1 Lelo, vilongozi wa wanhu nawekala mujini Yelusalemu. Wanhu wasigale nawatowa simbi leka kuhagula ivyazi limwe hali kumi leka likale mujini Yelusalemu, muji welile. Lila ivyazi tisa lisigale likale kuli miji ja hewo. 2 Wanhu nawawatogola wala weng'ha wawele nawakunda kikala mujini Yelusalemu.

3 Wanhu wamwenga wa Isilaeli na watambika na Walawi na wakola mijito wa kuli ng'handa ya Nguluwi na walelwa wa wakola mijito wa Solomoni nawekala kuli honhu ha hewo, kuli miji ja Yuda, ila vilongozi wa mikowa nawekala mujini Yelusalemu na ivyazi lya hewo. 4 Wanhu wanji kulawa Yuda na Benjamini nawekala kuli muji wa Yelusalemu. Yumwe wa hewo kulawa kuli nhanzi ya Yuda nayali Ataya, mwana wa Usiya, mwana wa Sekaliya, mwana wa Amaliya, mwana wa Shefatiya, mwana wa Mahalaleli, yawele nayali ndo mlelwa wa Pelesi. 5 Yunji nayali Maaseya, mwana wa Baluku, mwana wa Kolihose, mwana wa Hasaya, mwana wa Adaya, mwana wa Yoyalibu, mwana wa Sekaliya, Mshilo. 6 Walelwa wa Pelesi wawele nawekala mujini Yelusalemu, nawali walume wazidahe kitowa ngondo miya zine na makumi sita na wanane (468).

7 Kulawa kuli nhanzi ya Benjamini, wanhu wawele nawekala mujini Yelusalemu, nawali Salu, mwana wa Meshulamu, mwana wa Yoedi, mwana wa Pedaya, mwana wa Kolaya, mwana wa Maaseya, mwana wa Itieli, mwana wa Yeshaya. 8 Wanji nawali Gabayi na Salayi, wang'holoze Salu. Hisabu ya hewo weng'ha nayali wanhu miya tisa na makumi meli na wanane (928). 9 Yoeli, mwana wa Sikili, nayali ndo chilongozi wa hewo, naye Yuda, mwana wa Hasenuwa, nayali chilongozi wa keli kuli muji kulawa heye.

10 Kulawa kwa watambika wawele nawekala mujini Yelusalemu nawali Yedaya, mwana wa Yoyalibu na Yakini 11 na Selaya, mwana wa Hilikiya, mwana wa Meshulamu, mwana wa Sadoki, mwana wa Melayoti, mwana wa Ahitubu, yawele nayali chilongozi wa ng'handa ya Nguluwi, 12 hamwe na wayawo wawele nawali wokola mijito kuli ng'handa ya Nguluwi, hisabu ya hewo nayali wanhu miya nane na makumi meli na weli (822). Hamwe na hewo nayali kahi Adaya, mwana wa Yelohamu, mwana wa Pelaliya, mwana wa Amusi, mwana wa Sekaliya, mwana wa Pashuli, mwana wa Malikiya 13 na wayawo wawele nawali vilongozi wa ivyazi. Hisabu ya hewo nayali wanhu miya mbili na makumi gane na weli (242). Kahi nakwali na Amashisayi, mwana wa Asaleli, mwana wa Ahisayi, mwana wa Meshilemoti, mwana wa Imeli, 14 hamwe na wayawo wazidahe kitowa ngondo. Hisabu ya hewo nayali wanhu miya imwe na makumi meli na wanane (128). Chilongozi wa hewo mkulu nayali Sabudieli, mwana wa Hagedolimu.

15 Kulawa kwa Walawi wawele nawekala mujini Yelusalemu nawali Shemaya, mwana wa Hashubu, mwana wa Asilikamu, mwana wa Hashabiya, mwana wa Buni. 16 Shabetayi na Yosabadi wawele nawali ndo vilongozi hali ng'holo za Walawi, nawali wololela mijito ja kunze mwa ng'handa ya Nguluwi. 17 Mataniya, mwana wa Mika, mwana wa Sabudi, mwana wa Asafu, yawele nayali chilongozi kuli mhela wa kulanda na wa kutogola, Bakibukiya, nayali yomtanza. Hamwe na hewo nayali Abuda, mwana wa Shamuwa, mwana wa Galali, mwana wa Yedutuni. 18 Hisabu ya Walawi weng'ha wawele nawekala mujini Yelusalemu, muji welile, nayali miya mbili na makumi nane na wane (284).

19 Wamizi wa lwizi wawele nawekala mujini Yelusalemu, nawali Akubu na Talimoni hamwe na wayawo wawele nawali wokwamila lwizi. Hisabu ya hewo nayali wanhu miya imwe na makumi saba na weli (172). 20 Waisilaeli wasigale, hamwe na watambika na Walawi, nawali kuli miji ja Yuda, chila yumwe kuli uhalizi wa heye. 21 Vitumagwa wa ng'handa ya Nguluwi, nawali wochikala kuli chidunda cha Ofeli. Siha na Gishipa nawali vilongozi wa hewo.

22 Chilongozi mkulu wa Walawi ako mujini Yelusalemu, nayali Usi, mwana wa Bani, mwana wa Hashabiya, mwana wa Mataniya, mwana wa Mika, wa lukolo wa Asafu, wawele nawali walingwimba, wawele nawakola mijito kwa chiwalo cha ng'handa ya Nguluwi. 23 Walingwimba nawali hasi ha ilajizo lya mndewa, kwa chiwalo cha mijito ja chila zuwa. 24 Petahiya, mwana wa Meshesabeli, wa lukolo wa Sela, mlelwa wa Yuda, nayali yomtanza mndewa kuwala mbuli zeng'ha zilinguwala wanhu wa Yuda.

25 Wanhu wenji nawekala kuli miji jiwele habehi na migunda ja hewo. Wala wawele nawalawa kuli nhanzi ya Yuda nawekala Kiliati-aliba na Diboni na Yekabuseeli na kuli vijiji viwele habehi na miji ajo. 26 Wanji kahi nawekala kuli miji ja Yeshuwa na Molada na Beti-peleti 27 na Hasali-shuali na Beeli-sheba na vijiji vyake. 28 Wanji nawekala kuli miji ja Sikilagi na Mekona na vijiji vyake. 29 Wanji nawekala kuli miji ja Eni-limoni na Sola na Yalimuti 30 na Sanowa na Adulamu hamwe na vijiji vya miji ajo na kuli Lakishi na migunda jake na kuli Aseka hamwe na vijiji vyake. Ahyo nawali wochikala kwaluchila Beeli-sheba mbaka kuli Ibindi lya Hinomu.

31 Walelwa wa Benjamini nawekala kuli miji ja Geba na Mikimashi na Aiya na Beteli na vijiji vyake. 32 Wanji nawekala kuli miji ja Anatoti na Nobu na Ananiya 33 na Hasoli na Lama na Gitaimu 34 na Hadidi na Seboimu na Nebalati 35 na Lodi na Ono na Ge-halashimu, iwele nalyali ndo ibindi lya Wawanzi. 36 Wanhu kulawa kuli vilundo vimwenga vya Walawi wa Yuda nawalajizwa wekale ako Benjamini.