1 Loukolile mhela umwenga, nakulawila kung'ung'uta hali wanhu, walume na wache wa hewo wowang'ung'utila wang'holozawo Wayahudi. 2 Wamwe wa hewo nawali wolonga, "Hetwe na wasongolo wa hetwe na wahinza wa hetwe, ndo wenji. Ahyo, twangugana nyhule tulye leka tikale." 3 Wanji nawalonga, "Natuwika lehani migunda ja hetwe na migunda ja hetwe ja mizabibu na ng'handa za hetwe leka tuwe na nyhule kwa chiwalo cha mhela wa lufemba." 4 Nakwali na wanji kahi wawele nawali wolonga, "Naitugana kulanda kuwazichigwa sendi leka kulipa kodi ya mndewa kwa chiwalo cha migunda ja hetwe na migunda ja hetwe ja mizabibu. 5 Hetwe ndo kota Wayahudi wanji na wana wa hetwe ndo kota wana wa hewo. Twanguwadita wana wa hetwe wawe wapogozi kwa lupichi. Wahinza wa hetwe wamwenga nawawa wapogozi ila twahela ludali lwa kuwagombola kwa vila migunda ja hetwe na migunda ja mizabibu ja hetwe najiholigwa na wanji."

6 Lonyhuliche kung'ung'uta ako, nanzudila ng'hatu. 7 Nandijesa kumutwi kwa heni, hamba nandiwalonjeleza wakulu na vilongozi, nandiwalonjela, "Mwanguwabunza wang'holozenu kwa kuwadita walipe liba." Lelo, nandiwachema wanhu kuli nhing'hano kwa chiwalo cha mbuli ayo, 8 nandonga, "Natuwagombola kota vyotuwezile wang'holozetu Wayahudi wawele nawali waguzigwe kwa wanhu wa isi zinji. Ila sambi mwanguwadita wang'holozenu weguze wawo kwa hemwe!" Ahyo, nawenyamalila ne kwidichila.

9 Hamba nandiwalonjela, "Chomlingudita ndo chiha ng'hatu. Ndaze, hamlinguganigwa kumdumba Nguluwi wa hetwe leka kuwalemeza wanhu wa isi zinji wawele ndo wang'honyo wa hetwe waleche kulonga vibi kuwala hetwe? 10 Heni na wang'holozangu na vitumagwa wa heni natwazika sendi na nyhule, ila hatulingugana kuhilusilwa na liba. 11 Lelo muwahilusile migunda ja hewo na migunda ja mizabibu na migunda ja mizeituni na ng'handa za hewo zomholile na kahi mhiluse chasi cha mzidi cha nyhule na divai na mafuta viwele namvihola kwa hewo."

12 Nawedichila na kulonga, "Towahilusila na hatugana chinhu choneche mzidi kulawa kwa hewo. Todita kota vyoulonjile." Hamba nandiwachema watambika na kuwadita vilongozi na wakulu welahe hali watambika kota wodita kota vyowalonjile. 13 Nandikung'huna nguwo ya heni na kulonga, "Chila yumwe yawele hokweneza chilaho achi, Nguluwi yamkung'hune kota ahi na yahole chila chinhu cha heye na yamlavye kuli ng'handa ya heye na kuli mijito ja heye. Yasukuligwe leka yawe yalihela chinhu na yasigale ne chinhu." Nhing'hano yeng'ha nayidichila, "Ena," na nawamtogola Mkulu Nguluwi. Wanhu nawadita kota vyowelahile.

14 Kulawa mhela uwele nandali nyhaguligwe kuwa chilongozi wa isi ya Yuda, kwa miyaka kumi na mili, jiwele ndo kulawa mwaka wa makumi meli (20) mbaka mwaka wa makumi gadatu na mili (32) wa ulongozi wa mndewa Alitashasta, sikundile kubochela sendi kwa chiwalo cha kugula chilyo chilinguganigwa kuligwa na chilongozi, mbaka wang'holozangu kahi nawadita hihyo du. 15 Vilongozi wawele nawandongola, nawali itunyo kwa wanhu wogana kupegwa chilyo na divai na kugana kupegwa sendi migwala makumi gane (40). Vitumagwa wa vilongozi awo nawo kahi nawawabunza wanhu. Ila, heni siditile ahyo kwa vila nandali ndimdumba Nguluwi. 16 Ila, nandikangaza ng'hatu kuli mijito ja kuzenga kahi kwa lukanzi alu. Wanhu wa heni weng'ha naweting'hana hala kwa chiwalo cha mijito ajo. Hatuholile mgunda woneche. 17 Mzidi wa ago, Wayahudi na vilongozi miya imwe na makumi gahano (150) nawalya hali chisaga cha heni, hamwe na wala wanhu wawele nawoya kwa hetwe kulawa kuli isi zinji za habehi. 18 Chila zuwa leka wanhu awa walye, nandavya sendi kwa chiwalo cha ibuguma na ming'holo sita jinojile na ng'huku kwa chiwalo cha kudumuligwa singo. Chila mazuwa kumi logakolile, nandavya vihako vya ngozi viwele na divai ilivinji. Ila siganile kupegwa chasi cha sendi, chiwele ndo hachi ya heni ya ulongozi, kwa vila wanhu nawali na itunyo likulu lukami.

19 Lelo, gwa Nguluwi wa heni, ukumbuchile isungu lya heni lyeng'ha lyondiwaditile wanhu awa.