1 Wanhu wawele nawawika muhuli kuli kalatasi ayo nawali ndo Nehemiya, mwana wa Hakaliya, yawele nayali ndo chilongozi wa mkowa, hamwe na Sedekiya 2 na watambika, wawele ndo Selaya na Asaliya na Yelemiya 3 na Pashuli na Amaliya na Malikiya 4 na Hatushi na Shebaniya na Maluki 5 na Halimu na Melemoti na Obadiya 6 na Danyeli na Ginetoni na Baluku 7 na Meshulamu na Abiya na Miyamini 8 na Maasiya na Biligayi na Shemaya. Awa nawali watambika. 9 Kahi, Walawi wawele nawawika muhuli nawali ndo Yeshuwa, mwana wa Asaniya na Kadimieli na Binuyi kulawa kuli lulelo lwa Henadadi. 10 Wang'holozawo wawele nawo kahi nawawika muhuli kuli ayo kalatasi nawali ndo Shebaniya na Hodiya na Kelita na Pelaya na Hanani 11 na Mika na Lehobu na Hashabiya 12 na Sakuli na Shelebiya na Shebaniya 13 na Hodiya na Bani na Beninu.

14 Vilongozi wawele nawo nawawika muhuli kuli ayo kalatasi nawali ndo Paloshi na Pahati-moabu na Elamu na Satu na Bani 15 na Buni na Asigadi na Bebayi 16 na Adoniya na Bigwayi na Adini 17 na Ateli na Hesekiya na Asuli 18 na Hodiya na Hashumu na Besayi 19 na Halifu na Anatoti na Nebayi 20 na Magipiashi na Meshulamu na Hesili 21 na Meshesabeli na Sadoki na Yaduwa 22 na Pelatiya na Hanani na Anaya 23 na Hosheya na Hananiya na Hashubu 24 na Haloheshi na Piliha na Shobeki 25 na Lehumu na Hashabuna na Maaseya 26 na Ahiya na Hanani na Anani 27 na Maluki na Halimu na Baana.

28 Wanhu wanji weng'ha, wawele ndo watambika na Walawi na wamizi wa lwizi na walingwimba na vitumagwa wa ng'handa ya Nguluwi na wala weng'ha wawele nawebagula na wanhu wa isi za habehi kwa chiwalo cha malajizo ga Nguluwi, hamwe na wache wa hewo na wasongolo wa hewo na wahinza wa hewo, wana wawele nawali na miyaka ja kuhega kuvizela, 29 awa weng'ha wangilumba na wang'holozawo na vilongozi wa hewo kilaha na kudita ilagano kwa kuwinza malajizo ga Nguluwi gawele nagalavigwa kwa kukolela Musa chitumagwa wa Nguluwi na kibatilila malajizo na mizilo jeng'ha ja Mkulu Nguluwi, Nguluwi wa hetwe. Kahi nawelaha kota wone wobena chilaho cha hewo magazo gawafiche. 30 Twangulagana kota hatuweza kuwaheseza wahinza wa hetwe kwa wanhu walingutuzunguluta ne kuwakundiza wasongolo wa hetwe kuwahesa wahinza wa hewo. 31 Wone wanhu wa isi za habehi wokuya kuguza vinhu vya hewo kuli Zuwa lya Kwesela, hatugula vinhu vya hewo kuli zuwa alyo ne zuwa linji lyoneche lila liwele ndo lyelile. Chila mwaka wa saba hatulima migunda na wanhu weng'ha tulinguwadai towalechela.

32 "Mala imwe kuli chila mwaka, chila yumwe wa hetwe kolavya chasi chido cha sendi kwa chiwalo cha mijito ja ng'handa ya Nguluwi wa hetwe. 33 Kwa sendi azo, togula mibumunda jelile na nhambiko za nyhule za hihi hela na nhambiko za kulakazwa za hihi hela na nhambiko za Zuwa lya Kwesela na nhambiko za mnvina ya kulawa kwa nyelezi na nhambiko za mnvina zinji ziwichigwe na vinhu vinji vyelile na nhambiko ya kusa gehile, leka kuwaditila uhanyisi wanhu wa Isilaeli na mijito jinji ja ng'handa ya Nguluwi.

34 "Hetwe tweng'ha watambika na Walawi na wanhu weng'ha totowa simbi chila mwaka leka kuhagula lukolo luwele lochigala ngodi za kulakaza nhambiko hali honhu ha kulavila nhambiko ha Mkulu Nguluwi, Nguluwi wa hetwe, kota vyoyandichigwe kuli chitabu cha malajizo. 35 Twangulagana kigala kuli ng'handa ya Mkulu Nguluwi mbena za mwaluko na mafuza ga mwaluko ga chila igodi lya mafuza. 36 Kwa kuwinza kota vyoyandichigwe kuli malajizo, chila mlelwa wa mwaluko msongolo kuli ivyazi lya hetwe kohilikwa kuli ng'handa ya Nguluwi wa hetwe kwa watambika walingukola mijito amo. Kahi tohilika chila walelwa wa mwaluko wa misenga ja hetwe na wa mhene za hetwe na wa ming'holo ja hetwe. 37 Mzidi wa ago, tochigala kahi kuli ng'hano za ng'handa ya Nguluwi wa hetwe, kwa watambika, vilyo vya mwaluko kulawa kuli migunda ja hetwe na nhambiko za hetwe za nyhule na mafuza ga migodi ja hetwe jeng'ha na divai ya hetwe inyale na mafuta. Natwe tochigala honhu hamwe ha kumi ha mbena za hetwe kwa Walawi, kwa vila Walawi ndo walingukungajiza honhu hamwe ha kumi ha vinhu kuli miji jeng'ha jotulingukola mijito. 38 Mtambika yalingulawa kuli lulelo lwa Aluni, kowa hamwe na Walawi howowa wobochela honhu hamwe ha kumi ha vinhu avyo. Walawi wohilika kuli ng'hano ya ng'handa ya Nguluwi wa hetwe, honhu hamwe ha kumi ha vinhu vyeng'ha viwele navilavigwa. 39 Wanhu wa Isilaeli na Walawi wohilika nhambiko za nyhule na divai inyale na mafuta ga mzeituni kuli vihengo vya ng'hano, honhu hawele vinhu vya honhu helile vyanguwichigwa na hali honhu hawele watambika walingukola mijito na honhu hawele wamizi wangukola mijito na honhu hawele walingwimba wangukola mijito. Hatuleka kuilolela ng'handa ya Nguluwi wa hetwe."