1 Kuli zuwa lya makumi meli na zine (24) lya mwezi wuwo wa saba, wanhu wa Isilaeli nawekungajiza, wokwesela kulya na kuvala mivalo ja migunila na kibakaliza nhimbwisi kumutwi kulajila masinzo. 2 Mhela awo, walelwa wa Isilaeli nawali webagule kutali na wanhu wa isi zinji, nawema hali honhu hamwenga na kulonga gehile ga hewo na wihe wa wasekulu wa hewo kwa chiwalo cha kumgalamchila Nguluwi. 3 Kwa mhela wa kota saa zidatu nawema kuno malajizo ga Mkulu Nguluwi, Nguluwi wa hewo nagali gosomigwa na kwa mhela wa saa zidatu ziyage nawali wolonga gehile ga hewo na kumfugamila Nguluwi wa hewo.

4 Nakwali na Walawi wamwenga wawele nawali mchanya mwa ilingo lya Walawi. Walawi awo ndo Yeshuwa na Bani na Kadimieli na Shebaniya na Buni na Shelebiya na Bani na Kenani. Awo nawamlanda Mkulu Nguluwi, Nguluwi wa hewo, kwa lizi likulu. 5 Nawo Walawi, wawele ndo Yeshuwa na Kadimieli na Bani na Hashabuneya na Shelebiya na Hodiya na Shebaniya na Petahiya, nawawalonjela wanhu,

"Mwime na kumtogola Mkulu Nguluwi, Nguluwi wa hemwe.

Mumtogole mazuwa gose!"

Hamba yumwe wa Walawi nakalutilila kumlanda Nguluwi yolonga,

"Wanhu walitogole itagwa lya hegwe likulu,

liwele lyangutogoligwa kusinda utambichizo na lutogo lweng'ha.

6 Hegwe uliyeka ndo Mkulu Nguluwi.

Hegwe ndo nakulumba ulanga na wamizi weng'ha wa ako kilanga

isi na vyeng'ha viwele mgati mwake,

bahali na vyeng'ha viwele mgati mwake.

Hegwe nakuvidita vinhu vyeng'ha viwe vikomu

na wamizi wa kilanga wangukufugamila.

7 Hegwe ndo Mkulu Nguluwi, Nguluwi uwele nakumhagula Abulamu,

nakumlavya kulawa Uli ya Wakalidayo na kumha itagwa, Abulahamu.

8 Nakumona kota nakatanganika hali hegwe,

nakudita ilagano na heye kota kowapa walelwa wa heye

isi ya Wakanaani na Wahiti na Waamoli na Wapelisi na Wayebusi na Wagiligashi.

Nakweneza kulagana kwa hegwe kwa vila ndo uwele na hachi.

9 "Nakugona magazo ga wasekulu wa hetwe lowawele kuli isi ya Misili,

lowalandile utanzi wa hegwe kuli bahali ya Shamu, nakuwedichila.

10 Nakudita ulajilo na vinduzanduza kwa Falao,

na kwa vilongozi wa heye weng'ha na wanhu weng'ha wa isi ya heye,

kwa vila nakuvizela ndaze Wamisili vyowawaditile vibi wasekulu wa hetwe.

Nakiditila itagwa lilingikala mbaka lehano.

11 Nakuigawanula bahali hagati hali hewo,

leka wakole hagati hake hawele hali honhu hakalile,

ila nakuwatoza Wamisili wawawinzile mgati mwa mazi,

kota iganga likulu mgati mwa mazi menji.

12 Nemisi nakuwalongoza kwa izengo lya ng'hungugu,

nechilo nakuwalongoza kwa izengo lya chiluli, leka kuwalajila nzila.

13 "Nakudulika kuli chidunda cha Sinai, nakulongasa na hewo kulawa kilanga.

Nakuwapa malajizo na mizilo ja kukomya na ja hachi,

malajizo na mizilo jinojile.

14 Nakuwazelesa zuwa lya hegwe lyelile lya kwesela na kuwapa mizilo

na malajizo kwa kukolela chitumagwa wa hegwe Musa.

15 Kuli nzala nakuwapa chilyo kulawa kilanga,

kuli ng'halu nakuwapa mazi kulawa kuli italawe.

Nakuwalonjela wenjile na kuihola isi,

iwele nawali nakilaha kota kowapa.

16 "Ila wasekulu wa hetwe, nawali wajuvi na nhumbula zigagadale

nawalema kuwinza malajizo ga hegwe.

17 Nawalema kuhulichiza, hawakumbuchile vinduzanduza vyouditile hali hewo.

Nawali na nhumbula zigagadale,

na kuli kubelenhuka kwa hewo nawehagulila chilongozi,

leka wahiluche kuli upogozi wa hewo kuli isi ya Misili.

Ila hegwe ndo Nguluwi ulingulechela,

uwele na kunoga na isungu ng'hatu,

haulinguzudila himahima na kuna igano lya kwimilila.

Ahyo, huwalechile,

18 hanga nawegongomanyila limalukolo lya ilogota na kulonga,

‘Ayu ndo mlungu wa hetwe, yawele nakatulavya kulawa kuli isi ya Misili.’

19 "Kwa chiwalo cha winji wa isungu lya hegwe, huwalechile kula kuchiwala.

Mhela wa nemisi lila izengo lya ng'hungugu halilechile kuwalongoza kuli nzila ya hegwe,

ne izengo lya chiluli halilechile kuwalangazila nechilo nzila yowaganigwe kuluta.

20 Nakuwapa muhe wa hegwe yanojile leka yawalanguse.

Hulechile kuwapa mana iwe chilyo kuli milomo ja hewo,

na mazi kwa chiwalo cha ng'halu ya hewo.

21 Nakuwalolela kuchiwala kwa miyaka makumi gane.

Hawesilwe choneche na mivalo ja hewo hajilalile ne magulu ga hewo hagatunile.

22 "Nakuwadita wawasumye wandewa na wanhu wa isi zinji,

na kuzihola isi za hewo.

Nawaisumya isi ya Heshiboni koyawele yolongoza mndewa Sihoni,

na isi ya Bashani koyawele yolongoza mndewa Ogu.

23 Nakuwadita wana wa hewo wawe wenji kota nhondwe za kilanga,

nakuwegala kuli isi iwele nakulagana na wasekulu wa hewo kota wokwinjila na kuihola.

24 Ahyo, walelwa wa hewo nawaisumya isi ya Kanaani na kuihola.

Nakuwatanza kuwasumya wandewa na wanhu wa isi zinji,

na kuwaditila wang'honyo wa hewo kota vyowalingugana.

25 Nawajihola miji jiwele na ngome na isi iwele na mboto,

nawazihola ng'handa zimemile vinhu vilivinji vinojile,

na mideho na migunda ja mizabibu,

na migunda ja mizeituni na migodi jiwele na mafuza menji.

Nawalya na kiguta na kudedemka ng'hatu,

ahyo nawasangalala kwa chiwalo cha kunoga kwa hegwe kwinji.

26 Ila hawawele wa kukundigwa kwa hegwe.

Nawakubelenhuka, nawagaleka malajizo ga hegwe,

na kuwakopola waloli wawele nawawakanya, leka wakuhiluchile.

Nawakuliga ng'hatu.

27 Ahyo, nakuwawika mmoko mwa wang'honyo wa hewo, wawele nawawagaza.

Lowawele kuli magazo nawakulilila,

nagwe kulawa kilanga nakuhulika chililo cha hewo.

Na kwa isungu lya hegwe, nakuwalajiza wanhu leka wawalohole,

wawele nawawalohola kulawa mmoko mwa wang'honyo wa hewo.

28 "Lowawele welejehe nawadita gehile kahi hali hegwe,

nagwe nakuwaleka wawichigwe mmoko mwa wang'honyo wa hewo, wawele nawawalongoza kwa lupichi.

Lowakulilile kahi, kulawa kilanga nakuhulika,

kwa isungu lya hegwe, nakuwalohola chila mhela.

29 Nakuwakanya leka wahiluchile kuli malajizo ga hegwe,

ila nawali wajuvi hawajihulichize mizilo ja hegwe.

Nawagabelenhuka malajizo ga hegwe,

gawele wone munhu kogawinza malajizo ago, kochikala.

Kwa ujuvi nawagaleka malajizo,

nawali na nhumbula zigagadale, nawalema kuhulichiza.

30 "Kwa miyaka minji nakuwemilila.

Kwa nzila ya muhe wa hegwe,

nakuwakanya kwa kukolela waloli wa hegwe,

ila hawawahulichize, ahyo nakuwawika mmoko mwa wanhu wa isi zinji.

31 Ila kwa isungu lya hegwe likulu, huwalechile wadumigwe ne kuwasemwa,

kwa vila hegwe ndo Nguluwi uwele na kunoga na isungu.

32 "Lelo, gwa Nguluwi wa hetwe, Nguluwi mkulu,

uwele na mong'ho na ulingudumbiza,

kwangibatilila ilagano lya hegwe kwa igano lya kwimilila.

Magazo gawele nagatufika hetwe na wandewa wa hetwe na vilongozi wa hetwe,

na watambika wa hetwe na waloli wa hetwe,

na wasekulu wa hetwe na wanhu wa hegwe weng'ha,

kulawa mhela wa wandewa wa Ashulu mbaka lehano,

uleche kugona kota ndo mado.

33 Nawali na hachi ya kutuditila ahyo,

kwa vila hegwe nawali wa kukundigwa,

ila hetwe natwali tudita gehile.

34 Wandewa wa hetwe na wakulu wa hetwe,

watambika wa hetwe na wasekulu wa hetwe, hawawinzile malajizo ga hegwe.

Nawajibeza mizilo ja hegwe na makanyo ga hegwe.

35 Hanga nawali kuli undewa wa hewo,

wosangalala kwa chiwalo cha kunoga kwa hegwe kukulu,

kuli isi ng'hulu na iwele na mboto youwapele,

hawakukolele mijito ne kuzileka nzila za hewo zihile.

36 "Ila ulole, hetwe twa wapogozi,

wapogozi kuli isi youwapele wasekulu wa hetwe,

leka walye mafunza gake na vinhu viyage vinojile,

kulawa kuli isi ayo.

37 Kwa chiwalo cha gehile ga hetwe,

mbena nyinji za isi zangulutaga kwa wandewa uwawichile leka watulongoze.

Wangulongoza ng'huli za hetwe na migongolo ja hetwe kota vyowalingugana,

natwe twa kuli magazo makulu.

38 "Kwa chiwalo cha aga geng'ha, twanguwika ilagano na kugandika aga geng'ha. Vilongozi wa hetwe na Walawi na watambika wa hetwe, wanguwika muhuli."