1 Logakwete ago, mndewa Ahasuelo nakamdita Hamani, mwana wa Hamedata wa lulelo lwa Agagi, yekale kuli chigoda cha lutogo ng'hatu kusinda wang'hangala wanji weng'ha kuli undewa wa heye. 2 Wang'hangala weng'ha wa mndewa nawamfugamila na kumhulichiza Hamani, kwa vila mndewa nakalajiza ahyo kuwala Hamani. Ila Molidekayi hamfugamile ne kumhulichiza. 3 Hamba vitumagwa wa mndewa wawele nawali kuli lwizi lwa mndewa nawamuuza Molidekayi, "Lekachoni haulinguhulichiza ilajizo lya mndewa?" 4 Chila zuwa vitumagwa nawali wolongasa na heye ila Molidekayi hakundile. Nakalema kudita ahyo kwa vila nakalonga kota heye ndo Myahudi. Lelo, nawamlonjela Hamani leka wone kota Hamani koweza kwimilila madito ga Molidekayi. 5 Hamani loyawene kota Molidekayi halingumfugamila heye ne kumhulichiza, nakazudila. 6 Ila loyazeleswe kuwala wanhu wa Molidekayi, nakagalula majesa ga kumkopola Molidekayi yaliyeka. Lelo Hamani nakapala nzila ya kuwadumya wanhu weng'ha wa Molidekayi, wawele ndo Wayahudi wawele kuli undewa weng'ha wa mndewa Ahasuelo.

7 Kuli mwaka wa kumi na mbili wa ulongozi wa mndewa Ahasuelo, kuli mwezi wa mwaluko ulinguchemigwa Nisani, nawatowa simbi hali Hamani leka kuhagula zuwa na mwezi kwa chiwalo cha kuwakopola Wayahudi. Simbi naigwila kuli mwezi wa kumi na mbili, ulinguchemigwa Adali. 8 Hamba Hamani nakamlonjela mndewa Ahasuelo, "Hana wanhu wamwenga wawele nawenela na kusambaluka hali wanhu kuli mikowa jeng'ha ja undewa wa hegwe, wawele vihendo vya hewo vya vilivinji na vila vya wanhu wanji weng'ha, nawo hawalinguwinza malajizo ga hegwe. Haiwa goya mndewa kwimilila madito ga wanhu awa. 9 Wone yomnojeza mndewa, ulavigwe mzilo, nani ndowapa wanhu walingulolela ng'hano ya mndewa migwala kilo lachi zidatu na elufu makumi gane (340,000) za sendi."

10 Lelo mndewa nakavula pete ya heye ya mhuli kulawa kuli chidole cha heye, nakamha Hamani, mng'honyo wa Wayahudi leka yaweze kulajiza baluwa za ludali lwa mndewa. 11 Mndewa nakamlonjela Hamani, "Goya! Ndobochela sendi za hegwe na uwaditile wanhu awo kota vyoulingugana."

12 Hamba kuli zuwa lya kumi na tatu lya mwezi wa mwaluko, walingwandika wa mndewa nawachemigwa. Nawandika baluwa na kuzihilika kuli chila mkowa na kuli chila ndonga ya wanhu kota ilajizo lya Hamani liwele nalilawa kwa mndewa, leka zilute kwa vilongozi wa mikowa na wakulu wa wanhu. Baluwa azo nazandichigwa kwa itagwa lya mndewa Ahasuelo yuye na kuwichigwa mhuli wa pete ya heye yuye. 13 Wasenga nawazihilika baluwa azo kuli chila mkowa uwele kuli ulongozi wa mndewa. Baluwa ayo nailonga kota kwa zuwa limwe hela, liwele ndo zuwa lya kumi na tatu lya mwezi wa kumi na mbili, Wayahudi weng'ha kwaluchila wasongolo na wasekulu na wadala na wana wadodo wanguganigwa kukopoligwa na kudumigwa na vinhu vya hewo viholigwe. 14 Baluwa iwele nayandichigwa ilajizo alyo naiganigwa ilavigwe kota ilajizo kuli chila mkowa na kuzeleswa kwa wanhu wa isi leka wavizele na kiwika goya kwa chiwalo cha zuwa alyo.

15 Kwa ilajizo lya mndewa mbuli ayo naiwikuligwa kuli muji wa Susa, nawo wasenga nawaiwikula mbuli ayo kuli mikowa jeng'ha. Mndewa na Hamani nawekalisa na kunwa kuno wanhu wa kuli muji wa Susa wangudeula.