1 Eliashibu, mtambika mkulu, hamwe na watambika wayage nawaluta kukola mijito ja kuzenga kahi Lwizi lwa Ming'holo. Nawaludita lwizi alo luwe lwa chiuyeng'ha kwa Nguluwi na kuwika lwizi alo kuli honhu hake. Nawawika chiuyeng'ha kwaluchila kuli Ilingo lya Miya mbaka kuli Ilingo lya Hananeli. 2 Wanhu wa muji wa Yeliko nawazenga honhu hawele nahabakana na watambika, naye Sakuli, mwana wa Imuli, nakazenga honhu hayage ha lukanzi habehi na hewo.

3 Lwizi lwa Somba naluzenjigwa kahi na lukolo lwa Hasena, nawawika fulemu zake na lwizi na vibatilila lwizi na mhajilo zake. 4 Melemoti, mwana wa Uliya, mzukulu wa Hakosi, nakazenga kahi honhu hawinzile. Honhu hanji nahazenjigwa kahi na Meshulamu, mwana wa Belekiya, mzukulu wa Meshesabeli. Honhu hayage kahi nahazenjigwa kahi na Sadoki, mwana wa Baana. 5 Honhu hawinzile nahazenjigwa kahi na wanhu wawele nawalawa kuli muji wa Tekowa, ila vilongozi wa wanhu wa muji awo nawalema kukola mijito jowapegwe na vilongozi wa hewo.

6 Lwizi lwa Yeshana naluzenjigwa kahi na Yoyada, mwana wa Paseya hamwe na Meshulamu, mwana wa Besodeya. Nawawika fulemu zake na lwizi na vibatilila lwizi na mhajilo zake. 7 Wawinzile kuli mijito ajo ja kuzenga kahi nawali ndo Melatiya, Mgibeoni na Yadoni, Mmelonoti, hamwe na wanhu kulawa kuli miji ja Gibeoni na Misipa wawele nawali hali ulongozi wa chilongozi wa mkowa wa kolizinjilaga isanya mwa lwanda lwa Eyufulate. 8 Honhu hawinzile nahazenjigwa kahi na Usieli, mwana wa Halihaya, yumwe wa walinguponda zahabu, naye Hananiya, yumwe wa walingugongomanya unhunyhililo nakazenga honhu halinguwinza. Nawazenga kahi lukanzi lwa muji wa Yelusalemu mbaka kufika kuli Lukanzi Lugazi. 9 Honhu halinguwinza nahazenjigwa kahi na Lefaya, mwana wa Huli, mkulu wa nusu ya wilaya ya Yelusalemu. 10 Honhu hawinzile halingilola na ng'handa ya heye nahazenjigwa kahi na Yedaya, mwana wa Halumafu. Honhu hawinzile kahi nahazenjigwa na Hatushi, mwana wa Hashabuneya. 11 Malikiya, mwana wa Halimu na Hashubu, mwana wa Pahati-moabu, nawazenga kahi honhu hawinzile kahi hamwe na Ilingo lya Mitanulu. 12 Honhu hawinzile nahazenjigwa kahi na Shalumu, mwana wa Haloheshi, chilongozi wa nusu iyage ya wilaya ya Yelusalemu. Nakazenga honhu aho kuno yotanzigwa na wahinza wa heye kuli kuzenga ako.

13 Lwizi lwa Kibindi naluzenjigwa kahi na Hanuni hamwe na wenyeng'haye wa muji wa Sanowa. Nawawika lwizi kuli honhu hake na vibatilila lwizi na mhajilo zake. Nawazenga kahi lukanzi luwele na ulefu wa mita miya zihano (500) mbaka kuli Lwizi lwa Mboto. 14 Lwizi lwa Mboto naluzenjigwa kahi na Malikiya, mwana wa Lekabu, chilongozi wa wilaya ya Beti-hakelemu. Nakawika lwizi kuli honhu hake na vibatilila lwizi na mhajilo zake.

15 Lwizi lwa Nzasa naluzenjigwa kahi na Shalumu, mwana wa Kolihose, chilongozi wa wilaya ya Misipa. Nakahagubika na kuwika lwizi kuli honhu hake na vibatilila lwizi na mhajilo zake. Nakazenga kahi lukanzi lwa Ilamba lya Shela luwele nalwali habehi na kagunda ka mndewa, mbaka kuli vikwinilo vilingudulika kulawa kuli muji wa mndewa Daudi. 16 Honhu hawinzile mbaka kuli vilaga vya chiundewa na ilamba na ng'handa za wamizi, nahazenjigwa kahi na Nehemiya, mwana wa Asibuki, chilongozi wa nusu ya wilaya ya Beti-suli.

17 Hamba Walawi nawalutilila kuzenga kahi lukanzi. Honhu hawinzile nahazenjigwa kahi na Lehumu, mwana wa Bani. Yawinzile nayali Hashabiya, chilongozi wa nusu ya wilaya ya Keila. Ayu nakazenga honhu hamwenga kwa chiwalo cha wanhu wa wilaya ya heye. 18 Hamba, kuzenga kahi nakukoleka na wang'holozawo, hali ulongozi wa Bavayi, mwana wa Henadadi, chilongozi wa nusu yinji ya wilaya ya Keila. 19 Honhu halinguwinza halingilola na ng'hano ya vinhu vya kitowela ngondo kuli nzingo ya lukanzi, nahazenjigwa kahi na Eseli, mwana wa Yeshuwa, chilongozi wa Misipa. 20 Honhu hawinzile mbaka kuli lwizi lwa Eliashibu, mtambika mkulu, nahazenjigwa kahi na Baluku, mwana wa Sakayi. 21 Honhu halinguwinza kwaluchila kuli lwizi lwa ng'handa ya Eliashibu, mtambika mkulu, mbaka kuli kuduma kwa ng'handa ayo, nahazenjigwa kahi na Melemoti, mwana wa Uliya, mzukulu wa Hakosi.

22 Honhu hawinzile nahazenjigwa kahi na watambika wawele nawali wochikala kuli honhu halinguuzunguluta muji wa Yelusalemu. 23 Benjamini na Hashubu nawazenga kahi honhu hawele habehi na ng'handa za hewo. Asaliya, mwana wa Maaseya, mzukulu wa Ananiya, nakazenga kahi honhu hawele habehi na ng'handa ya heye. 24 Kwaluchila kuli ng'handa ya Asaliya mbaka kuli nzingo ya lukanzi, nahazenjigwa kahi na Binuyi, mwana wa Henadadi. 25 Honhu hawinzile, kulawa kuli nzingo ya lukanzi mbaka kuli ilingo lya ng'handa ya mndewa ya mchanya habehi na honhu ha kwamila, nahazenjigwa kahi na Palali, mwana wa Usayi. Hamba, Pedaiya, mwana wa Paloshi 26 na vitumagwa wa ng'handa ya Nguluwi wawele nawali wochikala mchanya mwa chidunda cha Ofeli, nawazenga kahi honhu ha habehi na Lwizi lwa Mazi na ilingo liwele ng'wemang'wema, kuli ubanzi wa kolilawilaga isanya.

27 Honhu hanji hawinzile, kulawa kuli ilingo liwele ng'wemang'wema mbaka kuli lukanzi lwa Ofeli, nahazenjigwa kahi na wenyeng'haye wa muji wa Tekowa. 28 Watambika nawazenga kahi mchanya mwa Lwizi lwa falasi, chila yumwe kumwando mwa ng'handa ya heye. 29 Sadoki, mwana wa Imeli, nakazenga kahi honhu hawele kumwando mwa ng'handa ya heye. Honhu hawinzile nahazenjigwa kahi na Shemaya, mwana wa Shekaniya, mwamizi wa Lwizi lwa Kolilawilaga isanya. 30 Hamba, Hananiya, mwana wa Shelemiya na Hanuni, mwana wa sita wa Salafu, nawazenga honhu hawinzile. Meshulamu, mwana wa Belekiya, nakazenga kahi honhu hawele habehi na chihengo cha heye. 31 Honhu hawinzile, kulawa kuli ng'handa yowatumiye wakola mijito wa ng'handa ya Nguluwi na walinguguza na kugula vinhu, iwele nayali ichilola na Lwizi lwa Kukagula, habehi na chihengo cha kuchanya kuli nzingo, ubanzi wa kasikazini-kolilawilaga isanya, nahazenjigwa kahi na Malikiya, mponda zahabu.

32 Honhu ha kuduma kulawa kuli chihengo cha kuli nzingo mbaka Lwizi lwa Ming'holo, nahazenjigwa kahi na walinguponda zahabu na walinguguza na kugula vinhu.