1 Sanibalati loyahuliche kota natwaluka mijito ja kuzenga kahi lukanzi, nakazudila ng'hatu. Nakaluka kuwabeza kwa kuwaseka Wayahudi 2 hali goloko wa heye na wamizi wa Wasamaliya, yolonga, "Wayahudi wano ng'hochele wangudita choni? Ndaze, wangunuwila kuuzenga kahi muji? Ndaze, wolavya nhambiko? Woweza kusinda mijito kwa zuwa limwe hela? Ndaze, woweza kugadita maganga gawichigwe kuli wavu na kulakazwa, gatanze kuli mijito ja kuzenjela?" 3 Tobiya, Mwamoni, yawele nayali yemile habehi na heye, nakalonga, "Wanguzenga choni? Wone ikanhu lyokwina mchanya mwa lukanzi alo lwa maganga, lyoweza kubomola!"

4 Heni Nehemiya, nandimlanda Nguluwi ndilonga, "Gwa Nguluwi wa hetwe, uhulichize vyowalingutubeza, uhiluse kubeza aku kwa hewo wawo na uwadite waholigwe leka wawe wapogozi kuli isi ya chijenzi. 5 Uleche kuilechela nongwa ya hewo ne gehile ga hewo kwa vila nawakuzudiza hali walinguzenga."

6 Ila natulutilila kuzenga lukanzi mbaka nusu ya wimo wake kwa vila wanhu nawakola mijito kwa kunuwila kwa hewo wawo. 7 Ila Sanibalati na Tobiya na Waalabu na Waamoni na Waashidodi lowahuliche kota kuzenjigwa kahi kwa lukanzi lwa Yelusalemu kwangulutilila na kota honhu heng'ha hawele mwanzi kuli lukanzi nahazenjigwa goya, nawazudila ng'hatu. 8 Weng'ha nawewika goya kuya Yelusalemu kututowa na kwambuza kilewa kuli muji awo. 9 Ahyo natumlanda Nguluwi wa hetwe na kuwika wamizi chila honhu nechilo na nemisi, kwa chiwalo cha kiyamila kuwala hewo.

10 Wanhu wa Yuda nawali wong'ung'uta wolonga, "Mong'ho wa wakola mijito wangupungula na wavu wa maganga ulinguganigwa kusigwa ung'hali winji. Hatuweza kulutilila kuzenga kahi lukanzi." 11 Nawo wang'honyo wa hetwe nawali wolonga, "Hawoweza kuvizela ne kona mbaka hotufika kwa hewo na kuwakopola na kulemeza mijito." 12 Hamba, Wayahudi wawele nawali wochikala hali wang'honyo wa hetwe lowahuliche mbuli ya hewo, nawoya kwa hetwe mzidi wa mala kumi wotulonjela, "Wokuya kulawa chila honhu howalingikala na kututowa."

13 Ahyo, kuli honhu ha hasi ha ng'hanzi ziwele zing'hali kusinda kuzenjigwa na kumbele kwa ng'hanzi na kuli honhu hawele mwanzi, nandiwawika wanhu kwa kiwhana na ivyazi lya hewo, kuno wawele na mipanga na migoha na mipinde na misale. 14 Lombonile kota wanhu nawali na lunhwinhwi nandiwalonjela wakulu na vilongozi na wanhu weng'ha, "Mleche kuwadumba ne hado. Mkumbuchile Mkulu yawele ndo mng'hangala na wa kudumbiza, ahyo mitowe kwa chiwalo cha wang'holozenu na wasongolo wa hemwe na wahinza wa hemwe na wache wa hemwe na ivyazi lya hemwe." 15 Wang'honyo lowahuliche kota natugazela majesa ga hewo gehile na kiwika goya kwa hewo na kota Nguluwi nakawifya majesa ga hewo, tweng'ha natuhiluka kuli lukanzi, chila yumwe kuli mijito ja heye.

16 Kulawa zuwa alyo na kulutilila, nusu ya vitumagwa wa heni nawali wolutilila na mijito ja kuzenga na nusu iyage nayali nawali wamizi wawele na migoha na ngawo na upinde na mivalo ja kwamila mhambaga. Vilongozi wa hetwe nawali ubanzi wa wanhu wa Yuda kwa chiwalo cha kuwatanza wala wawele nawali wokola mijito ja kuzenga lukanzi. 17 Wala wawele wopika vinhu vya kuzenjela nawalutilila na mijito aku moko umwe uwele na vinhu vya kuzenjela na moko uyage chinhu cha heye cha kitowela ngondo. 18 Chila yalinguzenga nayali na ipanga lya heye liwopigwe mchuno mwa heye aku yolutilila kuzenga. Munhu wa kupemba mhalamhanda nayali hamwe na heni. 19 Nandiwalonjela wakulu na vilongozi na wanhu weng'ha, "Mijito aji ndo jing'hang'hale na najenela hali honhu hakulu, natwe natusambaluka ng'hatu mchanya mwa lukanzi, chila yumwe ka kutali na myage. 20 Houwa honhu honeche ukola mijito, chila mhela louhulika mhalamhanda, ubilimile kwa hetwe. Nguluwi wa hetwe kotulewela." 21 Ahyo, natulutilila kukola mijito ja hetwe. Nusu ya wanhu nawali webatilile vinhu vya kitowela ngondo kwaluchila mitondo mbaka nhondwe vyozoneche kilanga.

22 Mhela awo kahi nandiwalonjela wanhu, "Chila munhu na mtanzi wa heye wekale mgati mwa muji wa Yelusalemu kuli mhela wa nechilo, leka tuwe na wanhu wa kutwamila kuli mhela wa nechilo na kulutilila na mijito kuli mhela wa nemisi." 23 Ahyo, heni na wang'holozangu na vitumagwa wa heni na wamizi wawele nawali hamwe na heni, hatuvulile mivalo ja hetwe. Chila yumwe wa hetwe nayali na vinhu vya heye vya kitowela ngondo mmoko mwake chila mhela.