1 Kuli zuwa alyo lya mnvina, chitabu cha Musa nachisomigwa kwa lizi likulu na wanhu weng'ha nawahulika. Kuli honhu hamwenga ha chitabu acho nahandichigwa kota Waamoni na Wamoabu hawalingukundigwa kihanza kuli nhing'hano ya wanhu wa Nguluwi, 2 kwa vila hawawabochele Waisilaeli kwa chilyo na mazi lowalawile Misili, ila nawamha sendi Balaamu leka yawapanjile wanhu wa Isilaeli, ila Nguluwi wa hetwe nakagalula upanjilo na kuwa utambichizo. 3 Wanhu wa Isilaeli lowahuliche ilajizo ali, nawawabagula wanhu weng'ha wa isi za chijenzi.

4 Kung'hali zuwa lya mnvina, mtambika Eliashibu nayali yawichigwe yawe yololela vihengo vya ng'hano ya ng'handa ya Nguluwi wa hetwe. Heye na Tobiya nawali munhu na mng'holoze, 5 naye Eliashibu nayali yampele Tobiya chihengo chikulu chiwele aho hamwande nachali chiwichilwa nhambiko za nyhule na ubani na vinhu vya ng'handa ya Nguluwi, hamwe honhu hamwe ha kumi ha nyhule na divai inyale na mafuta, viwele Waisilaeli nawalajizwa kulavya kwa chiwalo cha Walawi na walingwimba na wamizi wa lwizi, hamwe na ndolendole kwa chiwalo cha watambika. 6 Mhela mbuli azi zeng'ha loziwele zikoleka, siwele Yelusalemu, kwa vila kuli mwaka wa makumi gadatu na mbili (32) wa ulongozi wa Alitashasta, mndewa wa Babuloni, nandali nyiluche kwa mndewa. Hamba nandimlanda kuhiluka, naye nakang'hundiza kuhiluka. 7 Lonyiluche Yelusalemu nandiizela mbuli ya wihe iwele nakaidita Eliashibu kwa kumha Tobiya chihengo kuli lugagala lwa ng'handa ya Nguluwi. 8 Nanzudila ng'hatu na kuvitoza kunze vinhu vyeng'ha vya Tobiya. 9 Nandiwalonjela wachihelize chihengo, hamba nandivihilusa vinhu vya ng'handa ya Nguluwi, hamwe na nhambiko za nyhule na ubani.

10 Nandivizela kahi kota Walawi hawapegwe honhu hamwe ha kumi hawele nawali woganigwa kupegwa, nawo Walawi weng'ha na walingwimba wawele nawali wokola mijito, nawali wahiluche kuli migunda ja hewo. 11 Ahyo, nandiwang'hanuchila vilongozi na kuwauza, "Lekachoni ng'handa ya Nguluwi naibezigwa?" Hamba nandiwachema na kuwakungajiza hamwe Walawi na walingwimba na kuwahilusa hali honhu hawo ha mijito. 12 Hamba wanhu weng'ha wa Yuda nawaluka kahi kigala honhu hamwe ha kumi ha nyhule na divai inyale na mafuta kuli ng'hano. 13 Nandimuwika mtambika Shelemiya na yalingwandika Sadoki na Pedaya, Mlawi, leka wawe wololela ng'hano. Hanani, mwana Sakuli, mwana Mataniya nayali yowatanza. Awo weng'ha nawali wa kukundigwa na mijito ja hewo najali ndo kuwagawila wang'holozawo vinhu vyowalinguganigwa kupegwa chila zuwa.

14 Ahyo nandanda ndilonga kota gwa Nguluwi wa heni, ung'humbuchile kwa ali, uleche kusa chila chonditile kwa igano lya kwimilila na kwa chiwalo cha ng'handa ya hegwe na kwa chiwalo cha mijito ja hegwe.

15 Kuli mazuwa ago nandiwona wanhu wa Yuda wokama zabibu kuli Zuwa lya Kwesela na kigala nyhule na divai na zabibu na tini na mhomolo ziyage kwa midogowi. Vinhu avi vyeng'ha nawali wovihilika Yelusalemu kuli Zuwa lya Kwesela. Ahyo, nandiwakanya leka waleche kuguza vinhu kuli zuwa alyo. 16 Wanhu wanji kulawa muji wa Tilo wawele nawali wochikala Yelusalemu, nawegala somba na vinhu viyage kuli muji wa Yelusalemu na kuwaguzila wanhu wa Yuda kuli Zuwa lya Kwesela. 17 Nandiwang'hanuchila vilongozi wa wanhu wa Yuda na kuwalonjela, "Ndo wihe wachi awu womlinguudita kwa kulibeza Zuwa lya Kwesela? 18 Ndaze, wasekulu wa hemwe hawaditile wihe kota awu na kwambuza Nguluwi wa hetwe kutigalila kubagama aku hamwe na muji awu? Lelo mwangulutilila kigala kuzudila kwa heye kwa wanhu wa Isilaeli kwa kulibeza Zuwa lya Kwesela."

19 Mhela wa kuzinga kwa isanya louwele habehi, nandajiza lwizi ja muji wa Yelusalemu jihindigwe na jileche kuchumuligwa mbaka Zuwa lya Kwesela holimala. Nandiwawika wanhu wa heni wamwenga kuli lwizi leka chinhu choneche chileche kwinjizwa mgati mwa muji kuli Zuwa lya Kwesela. 20 Mala imwe ama mbili walingugula na kuguza vinhu, nawawasa hanze ha muji wa Yelusalemu mhela wa nechilo. 21 Nandiwakanya na kuwalonjela, "Lekachoni mwanguwasa habehi na lukanzi? Wone modita kota hino kahi, ndowagaza." Kulawa zuwa lila hawoyile kahi kuli Zuwa lya Kwesela. 22 Hamba nandiwalajiza Walawi kiyeliza na kuluta kwamila lwizi leka kulilolela Zuwa lya Kwesela liwe lyelile. Nandanda kahi ndilonga kota,

gwa Nguluwi wa heni, ung'humbuchile kwa isungu kwa chiwalo cha gonditile,

undajile igano lya kwimilila lya hegwe,

kwa kiwhana na kunoga kwa hegwe kukulu.

23 Mzidi wa ago, nandiwona Wayahudi wawele nawawahesa wadala kulawa Ashidodi na Amoni na Moabu. 24 Nusu ya wana wa hewo nawali wolonga Chiashidodi ama ndonga ya wanhu wanji, ila hawawezile kulonga Chiyuda. 25 Nandiwang'hanuchila na kuwapanjila. Nandiwatowa walume wamwenga na kutupula mnvili za hewo. Nandiwadita welahe kwa itagwa lya Nguluwi kota wawalemeze wahinza wa hewo kuhesigwa na wasongolo wa isi ya chijenzi ne wasongolo wa hewo waleche kuwahesa wahinza wa isi ya chijenzi. 26 Nandiwalonjela, "Ndaze, Solomoni haditile gehile kwa chiwalo cha wadala wa kota ahyo? Heye nayali mndewa mkulu kusinda wandewa wa wanhu wa isi zinji. Nguluwi nakamgana na kumdita kuwa mndewa wa wanhu weng'ha wa Isilaeli, ila wadala wa isi zinji nawamwambuza yadite gehile. 27 Ndaze, tuwawinze hemwe kwa kudita gehile aga makulu ga kuleka kumhulichiza Nguluwi wa hetwe kwa kuhesa wadala wa chijenzi?"

28 Yumwe wa wana wa Yoyada, mwana wa mtambika mkulu Eliashibu, nayali yamhesile mhinza wa Sanibalati, Mholoni. Lelo, kwa chiwalo acho, nandimuwinga hali heni. 29 Gwa Nguluwi, ukumbuchile ndaze wanhu awo vyowauditile utambika na ilagano lya chiutambika na lya Walawi viwe vikokomoche.

30 Ahyo, nandiweliza wanhu kwa chiwalo cha chinhu choneche chiwele ndo cha chijenzi. Nambika goya malajizo kwa chiwalo cha watambika na Walawi kuwala mijito ja chila yumwe wa hewo. 31 Nandali ndilolela na kutawiza kahi kota ndolendole za ngodi zangulavigwa kuli honhu ha kulavila nhambiko kuli mhela ulinguganigwa. Nandali ndilolela kahi kota mafuza ga mwaluko nagagaligwa kwa mhela uwichigwe. Nasinda kwa kulonga kota gwa Nguluwi, ung'humbuchile na unditile ganojile.