1 Molidekayi loyavizelele kuwala ago geng'ha gawele nagalawila, nakadadula mivalo ja heye, nakavala ivalo lya igunila kwa masinzo na kibakaliza mivu. Hamba, nakakola kuli chila honhu kuli muji yolila kwa lizi likulu na kwa usungu lukami. 2 Nakaluta mbaka hali lwizi lwa mndewa na kwima hala, kwa vila haduhu yoneche yawele nayali yokundizwa kwinjila kuli ng'handa ya mndewa yawele yavalile ivalo lya igunila. 3 Kuli chila mkowa uwele ilajizo lya mndewa naliwikuligwa, nakwali na masinzo makulu hali Wayahudi. Nawesela kulya na kulila na kulombocheza. Wanhu wenji nawawasa kuli mivu kuno wavalile mivalo ja migunila.

4 Vitumagwa wadala wa Esta na matowashi lowoyile kumlonjela Esta kuwala Molidekayi, Esta nakawa na lunhwinhwi ng'hatu. Nakawalajiza vitumagwa wamhilichile Molidekayi nguwo leka yavale nguwo azo honhu ha mivalo ja migunila, ila Molidekayi nakalema. 5 Hamba Esta nakamchema Hataki, yumwe wa matowashi wa mndewa, yawele nayali na mijito ja kumlolela Esta, nakamlajiza kwa Molidekayi leka yavizele choni chilingumtunya Molidekayi. 6 Lelo Hataki nakaluta kwa Molidekayi kuli chalanza chiwele hali lwizi lwa ng'handa ya mndewa. 7 Molidekayi nakamlonjela Hataki chila chinhu chimfichile, hamwe na hisabu yeng'ha ya sendi ziwele Hamani nakalonga kota kolipa kulawa kuli ng'hano ya mndewa kwa chiwalo cha kuwadumya Wayahudi. 8 Molidekayi nakamha Hataki baluwa leka yaihiliche kwa Esta. Baluwa ayo nayandichigwa ilajizo lilinguwala kudumigwa kwa hewo, iwele nayandichigwa ako Susa. Molidekayi nakamlonjela chitumagwa ayo yamlonjele Esta yalute hali mndewa kulanda isungu na kumdedeza kwa chiwalo cha wanhu wa heye. 9 Hataki nakahiluka kwa Esta na kumlonjela goyalonjile Molidekayi. 10 Hamba Esta nakamlajiza Hataki yamlonjele Molidekayi, 11 "Vitumagwa weng'ha wa mndewa na wanhu wa mikowa ja undewa wanguvizela kota mlume ama mdala yoneche yawele yokwinjila kumona mndewa kuli lugagala lwa mgati ne kuchemigwa, mndewa kana ilajizo limwe hela, liwele ndo kukopoligwa. Nzila isigale ndo mndewa kumgololela ng'hweku ya heye ya zahabu leka yekale. Ila mazuwa makumi gadatu nagamala kulawa hala lonyhemigwe kuluta kwa mndewa." 12 Molidekayi loyalonjelwe kuwala ulonzi wa Esta, 13 nakamwidichila Esta, "Uleche kijesa kota kwa vila hegwe kwa ako kuli ng'handa ya mndewa, lelo hegwe uliyeka hali Wayahudi weng'ha ndo kowa mkomu. 14 Kwa vila wone konyamalila hela mhela awu, utanzi wa ugombozi wa Wayahudi wolawa honhu hanji, ila hegwe na ivyazi lya mhaza wa hegwe modumigwa. Whaani yalinguvizela kota huyile kuli honhu ha ludali kwa chiwalo cha mhela kota awu?"

15 Hamba Esta nakalajiza usenga awu kwa Molidekayi, 16 "Ulute ukawakungajize hamwe Wayahudi weng'ha wawele ako Susa, namwe mwesele kulya kwa chiwalo cha heni. Mleche kulya ne kunwa kwa mazuwa gadatu, nemisi na nechilo. Heni na vitumagwa wadala wa heni tokwesela kulya kota vyomlingudita. Hamba ndokwinjila kwa mndewa, hanga hailingukundigwa. Wone ndokopoligwa, leka ng'hopoligwe."

17 Ahyo Molidekayi nakaluta kudita kota Esta vyoyamlajize.