1 Zuwa lilyo, mndewa Ahasuelo nakamha Esta vinhu vyeng'ha viwele navyali ndo vya Hamani, mng'honyo wa Wayahudi. Naye Molidekayi nakoya hali mndewa, kwa vila Esta nayali yalonjile Molidekayi nayali mng'holoze Esta. 2 Mndewa nakaivula pete ya heye ya mhuli, iwele nakamsukula Hamani, nakamha Molidekayi. Naye Esta nakamuwika Molidekayi yawe chilongozi kuli vinhu vya Hamani.

3 Hamba Esta nakamdedeza kahi mndewa, naketoza hali magulu ga mndewa na kulila. Nakamlanda mndewa yakudumye kiwika goya kwihile kwa Hamani, Mwagagi, kuwala kuwakopola Wayahudi. 4 Mndewa nakamgololela Esta ng'hweku ya heye ya ulongozi ya zahabu, naye Esta nakenuka na kwima hali heye. 5 Hamba Esta nakalonga, "Wone hegwe mndewa konojezwa na heni na wone nani ndopegwa uganililo na wone yowa ndo mbuli iwele goya kunditila, lelo wandichigwe mzilo wa kuzilemeza zila baluwa za Hamani, ziwele nakandika kuwala kuwadumya Wayahudi kuli mikowa jeng'ha ja mndewa. 6 Kwa vila ndoweza ndaze kwimilila kona wanhu wa heni wangukopoligwa na ivyazi lya heni lyangudumigwa?"

7 Mndewa Ahasuelo nakawedichila Esta na Molidekayi, "Kwa vila Hamani nakawatowa Wayahudi, ahyo vinhu vyeng'ha vya Hamani nandimha Esta. Kahi nandajiza Hamani yaninizwe na kukopoligwa hali honhu ha kuniniza na kukopola wanhu, hawele nakahagongomanya heye yuye. 8 Mwandiche baluwa kuwala Wayahudi kota vyomlingugana. Kahi mwandiche baluwa kwa itagwa lya heni na kuiwika mhuli wa heni wa chiundewa, kwa vila wanhu hawoweza kuilema baluwa iwele nayandichigwa kwa itagwa lya mndewa na kuwichigwa mhuli wa mndewa."

9 Lelo, kuli zuwa lya makumi meli na gadatu lya mwezi wa kadatu, ulinguchemigwa Siwani, walingwandika weng'ha wa mndewa nawachemigwa, Molidekayi nakawalajiza wandiche baluwa kwa Wayahudi na wakulu na vilongozi na wang'hangala wa mikowa miya imwe na makumi meli na saba (127), kwaluchila kuli Bala la Hindi mbaka Kushi. Baluwa azo nazandichigwa kuli ndonga ya chila mkowa na kuhilikwa kwa wanhu weng'ha na kwa Wayahudi kahi, iwele kuli ndonga ya hewo. 10 Molidekayi nakandika baluwa azo kwa itagwa lya mndewa Ahasuelo na kuziwika mhuli kwa pete ya mndewa. Baluwa azo nazihilikwa na wasenga walingwendesa falasi wawele na mong'ho na walingubilima lukami.

11 Kwa baluwa azo mndewa nakawakundiza Wayahudi kuli chila muji kikungajiza leka kwamila ukomu wa hewo. Nawakundizwa kahi kukopola na kuchidumya chilundo choneche cha wanhu ama mkowa chilinguwatowa hewo. Kahi nawakundizwa kuwakopola wache wa hewo na wana wa hewo na kuhola lufufu lwa hewo. 12 Zuwa liwele naliwichigwa goya kwa chiwalo cha Wayahudi kudita mbuli ayo kuli mikowa jeng'ha ja mndewa Ahasuelo, nalyali ndo zuwa lya kumi na zidatu lya mwezi wa kumi na mbili, uwele ndo mwezi wa Adali. 13 Baluwa za kuwikula aku kuwele nakulavigwa kota ilajizo kuli chila mkowa, nazihilikwa kwa chila munhu kuli chila mkowa, leka Wayahudi wewiche goya kuhilusa chibida kwa wang'honyo wa hewo zuwa alyo holifika. 14 Kwa ilajizo lya mndewa, wasenga walingwendesa falasi walingubilima lukami nawoka kwa kubilima. Kuwikula aku nakulawa kuli muji wa Susa.

15 Molidekayi nakoka hali mndewa yawele yavalile mivalo ja chiundewa ja lanji ya buluu na nzelu na kofia ya mndewa ng'hulu ya zahabu na ikanzu lya zambalau lya kitani inojile. Muji wa Susa nautowa luchenze kwa kusangalala. 16 Mhela awo kwa Wayahudi nawali ndo mhela wa kusangalala na kusumya. 17 Kuli chila mkowa na chila muji, honhu honeche hawele baluwa ya mndewa naisomigwa, Wayahudi nawasangalala na kutowa luchenze. Nawadita mnvina na kwesela kukola mijito. Wanhu wenji wa isi zinji nawedita kota ndo Wayahudi kwa vila nawali wowadumba Wayahudi.