1 Hamba, mhela ng'halazi ya mndewa Ahasuelo loisindamale, mndewa Ahasuelo nakamkumbuchila Vashiti na chila choyaditile na ndaze heye mndewa vyoyamule kuwala heye. 2 Hamba vitumagwa wawele nawali womkolela mijito mndewa nawalonga, "Mndewa yapalilwe wahinza wohawanating'hana na mlume wawele ndo wanojile, kwa chiwalo cha heye. 3 Mndewa yahagule wang'hangala kuli chila mkowa wa honhu ha heye kuwegala awo wahinza weng'ha wanojile kuli ng'handa ya wadala kuli ngome ya muji wa Susa. Hamba wawichigwe hali ulolezi wa Hegayi, towashi wa mndewa, mlolezi wa wadala, wapegwe chila chinhu kwa chiwalo cha kinoliga. 4 Hamba yula yawele komnojeza mndewa kowa mche wa mndewa honhu ha Vashiti." Ulonzi awu naumnojeza mndewa, naye nakadita hihyo.

5 Lelo kuli ngome ya muji wa Susa nakwali na Myahudi wa nhanzi ya Benjamini, itagwa lyake Molidekayi mwana wa Yaili, mwana wa Shimei, mwana wa Kishi. 6 Molidekayi nayali hali wanhu wawele nawaholigwa kulawa Yelusalemu na kuhilikwa kuli isi ya chijenzi mhela Yekoniya, mndewa wa Yuda loyaholigwe na Nebukadinesa, mndewa wa Babuloni. 7 Molidekayi nayali na binamu yawele nayali yochemigwa Esta, yawele itagwa lyake lya chiebulaniya nalyali Hadasa. Hadasa nayali na lukuli lunojile na kumeho kunojile ng'hatu. Mamo na mhaza wa Esta lowabagame, Molidekayi nakamhola Esta na kumlolela kota mhinza wa heye.

8 Mhela uwele ilajizo wa mndewa logawikuligwe, wohawanating'hana na mlume wenji nawahilikwa kuli ngome ya muji wa Susa na kuwichigwa hali ulolezi wa Hegayi. Esta naye nayali hali hewo wawele nawahilikwa kuli ng'handa ya mndewa, iwele Hegayi nayali ndo mkulu wa kuwalolela wadala awo. 9 Esta nakamnojeza Hegayi mbaka nakapegwa uganililo kulawa kwa heye, naye Hegayi nakamha himahima vinoligo na chilyo chinojile na vitumagwa saba kulawa kuli ng'handa ya mndewa leka wamlolele. Hamba Esta na vitumagwa wa heye nawosigwa kulawa hali honhu ha hamwande na kuhilikwa kuli chihengo chinojile ng'hatu kuli ng'handa ya wadala. 10 Esta halonjile kota nakalawa kohi ne nhanzi ya heye, kwa vila Molidekayi nayali yamlemeze kudita ahyo. 11 Chila zuwa Molidekayi nayali yokola habehi na lugagala lwa ng'handa ya wadala leka kuvizela ndaze Esta vyoyalingulutilila na galingukoleka kwa heye.

12 Wadala nawali wololelwa kwa mhela wa mwaka umwe. Miyezi sita ja mwaluko nawali wobakalizwa mafuta ga mzeituni na manemane na miyezi sita jinji nawali wobakalizwa unhunyhililo na vinoligo. 13 Mhela wa kuluta kwa mndewa, chila mhinza nayali yopegwa chila chinhu choyaganile kuhola kulawa kuli ng'handa ya wadala na kuluta nacho kuli ng'handa ya mndewa. 14 Matinazo ndo mhela uwele mhinza nayali yoganigwa kuluta kwa mndewa na mitondo nayali yohilikwa kuli ng'handa yinji ya wadala kwa chiwalo cha kulolelwa, hali ulongozi wa Shaashigasi, towashi wa mndewa yawele nayali ndo chilongozi wa waha. Mhinza haganigwe kuhiluka kwa mndewa, mbaka mndewa yanojezwe naye na kulajiza mhinza ayo yachemigwe kahi kwa itagwa lyake.

15 Mhela wa Esta, mwana wa Abihaili, kahi yawele ndo binamu wa Molidekayi loufichile kuluta kwa mndewa, Esta haganile vinhu mzidi wa vila viwele Hegayi, towashi wa mndewa yawele nayali ndo mkulu wa ng'handa ya wadala vyoyamlonjele. Chila munhu yawele nakamona Esta, nakanojezwa na heye. 16 Lelo Esta nakahilikwa kuli ng'handa ya mndewa kuli mwaka wa saba wa ulongozi wa mndewa Ahasuelo, kuli mwezi wa kumi, ulinguchemigwa Tebeti. 17 Lelo mndewa nakamgana ng'hatu Esta kusinda wadala wanji weng'ha, naye nakapata uganililo na kukundigwa kusinda wahinza weng'ha. Hamba nakamvaliza kofia ya mche wa mndewa na kumdita yawe mche wa heye honhu ha Vashiti. 18 Mndewa nakadita mnvina ng'hulu kwa chiwalo cha Esta, nakawalalika wakulu wa heye weng'ha na wang'hangala. Mndewa nakawikula kwesela kukola mijito na kuleka kulipa kodi kuli mikowa ja heye jeng'ha na kuwapa ndolendole kwa isungu lya chiundewa.

19 Mhela uwele wohawanating'hana na mlume nawekungajiza lwa keli, Molidekayi nayali yekalise kuli lwizi lwa mndewa. 20 Esta nayali yang'hali halonjile kuwala nhanzi ya heye na kohi koyalawile, kota Molidekayi vyoyamlonjele, ahyo Esta nakalutilila kuwinza malajizo ga Molidekayi kota vyoyaditile loyawele yololelwa.

21 Mhela Molidekayi loyawele yekalise kuli lwizi lwa mndewa, Bigitana na Teleshi, matowashi weli wa mndewa wawele nawali wamizi wa lwizi ja ng'handa ya mndewa, nawazudila na kikundiza kiwika goya kumkopola mndewa Ahasuelo. 22 Ila Molidekayi nakavizela kuwala mbuli ayo, nakamlonjela Esta, mche wa mndewa yawele hamba nakamlonjela mndewa, kuno yomtogola Molidekayi. 23 Mbuli ayo loipugajizwe na koneka kota ndo ya kukomya, vitumagwa awo weli nawaninizwa na kukopoligwa kuli migodi ja kukopola. Aga geng'ha nagandichigwa kuli chitabu cha kukumbuchila hali mndewa.