1 Nechilo ayo, mndewa hapatile usinjizi. Lelo nakalajiza yegalilwe chitabu cha kukumbuchila chiwele nachandichigwa mbuli za chila zuwa za ulongozi wa heye, yasomelwe. 2 Kuli chitabu acho nayoneka ndaze Molidekayi vyoyaizele na kuhilika mbuli yihile ya kumkopola mndewa Ahasuelo, iwele Bigitana na Teleshi, wamwe wa matowashi wa mndewa, wawele nawali ndo wamizi wa lwizi ja ng'handa ya mndewa, vyowawele wewichile goya kudita mbuli ayo. 3 Mndewa nakauza, "Ndaze, natumha Molidekayi lutogo ama chonolo chachi kwa mbuli ayi yaiditile?" Vitumagwa wa heye nawamwidichila, "Hatuditile chinhu kwa chiwalo cha heye." 4 Mndewa nakauza, "Hana mng'hangala yoneche kuli lugagala?" Mhela awo Hamani nayali yenjile kuli lugagala lwa kuze lwa ng'handa ya mndewa, nakaluta kwa mndewa kulanda Molidekayi yakopoligwe hali honhu ha kuniniza na kukopola wanhu hawele nayali yasindile kuhagongomanya, kwa chiwalo cha Molidekayi. 5 Lelo, vitumagwa nawamlonjela mndewa, "Hamani ka kuli lugagala." Mndewa nakalonga, "Mumlonjele yoye mgati."

6 Hamani loyenjile mgati, mndewa nakamuuza, "Ndaze, ndimditile choni munhu yawele nangana ng'hatu kumha lutogo?" Lelo Hamani nakejesa mnhumbula mwa heye, "Ndo whaani ayo yawele mndewa nayali yogana kumha lutogo? Ne majesa ndowa heni." 7 Ahyo Hamani nakamwidichila mndewa, "Kuwala munhu ayo yawele mndewa nakagana kumha lutogo, 8 vitumagwa wa mndewa wanguganigwa wamigalile mivalo jinojile jiwele mndewa nakawahika kujivala na falasi wa mndewa yawele nakavalizwa kofia ya chiundewa kumutwi kwa heye. 9 Hamba, yumwe wa vitumagwa wa hegwe yawele na lutogo ng'hatu yamvalize munhu ayo mivalo ajo ja chiundewa na kumhilika munhu ayo yawele yakwinile falasi wa hegwe mbaka hagati ha muji kuno yowikula, ‘Ahi ndo vyoyalinguditilwa munhu yawele mndewa nakagana kumha lutogo.’ " 10 Aho mndewa nakamlajiza Hamani, "Udite himahima! Uhole mivalo ajo na falasi, ukamhe lutogo alu Molidekayi, Myahudi yalingikalisa kuli lwizi lwa ng'handa ya mndewa. Uleche kuleka kumditila mbuli yoneche hali azi zoulonjile." 11 Lelo Hamani nakahola mivalo jila na kumvaliza Molidekayi. Nakamkwiniza mchanya mwa falasi wa mndewa na kumjendeza mbaka hagati ha muji kuno yowikula, "Ahi ndo vyoyalinguditilwa munhu yawele mndewa nakagana kumha lutogo." 12 Hamba Molidekayi nakahiluka kuli lwizi lwa ng'handa ya mndewa. Ila Hamani nakabilimila kaye kwa heye kuno yagubiche kumeho kwa heye kwa chiwalo cha soni. 13 Loyawele ako kaye kwa heye, Hamani nakawalonjela Seleshi na goloko wa heye weng'ha kuwala gala gamfichile. Seleshi na awo goloko wa heye nawamlonjela, "Wone ayu Molidekayi, yawele hegwe Hamani nakwaluka kwajiliza ludali lwa hegwe hali heye ndo wa nhanzi ya Wayahudi, lelo, huweza kumsumya, kokusumya ng'hatu."

14 Lowawele wang'hali wolonga ago, matowashi wa mndewa nawaluta himahima kumuhola Hamani na kumhilika kuli mnvina ya Esta.