1 Wanhu weng'ha kwa kunuwila kumwe, nawekungajiza mujini Yelusalemu kuli luga luwele habehi na lwizi lwa muji ulinguchemigwa Lwizi lwa Mazi. Nawamlonjela Esila, yalingwandika, yachigale chitabu cha malajizo ga Musa, chiwele Mkulu Nguluwi nakawapa wanhu wa Isilaeli. 2 Lelo, kuli zuwa lya mwaluko lya mwezi wa saba, mtambika Esila nakegala malajizo hali nhing'hano, kuwele nakwali na walume na wadala. 3 Nakasoma kwa lizi likulu kulawa lokubwemwenzuche mbaka nemisi, yawele yemile yolola kulutila kuli luga luwele kumwando mwa Lwizi lwa Mazi hali walume na wadala. Wanhu weng'ha nawauhulichiza goya ulonzi uwele nawandichigwa kuli chila chitabu cha malajizo.

4 Esila, yalingwandika, nayali yemile mchanya mwa ilingo lya migodi liwele nalizenjigwa kwa chiwalo acho. Habehi na heye kuli ubanzi wa heye wa kudilo nawali wemile Matitiya na Shema na Anaya na Uliya na Hilikiya na Maaseya. Kuli ubanzi wa heye wa kumoso nakwali na Pedaya na Mishaeli na Malikiya na Hashumu na Hashibadani na Sekaliya na Meshulamu.

5 Esila nakachigubula chila chitabu, wanhu weng'ha nawaweza kumona kwa vila nayali yemile kuchanya ng'hatu. Loyachigubule chila chitabu, wanhu weng'ha nawema. 6 Esila nakamtogola Mkulu Nguluwi, Nguluwi mkulu na wanhu weng'ha nawenula moko ga hewo na kwidichila, "Ena! Ena!" Hamba nawamfugamila Mkulu Nguluwi kuno kumeho kwa hewo nakwali kudoliza misanga.

7 Walawi wamwenga nawatanza kuwalangusa wanhu malajizo. Walawi awo ndo Yeshuwa na Bani na Shelebiya na Yamini na Akubu na Shabetayi na Hodiya na Maaseya na Kelita na Asaliya na Yosabadi na Hanani na Pelaya. Nawadita ahyo chila yumwe yawele yemile hali honhu ha heye. 8 Nawasoma kulawa kuli chila chitabu cha malajizo ga Nguluwi, wotang'hula na kuwazelesa wanhu leka wavizele goya chila chiwele nachali chisomigwa. 9 Wanhu lowagahuliche malajizo nawona usungu ng'hatu, ahyo weng'ha nawaluka kulila. Nehemiya yawele nayali chilongozi na Esila, mtambika na yalingwandika, hamwe na Walawi wawele nawali wowalangusa wanhu, nawawalonjela wanhu weng'ha, "Zuwa ali ndo lyelile kwa Mkulu Nguluwi, Nguluwi wa hemwe, ahyo mleche kulombocheza ne kulila. 10 Mlute haluga ha hemwe na msangalale kwa kulya chilyo chinojile na kunwa divai inojile na mkumbuchile kuhilika honhu ha vinhu avyo kwa wala walihela, kwa vila zuwa ali ndo lyelile kwa Mkulu Nguluwi wa hetwe. Mleche kuwa na masinzo kwa vila kusangalala kompegwe na Mkulu Nguluwi kowapa hemwe mong'ho."

11 Ahyo, Walawi nawawadita wanhu weng'ha wasindamale, wolonga, "Msindamale, kwa vila ali ndo zuwa lyelile. Mleche kuwa na masinzo." 12 Wanhu weng'ha nawaluta haluga ha hewo leka kulya na kunwa kuno wosangalala na kuwagawila wanji chilyo kwa vila nawauzela ulonzi weng'ha uwele nauwikuligwa kwa hewo.

13 Zuwa liwinzile, vilongozi wa ng'holo zeng'ha hamwe na watambika na Walawi, naweting'hana kwa Esila, yalingwandika, leka kilangusa malajizo. 14 Nawavizela kota nayandichigwa kuli chitabu cha malajizo kota Mkulu Nguluwi nakalajiza kwa kukolela Musa, kota Waisilaeli nawaganigwa kikala kuli vibumuli kuli mhela wa mnvina ya mwezi wa saba. 15 Kahi nawaganigwa kuuwikula ulonzi awo na kuweneza kuli miji ja hewo na kuli Yelusalemu wolonga, "Mlute kuli isi ya vidunda na kigala nhagala za mizeituni na mizeituni ja kisolo na mihadasi na michikichi na migodi ja lubehelo, leka kugongomanya vibumuli, kota vyoyandichigwe."

16 Lelo, wanhu nawaluta kuhola na kigala nhagala na kizenjela vibumuli mchanya mwa vinduwiko vya ng'handa za hewo na kuli lugagala lwa ng'handa za hewo na kuli lugagala lwa ng'handa ya Nguluwi na kuli luga lwa habehi na Lwizi lwa Mazi na luga lwa Lwizi lwa Efulaimu. 17 Wanhu weng'ha wawele nawahiluka kulawa kuli isi ya chijenzi, nawazenga vibumuli na kikala mgati mwake. Kulawa mhela wa Yoshua, mwana wa Nuni mbaka zuwa lila, Waisilaeli hawawahiche kudita mnvina kota ayo. Kusangalala kwa hewo nakwali kukulu ng'hatu. 18 Chila zuwa, kwaluchila zuwa lya mwaluko mbaka zuwa lya kuduma, Esila nakawasomela wanhu chitabu cha malajizo ga Nguluwi. Nawadita mnvina ayo kwa mhela wa mazuwa saba, kuli zuwa lya nane nawadita nhing'hano ng'hulu ya kusinda kwa mnvina, kota vyoilajizwe.