1 Awu ndo ulonzi wa Nehemiya, mwana wa Hakaliya.

Kuli mwezi wa Kisilevu mwaka wa makumi meli, mhela lombele kuli ngome, kuli ng'handa ya chiundewa ya Shushani, 2 Hanani, yumwe wa wang'holozangu, nakoya hamwe na wanhu wanji kulawa kuli isi ya Yuda, nandiwauza kuwala Wayahudi wayetu wasigale wawele hawalutile kuli isi ya chijenzi ako Babuloni na kuwala muji wa Yelusalemu. 3 Nawandonjela, "Wayahudi wawele hawalutile kuli isi ya chijenzi, wa kuli magazo na soni. Lukanzi lwa muji wa Yelusalemu nalubomoligwa na lwizi jake najilakazwa."

4 Lonyhuliche mbuli azi, nandikalisa na kulila. Kwa mazuwa gamwenga nandali ndilombocheza na kwesela kulya na kulanda hali Nguluwi wa kilanga 5 ndilonga, "Gwa Mkulu Nguluwi, Nguluwi wa kilanga, hegwe ndo Nguluwi uwele mng'hangala na ulingudumbiza, kwangibatilila ilagano lya hegwe na igano lya kwimilila kwa wala walingukugana na kibatilila malajizo ga hegwe. 6 Uhulichize kulanda kwa heni na undole heni chitumagwa wa hegwe, hondikulanda nechilo na nemisi kwa chiwalo cha vitumagwa wa hegwe, wanhu wa Isilaeli. Ndangulonga gehile ga hetwe wanhu wa Isilaeli, gotuditile hali hegwe, mbaka heni na ivyazi lya heni natudita gehile. 7 Natudita wihe hali hegwe, hatibatilile mizilo ja hegwe ne malajizo ga hegwe goumpele chitumagwa wa hegwe Musa.

8 "Ukumbuchile lelo gala goumlonjele chitumagwa wa hegwe Musa, vyoulonjile, ‘Wone hamuwa wa kukundigwa, ndowasambalula hali wanhu wa isi, 9 ila wone monyhulichiza na kibatilila mizilo ja heni na kujiwinza, hanga ndowa ndiwasambalule kutali ng'hatu, ndowahilula kuli honhu hondihahagule leka hawe haluga ha itagwa lya heni.’

10 "Wanhu wa Isilaeli ndo vitumagwa wa hegwe na wanhu wa hegwe wawele nakuwagombola kwa mong'ho wa hegwe na kwa moko wa hegwe uwele na mong'ho. 11 Gwa Mkulu, uhulichize kulanda kwa heni chitumagwa wa hegwe na kulanda kwa vitumagwa wa hegwe walingusangalala kwa kukuhulichiza hegwe. Ndangukulanda undite ng'hundigwe na kulanda kwa heni kusumye hali mndewa."

Lelo, kuli mazuwa ago nandali na mijito ja kutawiza kota chilyo na divai vyahela dunga kwa chiwalo cha mndewa.