1 Zuwa lya kadatu, Esta nakavala mivalo ja heye ja mche wa mndewa, naye nakema kuli lugagala lwa mgati mwa ng'handa ya mndewa, kumwando mwa chipepela cha mndewa. Naye mndewa nayali yekalise kuli chigoda cha heye cha undewa kuli chipepela yolola kuli lwizi. 2 Mndewa loyamuwene Esta yemile kuli lugagala nakanojezwa naye, nakamgololela ng'hweku ya ulongozi ya zahabu yila iwele mmoko mwa heye. Ahyo Esta nakahejela na kudoliza kuli kuduma kwa yila ng'hweku ya mndewa. 3 Mndewa nakamuuza Esta, "Kwangugana choni? Ndonjele choulingugana, hanga yowa nusu ya undewa wa heni, kopegwa." 4 Esta nakamwidichila, "Wone hegwe mndewa konojezwa, hegwe hamwe na Hamani muye lehano kuli mnvina iwele nandiiwika goya kwa chiwalo cha hegwe mndewa." 5 Mndewa nakalonga, "Mmigale himahima Hamani leka tudite lila Esta loyalandile." Ahyo mndewa na Hamani nawaluta kuli mnvina iwichigwe goya na Esta. 6 Lowawele wonwa divai, mndewa nakamuuza kahi Esta, "Lelo kwangugana choni? Ulonje nani ndokupa hanga yowa nusu ya undewa wa heni, kopegwa." 7 Esta nakedichila, "Chondilingulanda na chondilingugana ndo achi. 8 Wone hegwe mndewa konojezwa na wone namhegwa uganililo kwa hegwe na kota konojezwa kumha heni chondandile na kweneza kulanda kwa heni, hegwe mndewa na Hamani muye kwa heni hamitondo kuli mnvina iwele ndowawichila goya. Hamba ndokwidichila kuuza kwa hegwe mndewa."

9 Hamani nakalawa ako kuli mnvina yawele yasangalale ng'hatu mnhumbula. Ila loyamuwene Molidekayi hali lwizi lwa ng'handa ya mndewa, hambe yeme ne kumhulichiza, Hamani nakawa na ng'halazi. 10 Ila Hamani nakelemeza, nakaluta kaye. Hamba nakawalalika kaye kwa heye goloko wa heye na kumlanda Seleshi, mche wake leka yelumbe na hewo. 11 Naye Hamani nakaluka kulonga kuwala lufufu loyawele nalo na wasongolo woyawele nawo na ndaze mndewa vyoyamditile yawe chilongozi mkulu na ndaze vyoyapegwe lutogo mzidi kusinda wang'hangala wanji weng'ha wa mndewa. 12 Hamani nakonjeza, "Hagawele ago hela. Heni ndiliyeka ndo mbele Esta nakalalika kumhilika mndewa kuli mnvina iwele nakamuwichila goya. Naye nakatulalika heni hamwe na mndewa hamitondo. 13 Ila geng'ha aga hagalingunojeza heni, wone ndolutilila kumona yula Myahudi Molidekayi kuli lwizi lwa ng'handa ya mndewa."

14 Lelo Seleshi na goloko wa heye weng'ha nawamlonjela hino, "Ugongomanye honhu ha kuniniza na kuwakopola wanhu hawele na wimo wa mita makumi meli na mbili (22), hamba hamitondo umlande mndewa leka Molidekayi yaninizwe mchanya mwa honhu aho, hamba ulute na mndewa kuli mnvina kwa kusangalala." Majesa ago nagamdita Hamani yasangalale, naye nakahagongomanya honhu ha kuniniza na kuwakopola wanhu.