1 Mndewa Ahasuelo loyalongoze, undewa wa heye nawali mikowa miya imwe na makumi meli na saba (127), kulawa kuli Bala la Hindi mbaka Kushi. 2 Mhela awo Ahasuelo loyawele yolongoza, chigoda cha heye cha undewa nakachiwika kuli muji wa Susa.

3 Kuli mwaka wa kadatu wa ulongozi wa heye, mndewa Ahasuelo nakadita mnvina kwa chiwalo cha wakulu wa heye weng'ha hamwe na wang'hangala wa heye. Nakawalalika vilongozi wa wamizi wa Pelisiya na Mediya na wakulu na vilongozi wa mikowa. 4 Lelo, kwa mhela wa myezi sita, mndewa Ahasuelo nakalajila lufufu lwa undewa wa heye ukulu na lutogo lwa ulongozi wa heye.

5 Mhela awo loumalile, mndewa nakawaditila mnvina wanhu weng'ha wakulu na wadodo wawele nawali kuli ngome ya muji wa Susa. Nakaidita mnvina ayo kwa mhela wa mazuwa saba kuli kagunda ka mndewa. 6 Kagunda ako nakali na mipaziya ja kitani nzelu na buluu, jihowigwe ng'weso za kitani nzelu na chibende cha zambalau kuli pete za sendi mchanya mwa ilingo lilingupulika. Nakwali na makochi ga zahabu na ga sendi gawele nagali gawichigwe kuli yila sakafu igongomanyigwe kwa maganga ga sendi nyinji ga lanji galingupulika na maganga ganji. 7 Wanhu nawapegwa divai kuli vizombe vya zahabu, chila yumwe yawele na chizombe chiwele nachinoligwa chilivinji na myage, naye mndewa nayali na isungu ng'hatu kwa divai ya chiundewa. 8 Kwa malajizo ga mndewa, chila munhu nakakundizwa yanwe vyoimnojeza, kwa vila mndewa nakalavya malajizo kwa vitumagwa weng'ha walinguwapa wanhu divai, kuwegalila chila yumwe vyoyogana. 9 Mhela wuwo du, naye Vashiti, mche wa mndewa, nakawaditila mnvina wadala mgati mwa ng'handa ya mndewa Ahasuelo.

10 Kuli zuwa lya saba lya mnvina ayo, mhela mndewa Ahasuelo loyawele yasangalale kwa chiwalo cha divai yanwele, nakawalonjela matowashi saba wawele nawali womkolela mijito, wawele ndo Mehumani na Bisita na Halibona na Bigita na Abagita na Setali na Kalikasi, 11 wamigale Vashiti, mche wa mndewa hali mndewa yawele yavalile kofia ya mche wa chiundewa leka yalajile kunoga kwa heye hali wanhu na wakulu, kwa vila nayali yanojile ng'hatu. 12 Ila mhela matowashi lowalutile kumlonjela Vashiti, heye Vashiti nakalema kuluta. Ahyo, mndewa nakazudila ng'hatu.

13 Kwa vila nachali ndo chihendo kwa mndewa kulongasa na wanhu wawele na luhala kuli mbuli za malajizo na hachi, nakalongasa na hewo wawele nawavizela mhela leka wamlonjele choni choyalinguganigwa kudita. 14 Wanhu wawele nawali womlonjela mbuli zilivinji nawali ndo Kalishena na Shetali na Adimata na Talishishi na Melesi na Malisena na Memukani, vilongozi saba wa Pelisiya na Mediya wawele ndo wang'hangala kuli ulongozi wa heye. 15 Mndewa nakauza, "Kwa kiwhana na malajizo, Vashiti, kanguganigwa kuditilwa choni? Mche wa mndewa nakagabeza malajizo ga heni mndewa Ahasuelo, gawele matowashi nawamhilichila."

16 Lelo Memukani nakedichila hali mndewa na wakulu, "Vashiti haditile nongwa kwa mndewa yaliyeka, nakawaditila nongwa kahi vilongozi weng'ha na wanhu wa honhu heng'ha ha mndewa Ahasuelo. 17 Kwa vila mbuli ayi ya Vashiti yozeleka kwa wadala weng'ha, ahyo wowabeza walume wa hewo na kulonga, ‘Mndewa Ahasuelo nakalajiza Vashiti yahilikwe hali heye, ila nakalema.’ 18 Lehano wache wa wakulu wa Pelisiya na Mediya wawele nawahulika kuwala mbuli ayi, wowaditila wakulu weng'ha wa mndewa hihyo. Hakuweza kuwa na kuduma kwa kubeza na kilewa. 19 Ahyo, kota yomnojeza mndewa, yalavye mzilo wa chiundewa na mzilo awo wandichigwe kuli malajizo ga Pelisiya na Mediya, uwele hauweza kugaluka, kota Vashiti mazuwa gose yaleche kuya kahi hali mndewa Ahasuelo. Kahi mndewa yose ukulu wa heye na kumha mdala yunji yawele goya kusinda heye. 20 Lelo mbuli ayi ya mndewa hoiwikuligwa kuli chila honhu, wadala weng'ha wowahulichiza walume wa hewo, yawele mzunwa ama yawele na lufufu."

21 Mndewa na wakulu wa heye nawanojezwa kwa ulonzi awu, ahyo mndewa nakadita kota Memukani vyoyalonjile. 22 Nakahilika baluwa kuli honhu heng'ha ha undewa wa heye na kuli chila mkowa kwa baluwa zandichigwe kwa chila wanhu kuli ndonga za hewo wawo, yowikula kota chila mlume kanguganigwa yawe chilongozi wa ng'handa ya heye yuye.