahiti na Wapelisi na Wayebusi na Waamoni na Wamoabu na Wamisili na Waamoli. 2 Nawawahesa wadala wa chijenzi na kuwaheseza wasongolo wa hewo kahi. Ahyo, wanhu wa isi yelile ya Nguluwi nawehanza na wanhu wa isi zinji. Mzidi wa ago, vilongozi na wakulu ndo wa mwaluko kudita mbuli azo."

3 Vyonyhuliche mbuli ayo, nandadula ikoti lya heni na ikanzu lya heni na kukwega na kung'umbula mnvili za heni na lulevu lwa heni kwa masinzo makulu na kikalisa hanyi kwa kububuwala. 4 Hamba chila yumwe yawele nayali yokakama kwa chiwalo cha ulonzi woyalonjile Nguluwi wa Isilaeli, nakoya kikungajiza kwa heni kunzunguluta kwa chiwalo cha masinzo galinguwala kwajilila aku kwa wanhu awo wawele nawahiluka kulawa kuli isi ya chijenzi. Nani nandali ndikalise hala ndilola hela mbaka mhela wa kulavya nhambiko za matinazo.

5 Matinazo, mhela wa kulavya nhambiko loufichile, nanyinuka kulawa honhu aho hombele ndikalise kwa masinzo aku ikoti lya heni liwele nalidejeka hamwe na ikanzu, nafugama na kumgololela moko ga heni Mkulu Nguluwi, Nguluwi wa heni. 6 Nandanda ndilonga, "Gwa Nguluwi wa heni, ndangona soni ng'hatu kwinula mutwi wa heni hali hegwe, kwa vila gehile ga hetwe nagamema mbaka kupuluta mchanya mwa vitwi vya hetwe na nongwa za hetwe zangufika mbaka kilanga. 7 Kulawa mihela ja wasekulu wa hetwe mbaka sambi, natukuditila wihe ng'hatu. Kwa chiwalo cha gehile ga hetwe, hetwe na wandewa na watambika wa hetwe, natufichigwa na mbuli zihile kota ngondo na upogozi na kusukuligwa lufufu lwa hetwe na kubasigwa soni na wandewa wajenzi, kota vyoiwele lehano. 8 Ila lelo, gwa Mkulu Nguluwi, Nguluwi wa hetwe, kwa mhela udo nakutulajila isungu lya hegwe na kuwadita wamwe wa hetwe wasulupuche kulawa kuli isi ya chijenzi na kikala kwa kikala goya hali honhu aha helile. Nakutupa kusangalala na kikala kunyale kulawa kuli upogozi. 9 Hanga hetwe twa wapogozi, ila hegwe Nguluwi wa hetwe hutulechile tikale kuli isi ya chijenzi. Nakutulajila igano lya hegwe lya kwimilila kwa kuwadita wandewa wa Pelisiya wawe wanojile kwa hetwe na kutukundiza tikale na kuizenga ng'handa ya hegwe igwile. Nakutudita tikale goya hano Yuda na Yelusalemu.

10 "Ila sambi, gwa Nguluwi wa hetwe, tulonje choni kuwala ago geng'ha gawele nagalawila? Kwa vila natujibelenhuka mizilo ja hegwe 11 joutupele kwa kukolela vitumagwa wa hegwe waloli ulonga, ‘Isi yomlinguluta kuihola leka iwe ya hemwe ndo isi iwele ikokomoche na iwele na wavu wa wanhu wa kulawa isi zinji. Kwa mbuli za hewo za kuzudiza, nawaimemeza isi ukokomoche winji chila honhu. 12 Ahyo, mleche kukunda wahinza wa hemwe wahesigwe na wana wa hewo ne wahinza wa hewo kuhesigwa na wana wa hemwe. Kahi mleche kudita ilagano lya kikala goya na hewo mhela woneche wula. Ahyo, mbuli za hemwe zolutilila goya na molya ganojile ga isi na kuwalechela wana wa hemwe isi ayo kota uhalizi wa hewo wa mazuwa gose.’ 13 Gala geng'ha gatufichile nagali ndo kwa chiwalo cha wihe wa hetwe na nongwa za hetwe nyinji. Twanguvizela kota magazo goutupele, gwa Nguluwi wa hetwe, ndo mado kwa kiwhana na nongwa za hetwe na nakuwaleka wamwe wa hetwe wakomu. 14 Ndaze, tobena mizilo ja hegwe kahi na kihesa na wanhu awa walingudita wihe awu? Ndaze, wahatuzudile na kutudumya ng'hatu mbaka haleche kusigala ne yumwe wa hetwe yawele mkomu ne yoneche yawele koweza kusulupuka? 15 Gwa Mkulu Nguluwi, Nguluwi wa Isilaeli, hegwe ndo uwele na hachi na nakutuleka tusigale kota vyotuwele ahi lehano. Twangulonga gehile ga hetwe hali hegwe kuno tuvizela kota twahela hachi yoneche ya kuya hali hegwe kwa chiwalo cha nongwa azi."