1 Mhela Esila loyawele yolanda na kulonga gehile ga hewo kuno yolila na kigwisa chifunama hali ng'handa ya Nguluwi, ikugusi lya wanhu wa Isilaeli, walume na wadala na wana, nawekungajiza kumzunguluta kuno wolila kwa usungu ng'hatu. 2 Hamba Shekaniya, mwana wa Yehieli, wa lukolo lwa Elamu, nakamlonjela Esila, "Twahela kukundigwa kwa Nguluwi kwa vila natuhesa wadala wa chijenzi wa isi ayi, ila tung'hali twanako kitumbila kota Mkulu Nguluwi kowa na isungu kwa chiwalo cha hetwe Waisilaeli. 3 Lelo tudite ilagano hali Nguluwi wa hetwe kota towawinga wano wache weng'ha hamwe na wana wa hewo. Todita ahyo kwa kuwinza majesa ga hegwe na wala walingudumba mizilo ja Nguluwi wa hetwe. Todita ahyo kwa kiwhana na malajizo ga Nguluwi. 4 Winuche, wamule, natwe tokutanza. Ahyo wikangaze nhumbula kudita ahyo."

5 Esila nakaluka kwa kuwadita vilongozi wa watambika na Walawi na Waisilaeli wanji weng'ha welahe kota wodita ahyo, nawo nawakunda kilaha. 6 Hamba, Esila nakoka hali ng'handa ya Nguluwi, nakaluta kuli chihengo cha Yehohanani, mwana wa Eliashibu. Loyawele ako, Esila nakalombocheza nechilo yeng'ha ne kulya ne kunwa mazi, kwa chiwalo cha masinzo goyawele nago kuwala wihe wa kuwa hela makundo kwa wanhu wawele nawalawa kuli isi ya chijenzi. 7 Nawawikula chila honhu kuli Yuda na Yelusalemu, kota wanhu weng'ha wawele nawalawa kuli isi ya chijenzi wekungajize Yelusalemu. 8 Wone munhu yoneche yawele hofika kuli nhing'hano kwa mhela wa mazuwa gadatu, kwa kiwhana na ilajizo lilavigwe na vilongozi, lufufu lwa heye lweng'ha loholigwa, kahi kolemezigwa kihanza na wanhu wawele nawahiluka kulawa kuli isi ya chijenzi. 9 Kuli mhela wa mazuwa gadatu, wanhu weng'ha wa Yuda na Benjamini nawali wekungajize kula Yelusalemu. Kuli zuwa lya makumi meli lya mwezi wa tisa, wanhu weng'ha nawali wekalise kuli luga lwa ng'handa ya Nguluwi, kuno wawele na masinzo lukami kwa chiwalo cha mbuli ayo na kwa chiwalo cha nhonya ng'hulu.

10 Mtambika Esila nakema kulongasa na wanhu, nakawalonjela, "Hamuwele wa kukundigwa kwa vila namhesa wache wa chijenzi, ahyo namuyonjezela nongwa isi ya Isilaeli. 11 Lelo mlonje gehile ga hemwe hali Mkulu Nguluwi, Nguluwi wa wasekulu wa hemwe na kudita gala galingumnojeza. Mibagule leka muwe kutali na wanhu wa isi ayi na kuwaleka wache wa hemwe wa chijenzi."

12 Wanhu weng'ha nawalonga kwa lizi likulu, "Goya! Yangutulapa tudite kota vyoulingulonga." 13 Nawalutilila kulonga, "Wanhu ndo wenji na nhonya yangutowa ng'hatu. Hatuweza kulutilila kwima hano mluga, mbuli ayi haiweza kumala kwa zuwa limwe ama mazuwa meli, kwa vila natudita nongwa ng'hulu lukami kuwala mbuli ayi. 14 Fola wang'hangala wa hetwe wamule kwa chiwalo cha hetwe tweng'ha choni chotulinguganigwa kudita. Hamba chila yumwe yawele nakahesa mche wa chijenzi yoye kwa mhela uwichigwe kuno yawele na vilongozi na watagusa wa muji wa heye, mbaka aho ng'halazi ing'ang'ale ya Nguluwi wa hetwe hoikusigwa kwa hetwe." 15 Wanhu wenji nawagakunda majesa ago, ila Yonatani, mwana wa Asaheli na Yaseya, mwana wa Tikwa, kuno wotanzigwa na Meshulamu na Shabetayi, Mlawi, nawagalema majesa ago.

16 Wanhu wawele nawahiluka kulawa kuli isi ya chijenzi nawadita kota vyowekundize kuwala majesa ago. Mtambika Esila nakawahagula walume wawele nawali vilongozi kuli ivyazi, yumwe kulawa kuli chila ivyazi na weng'ha nawahaguligwa kwa matagwa ga hewo. Kuli zuwa lya mwaluko lya mwezi wa kumi, wanhu awo nawaluka mijito ja hewo ja kupugajiza mbuli ayo. 17 Kuli zuwa lya mwaluko lya mwezi wa mwaluko, nawali wasindile upugajizi wa hewo kuwala walume weng'ha wawele nawawahesa wache wa chijenzi.

18 Awa ndo walume wawele nawawahesa wache wa chijenzi. Hali watambika, kwa kuwinza ng'holo za hewo, kulawa kuli lukolo lwa Yeshuwa, mwana wa Yosadaki na wang'holoze, nawali Maaseya na Elieseli na Yalibu na Gedaliya. 19 Awo nawalagana kota wowaleka wache wa hewo, ahyo chila yumwe nakalavya ing'holo ilume liwe nhambiko kwa chiwalo cha nongwa ya heye. 20 Kulawa kuli lukolo lwa Imeli, nawali Hanani na Sebadiya. 21 Kulawa kuli lukolo lwa Halimu, nawali Maaseya na Eliya na Shemaya na Yehieli na Usiya. 22 Kulawa kuli lukolo lwa Pashuli, nawali Elioenayi na Maaseya na Ishimaeli na Netaneli na Yosabadi na Elasa.

23 Hali Walawi, nawali Yosabadi na Shimeyi na Petahiya na Yuda na Elieseli na Kelaya, yawele kahi nayali yozeleka kwa itagwa lya Kelita. 24 Kulawa kwa walingwimba, nayali Eliashibu. Kulawa kwa wamizi wa ng'handa ya Nguluwi, nawali Shalumu na Telemu na Uli.

25 Hali wanhu wanji wa Isilaeli, kulawa kuli lukolo lwa Paloshi, nawali Lamiya na Isiya na Malikiya na Miyamini na Eleasali na Malikiya na Benaya. 26 Kulawa kuli lukolo lwa Elamu, nawali Mataniya na Sekaliya na Yehieli na Abudi na Yelemoti na Eliya. 27 Kulawa kuli lukolo lwa Satu, nawali Elioenayi na Eliashibu na Mataniya na Yelemoti na Sabadi na Asisa. 28 Kulawa kuli lukolo lwa Bebayi, nawali Yehohanani na Hananiya na Sabayi na Atilayi. 29 Kulawa kuli lukolo lwa Bani, nawali Meshulamu na Maluki na Adaya na Yashubu na Sheali na Yelemoti. 30 Kulawa kuli lukolo lwa Pahati-moabu, nawali Adina na Kelali na Benaya na Maaseya na Mataniya na Besaleli na Binuyi na Manase. 31 Kulawa kuli lukolo lwa Halimu, nawali Elieseli na Ishiya na Malikiya na Shemaya na Shimeoni 32 na Benjamini na Maluki na Shemaliya. 33 Kulawa kuli lukolo lwa Hashumu, nawali Matenayi na Matata na Sabadi na Elifeleti na Yelemayi na Manase na Shimeyi. 34 Kulawa kuli lukolo lwa Bani, nawali Maadayi na Amulamu na Ueli 35 na Benaya na Bedeya na Keluhi 36 na Waniya na Melemoti na Eliashibu 37 na Mataniya na Matenayi na Yaasu. 38 Kulawa kuli lukolo lwa Binuyi, nawali Shimeyi 39 na Shelemiya na Natani na Adaya 40 na Makinadebayi na Shashayi na Shalayi 41 na Asaleli na Shelemiya na Shemaliya 42 na Shalumu na Amaliya na Yusufu. 43 Kulawa kuli lukolo lwa Nebo, nawali Yeieli na Matitiya na Sabadi na Sebina na Yadayi na Yoeli na Benaya. 44 Awa weng'ha nawali wawahesile wache wa chijenzi na wamwe wa hewo nawali na wana kulawa kwa wache awo.