1 Mijito ja kuzenga kahi lukanzi lojisindile na lwizi jeng'ha kuwichigwa kuli honhu hake na kahi kuhaguligwa kwa wamizi wa lwizi na walingwimba na Walawi, 2 nandimhagula mng'holozangu yalinguchemigwa Hanani leka yawe chilongozi wa kuli muji wa Yelusalemu, yokola mijito na Hananiya, yawele nayali chilongozi wa ngome kuli muji wa Yelusalemu, kwa vila nayali wa kukundigwa na yalingumdumba Nguluwi ng'hatu kusinda wanhu wanji. 3 Nandiwalajiza, "Lwizi jileche kuchumuligwa nechilo yeng'ha mbaka isanya holiwa kuchanya. Wamizi lowowa wang'hali kuka yanguganigwa kuhinda lwizi jeng'ha kwa mhajilo. Muwahagule wamizi wamwenga hali wenyeng'haye wa muji wa Yelusalemu kwamila lukanzi, wanji wawe hali honhu ha habehi na ng'handa za hewo."

4 Muji wa Yelusalemu nawali ugazi na ukulu, ila wanhu wake nawali wachefu na ng'handa nazali mahame hela. 5 Ahyo Nguluwi nakamha heni mong'ho wa kuwakungajiza wang'hangala na vilongozi na wanhu wanji leka kuzizela ng'holo za hewo. Namhata chitabu chiwele nachandichigwa kuwala ng'holo za wanhu wawele nawali wa mwaluko kuhiluka kulawa kuli isi ya chijenzi. Walinguwinza ndo wanhu wawele nawandichigwa mgati mwa chitabu acho.

6 Wano ndo wanhu wa mkowa wawele nawalawa kuli isi ya chijenzi, wawele Nebukadinesa, mndewa wa Babuloni, nayali yawahiliche kwa lupichi ako Babuloni, nawahiluka Yelusalemu na Yuda chila yumwe kuli muji wa heye. 7 Vilongozi wa hewo nawali Selubabeli na Yeshuwa na Nehemiya na Asaliya na Laamiya na Nahamani na Molidekayi na Bilishani na Misipeleti na Bigwayi na Nehumu na Baana. Ilinguya ndo hisabu ya wanhu weng'ha wa ng'holo za Isilaeli wawele nawahiluka kulawila kuli isi ya chijenzi. 8 Kulawa kuli lukolo lwa Paloshi, nawali elufu mbili na miya imwe na makumi saba na weli (2,172), 9 kulawa kuli lukolo lwa Shefatiya, nawali miya zidatu na makumi saba na weli (372), 10 kulawa kuli lukolo lwa Ala, nawali miya sita na makumi gahano na weli (652), 11 kulawa kuli lukolo lwa Pahati-moabu, wawele nawali ndo walelwa wa Yeshuwa na Yoabu, nawali elufu mbili na miya nane na kumi na nane (2,818), 12 kulawa kuli lukolo lwa Elamu, nawali elufu imwe na miya mbili na makumi gahano na wane (1,254), 13 kulawa kuli lukolo lwa Satu, nawali miya nane na makumi gane na wahano (845), 14 kulawa kuli lukolo lwa Sakayi, nawali miya saba na makumi sita (760), 15 kulawa kuli lukolo lwa Binuyi, nawali miya sita na makumi gane na nane (648), 16 kulawa kuli lukolo lwa Bebayi, nawali miya sita na makumi meli na nane (628), 17 kulawa kuli lukolo lwa Asigadi, nawali elufu mbili na miya zidatu na makumi meli na weli (2,322), 18 kulawa kuli lukolo lwa Adonikamu, nawali miya sita na makumi sita na saba (667), 19 kulawa kuli lukolo lwa Bigwayi, nawali elufu mbili na makumi sita na saba (2,067), 20 kulawa kuli lukolo lwa Adini, nawali miya sita na makumi gahano na wahano (655), 21 kulawa kuli lukolo lwa Ateli, yawele nakalawa kuli ivyazi lya Hesekiya, nawali makumi tisa na wanane (98), 22 kulawa kuli lukolo lwa Hashumu, nawali miya zidatu na makumi meli na wanane (328), 23 kulawa kuli lukolo lwa Besayi, nawali miya zidatu na makumi meli na wane (324), 24 kulawa kuli lukolo lwa Halifu, nawali miya imwe na kumi na weli (112), 25 kulawa kuli lukolo lwa Gibeoni, nawali makumi tisa na wahano (95).

26 Wanhu wa miji jilinguwinza nawo nawahiluka, wanhu wa muji wa Betelehemu na Netofahi, nawali miya imwe na makumi nane na nane (188), 27 kulawa kuli muji wa Anatoti, nawali miya imwe na makumi meli na nane (128), 28 kulawa kuli muji wa Beti-asimaweti, nawali makumi gane na weli (42), 29 kulawa kuli miji ja Kiliati-yealimu na Kefila na Beeloti, nawali miya saba na makumi gane na wadatu (743), 30 kulawa kuli miji ja Lama na Geba, nawali miya sita na makumi meli na yumwe (621), 31 kulawa kuli muji wa Mikimashi, nawali miya imwe na makumi meli na weli (122), 32 kulawa kuli miji ja Beteli na Ayi, nawali miya imwe na makumi meli na wadatu (123), 33 kulawa kuli muji wa Nebo, nawali makumi gahano na weli (52), 34 kulawa kuli muji wa Elamu yinji, nawali elufu imwe na miya mbili na makumi gahano na wane (1,254), 35 kulawa kuli muji wa Halimu, nawali miya zidatu na makumi meli (320), 36 kulawa kuli muji wa Yeliko, nawali miya zidatu na makumi gane na wahano (345), 37 kulawa kuli miji ja Lodi na Hadidi na Ono, nawali miya saba na makumi meli na yumwe (721), 38 kulawa kuli muji wa Senaa, nawali elufu zidatu na miya tisa na makumi gadatu (3,930).

39 Ayi ndo hisabu ya watambika wawele nawahiluka kulawa kuli isi ya chijenzi. Kulawa kuli lukolo lwa Yedaya, wawele nawali ndo walelwa wa Yeshuwa, nawali miya tisa na makumi saba na wadatu (973), 40 kulawa kuli lukolo wa Imeli, nawali elufu imwe na makumi gahano na weli (1,052), 41 kulawa kuli lukolo lwa Pashuli, nawali elufu imwe na miya mbili na makumi gane na saba (1,247), 42 kulawa kuli lukolo lwa Halimu, nawali elufu imwe na kumi na saba (1,017).

43 Walawi wa lukolo lwa Yeshuwa, yawele ndo Kadimieli, walelwa wa Hodaviya wawele nawahiluka kulawa kuli isi ya chijenzi, nawali makumi saba na wane (74). 44 Walingwimba, wawele ndo walelwa wa Asafu, nawali miya imwe na makumi gane na wanane (148). 45 Wamizi wa lwizi lwa ng'handa ya Nguluwi, wawele ndo walelwa wa Shalumu na wa Ateli na wa Talimoni na wa Akubu na wa Hatita na wa Shobayi, nawali miya imwe na makumi gadatu na wanane (138).

46 Vitumagwa wa ng'handa ya Nguluwi wawele nawahiluka kulawa kuli isi ya chijenzi, nawalawa kuli lulelo lwa Siha na lwa Hasufa na lwa Tabaoti 47 na lwa Kelosi na lwa Siya na lwa Padoni 48 na lwa Lebana na lwa Hagaba na lwa Shamulayi 49 na lwa Hanani na lwa Gideli na lwa Gahali 50 na lwa Leaya na lwa Lesini na lwa Nekoda 51 na lwa Gasamu na lwa Usa na lwa Paseya 52 na lwa Besayi na lwa Meunimu na lwa Nefushesimu 53 na lwa Bakibuki na lwa Hakufa na lwa Halihuli 54 na lwa Basiliti na lwa Mehida na lwa Halisha 55 na lwa Balikosi na lwa Sisela na lwa Tema 56 na lwa Nesiya na lwa Hatifa.

57 Walelwa wa vitumagwa wa mndewa Solomoni wawele nawahiluka kulawa kuli isi ya chijenzi, nawalawa kuli lulelo lwa Sotayi na lwa Sofeleti na lwa Pelida 58 na lwa Yaala na lwa Dalikoni na lwa Gideli 59 na lwa Shefatiya na lwa Hatili na lwa Pokeleti-hasebaimu na lwa Amoni.

60 Lelo vitumagwa weng'ha wa ng'handa ya Nguluwi na walelwa wa vitumagwa wa Solomoni, wawele nawahiluka kulawa kuli isi ya chijenzi, nawali miya zidatu na makumi tisa na weli (392). 61 Wanhu wa miji ja Teli-mela na Teli-halisha na Kelubu na Adoni na Imeli, nawo nawahiluka ila hawawezile kutawiza kota nawali walelwa wa Waisilaeli. 62 Hewo nawali walelwa wa Delaya na wa Tobiya na wa Nekoda, ahyo hisabu ya hewo weng'ha, nawali miya sita na makumi gane na weli (642).

63 Wanhu wa ng'holo za watambika kahi nawahiluka. Wanhu awo nawali kulawa kuli lukolo lwa Habaya na lwa Hakosi na lwa Balisilayi. Ayo Balisilayi nayali yamhesile mhinza wa Balisilayi wa Gileadi, ahyo nakamula kuhola itagwa lilyo, Balisilayi. 64 Awo nawapala hisabu ya hewo kuli kukumbuchila kwa vitabu vya ng'holo, ila hawoneche amo. Lelo hawakundizwe kuuhola utambika kwa vila nawoneka ndo wakokomoche. 65 Chilongozi wa mkowa nakawalonjela kota hawalingukundigwa kihanza kuli chilyo chelile ng'hatu, mbaka yawe baho mtambika yawele yoweza kulavya ulonzi kulawa kwa Nguluwi kwa kutumiya maganga ga Ulimu na Sumimu.

66 Wanhu weng'ha wawele nawahiluka kulawa kuli isi ya chijenzi, hisabu ya hewo nayali elufu makumi gane na mbili na miya zidatu na makumi sita (42,360). 67 Nakwali na vitumagwa walume na wadala elufu saba na miya zidatu na makumi gadatu na saba (7,337) na walingwimba walume na wadala, weng'ha nawali miya mbili na makumi gane na wahano (245). 68 Nawali na falasi miya saba na makumi gadatu na sita (736) na migongolo kota midogowi mikulu miya mbili na makumi gane na jihano (245) 69 na ngamiya miya zine na makumi gadatu na wahano (435) na midogowi elufu sita na miya saba na makumi meli (6,720).

70 Vilongozi wamwenga wa ivyazi nawatanza mijito ja kuzenga kahi ng'handa ya Nguluwi. Chilongozi wa mkowa nakalavya kilo nane za zahabu na visaye makumi gahano (50) na mivalo ja watambika miya zihano na makumi gadatu (530). 71 Wakulu wanji wa ivyazi nawalavya kilo miya imwe na makumi gahano na zidatu (153) za zahabu na kilo elufu imwe na miya zine na makumi sita (1,460) za sendi. 72 Ndolendole za wanhu wanji weng'ha, nazali kilo miya imwe na makumi gahano na zidatu (153) za zahabu na kilo elufu imwe na miya zidatu na makumi gadatu (1,330) za sendi na mivalo ja watambika makumi sita na saba (67).

73 Lelo, watambika na Walawi na wamizi wa lwizi lwa ng'handa ya Nguluwi na walingwimba na vitumagwa wa ng'handa ya Nguluwi, hamwe na wanhu wanji wamwenga na Waisilaeli wasigale, nawekala kuli miji jawo.

Loufichile mwezi wa saba, Waisilaeli nawali kuli miji jawo.