1 Ahyo mndewa na Hamani nawaluta kulya chilyo hamwe na Esta. 2 Lowawele wonwa divai kuli zuwa lya keli, mndewa nakamuuza kahi Esta, "Kwangugana choni? Ndonjele choulingugana, hanga yowa nusu ya undewa wa heni, kopegwa." 3 Esta nakedichila, "Wone namhegwa uganililo hali hegwe, gwa mndewa na wone kahi konojezwa na heni, ulohole ukomu wa heni na wa wanhu wa heni. Achi ndo chondilingulanda kulawa kwa hegwe. 4 Kwa vila heni na wanhu wa heni natuguzigwa leka tudumuligwe singo na kudumigwa. Wone natwali natuguzigwa hela leka tuwe wapogozi walume na wadala, ndahanyamalile hela, kwa vila mbuli kota ayi yahawele ndodo kwa chiwalo cha kumtunya mndewa." 5 Mndewa Ahasuelo nakamuuza Esta, "Whaani ayo yawele nakajeza kudita mbuli kota ayo? Kakohi munhu ayo?" 6 Esta nakamwidichila mndewa, "Mng'honyo wa hetwe mkulu na yalingutugaza ndo ayu mwihe Hamani!" Hamani nakatinhuka ng'hatu hali mndewa na Esta.

7 Mndewa nakema kwa kuzudila, nakalawa kuli chihengo na kuileka divai ya heye, nakaluta kuli kagunda ka ng'handa ya mndewa. Hamani loyawene kota mndewa nakanuwila kumgaza, nakasigala mgati kuno yomdedeza Esta leka yaulohole ukomu wa heye. 8 Mndewa loyahiluche kulawa kuli kagunda na loyenjile kuli chihengo chiwele nayali yonwa divai, nakamfika Hamani yawele habehi na chigoda chiwele Esta nayali yekalise. Ahyo, mndewa nakalonga kwa lizi likulu, "Munhu ayu kangugana kumibata kwa lupichi mche wa heni hali heni, kahi mgati mwa ng'handa ya heni!" Mndewa loyawele yang'hali kusinda kulonga, vitumagwa nawamgubika Hamani kumeho. 9 Hamba Halibona, yumwe wa wala matowashi wawele nawali womkolela mijito mndewa, nakalonga, "Hamani nakahagongomanya honhu ha kuniniza na kukopola wanhu kwa chiwalo cha kumkopola Molidekayi, yawele nakaulohola ukomu wa hegwe, gwa mndewa. Honhu aho hawele na wimo wa mita makumi meli na mbili (22), hang'hali bahala haluga ha heye." Lelo mndewa nakalajiza, "Mumkopole Hamani hali honhu aho."

10 Ahyo Hamani nakakopoligwa aho hali honhu ha kuniniza na kukopola wanhu, hawele nayali nakahagongomanya kwa chiwalo cha Molidekayi. Lelo, kuzudila kwa mndewa nakusindamala.