1 Watambika wenji na Walawi nawahiluka kulawa kuli isi ya chijenzi wawele hamwe na Selubabeli, mwana wa Shealitieli na Yeshuwa, mtambika mkulu. Watambika awo nawali ndo Selaya na Yelemiya na Esila 2 na Amaliya na Maluki na Hatushi 3 Shekaniya na Lehumu na Melemoti 4 na Ido na Ginetoni na Abiya 5 na Miyamini na Maadiya na Biliga 6 na Shemaya na Yoyalibu na Yedaya 7 na Salu na Amoki na Hilikiya na Yedaya. Awo weng'ha nawali ndo vilongozi wa watambika kuli mhela wa Yeshuwa.

8 Walawi nawali ndo Yeshuwa na Binuyi na Kadimieli na Shelebiya na Yuda na Mataniya, yawele nayali ndo chilongozi wa nzimbo za kulonga malumbo yotanzigwa na wang'holoze. 9 Nawo Bakibukiya na Uni nawali kuli chilundo cha walingwimba chiwele nachali chimile kumwando kwa hewo.

10 Yeshuwa nayali ndo mhaza wa Yoyakimu na Yoyakimu nayali ndo mhaza wa Eliashibu na Eliashibu nayali ndo mhaza wa Yoyada. 11 Yoyada nayali ndo mhaza wa Yonatani na Yonatani nayali ndo mhaza wa Yaduwa.

12 Yoyakimu loyawele mtambika mkulu, watambika walinguwinza nawali ndo vilongozi kuli ng'holo za hewo. Kuli lukolo lwa Selaya, nayali Melaya na kuli lukolo lwa Yelemiya, nayali Hananiya, 13 kuli lukolo lwa Esila, nayali Meshulamu, kuli lukolo lwa Amaliya, nayali Yehohanani, 14 kuli lukolo lwa Maluki, nayali Yonatani, kuli lukolo lwa Shebaniya, nayali Yusufu, 15 kuli lukolo lwa Halimu, nayali Adina, kuli lukolo lwa Melemoti, nayali Helikayi, 16 kuli lukolo lwa Ido, nayali Sekaliya, kuli lukolo lwa Ginetoni, nayali Meshulamu, 17 kuli lukolo lwa Abiya, nayali Sikili, kuli lukolo lwa Miniamini na Moadiya, nayali Pilitayi, 18 kuli lukolo lwa Biliga, nayali Shamuwa, kuli lukolo lwa Shemaya, nayali Yehonatani, 19 kuli lukolo lwa Yoyalibu, nayali Matenayi, kuli lukolo lwa Yedaya, nayali Usi, 20 kuli lukolo lwa Salu, nayali Kalayi, kuli lukolo lwa Amoki, nayali Ebeli, 21 kuli lukolo lwa Hilikiya, nayali Hashabiya, kuli lukolo lwa Yedaya, nayali Netaneli.

22 Kuli mazuwa ga watambika wakulu wawele ndo Eliashibu na Yoyada na Yohanani na Yaduwa, wakulu wa ivyazi lya Walawi na wakulu wa ivyazi lya watambika nawandichigwa kuli mhela wa ulongozi wa Daliyo, wa Pelisiya. 23 Wakulu wa ivyazi lya lukolo lwa Lawi mbaka kuli mhela wa Yohanani, mzukulu wa Eliashibu, nawandichigwa kuli chitabu cha kukumbuchila.

24 Vilongozi wa Walawi nawali Hashabiya na Shelebiya na Yeshuwa, mwana wa Kadimieli na wayawo, nawali kuli vilundo vili. Vilundo avyo navyali vimile vichilola kuno vitogola na kulonga malumbo, kota ilajizo lya mndewa Daudi, munhu wa Nguluwi, vyolilingulonga. 25 Wamizi wawele nawali wokwamila lwizi lwa ng'hano, nawali Mataniya na Bakibukiya na Obadiya na Meshulamu na Talimoni na Akubu. 26 Awo nawakola mijito kuli mazuwa ga Yoyakimu, mwana wa Yeshuwa, mwana wa Yosadaki na kuli mazuwa ga chilongozi Nehemiya na kuli mazuwa ga Esila, mtambika na yalingwandika.

27 Hamba mhela wa kuluwika chiuyeng'ha lukanzi lwa Yelusalemu, Walawi nawapaligwa kuli chila honhu howawele wochikala leka woye Yelusalemu kuidita mnvina kwa usangalalo hamwe na kulonga malumbo na nzimbo, kuno wotumiya matoazi na ving'weleng'wele na igombogombo. 28 Walingwimba kahi nawekungajiza kulawa kuli honhu halinguzunguluta Yelusalemu na vijiji vya Wanetofati 29 na Beti-giligali na honhu hamwenga ha Geba na Asimaweti, kwa vila walingwimba nawali wezenjele vijiji hafungo ha Yelusalemu. 30 Mhela watambika na Walawi lowasindile kiyeliza, nawaweliza wanhu na lwizi na lukanzi.

31 Heni Nehemiya, nandiwalajiza vilongozi wa Yuda wakwine mchanya mwa lukanzi. Nandiwalajiza kahi walingwimba kuli vilundo vili leka vimbe nzimbo za kulonga malumbo kwa Nguluwi. Chilundo chimwe nachiluta ubanzi wa kudilo wa lukanzi mbaka kuli Lwizi lwa Mboto. 32 Hamba nawawinzigwa na Hoshaya na nusu ya vilongozi wa Yuda. 33 Hamba nawawinzigwa na Asaliya na Esila na Meshulamu 34 na Yuda na Benjamini na Shemaya na Yelemiya, 35 weng'ha awo ndo watambika wawele nawali nawapemba mhalamhanda. Hamba nayali Sekaliya, mwana wa Yonatani, mwana wa Shemaya, mwana wa Mataniya, mwana wa Mikaya, mwana wa Sakuli, mwana wa Asafu, 36 hamwe na wayage, wawele ndo Shemaya na Asaleli na Milalayi na Gilalayi na Maayi na Netaneli na Yuda na Hanani, wawele nawali na vinhu vya muzichi, kota vyoilajizwe na Daudi, munhu wa Nguluwi. Esila, yalingwandika, nakawalongola wanhu awo. 37 Kuli Lwizi lwa Nzasa nawakwina vikwinilo kulutila kuli muji wa Daudi, nawakola kuli ng'handa ya Daudi na kulutila kumbele kuli lukanzi mbaka kuli Lwizi lwa Mazi kuli ubanzi wa kolilawilaga isanya mwa muji.

38 Chilundo cha keli cha walingwimba nachiluta kuli ubanzi wa kumoso kuno chikwimba nzimbo za kulonga malumbo. Nandiwawinza mchanya mwa lukanzi hamwe na nusu ya wanhu kwa kukolela kuli Ilingo lya Itanulu mbaka kuli Lukanzi Lugazi 39 na mchanya mwa Lwizi lwa Efulaimu na Lwizi lwa Eshana na Lwizi lwa Somba na Ilingo lya Hananeli na Ilingo lya Miya Imwe na mchanya mwa Lwizi lwa Ming'holo. Lowafichile kuli Lwizi lwa Wamizi, nawema.

40 Hamba vila vilundo vyeng'ha vili vya walingwimba, viwele navyali vikwimba nzimbo za kulonga malumbo, naviluta kuli ng'handa ya Nguluwi chila chilundo kuli honhu hake. Nani kahi nandita hihyo, hamwe na nusu ya vilongozi 41 na watambika, wawele ndo Eliyakimu na Maaseya na Miniamini na Mikaya na Elioenayi na Sekaliya na Hananiya, wawele nawali na mhalamhanda za hewo. 42 Awo nawawinzigwa na Maaseya na Shemaya na Eleasali na Usi na Yehohanani na Malikiya na Elamu na Eseli. Vilundo avi vya walingwimba, navimba wolongozwa na Yesilahiya.

43 Zuwa alyo, wanhu nawalavya nhambiko nyinji kuno wotowa luchenze kwa vila Nguluwi nakawadita wawe na usangalalo ukulu. Wadala na wana nawasangalala kahi. Lizi lya kutowa luchenze kulawa ako Yelusalemu, nalihulikwa mbaka kutali ng'hatu.

44 Mhela awo wanhu nawahaguligwa leka wawe walolezi wa vihengo vya ng'hano kwa chiwalo cha ndolendole na mbena za mwaluko na honhu hamwe ha kumi ha vinhu. Wala wawele na migunda jilinguuzunguluta muji nawaganigwa kigala honhu hamwe ha kumi ha mbena kuli ng'hano kota malajizo vyogalingulonga, kwa chiwalo cha watambika na Walawi. Ahyo wanhu wa Yuda nawasangalala kwa chiwalo cha watambika na Walawi, 45 kwa vila watambika na Walawi nawamfugamila Nguluwi wa hewo na kiyeliza hamwe na walingwimba na wamizi wa lwizi nawadita hihyo du, kwa kuwinza malajizo ga Daudi na Solomoni, mwanage. 46 Kulawa mhela wa mndewa Daudi na Asafu, nakwali na vilongozi wa walingwimba na kahi nakwali na nzimbo za lutogo na za kulonga malumbo kwa Nguluwi. 47 Ahyo, kuli mazuwa ga Selubabeli na ga Nehemiya, Waisilaeli nawalavya honhu ha nhambiko ha chila zuwa kwa chiwalo cha walingwimba na wamizi wa lwizi. Waisilaeli nawalavya ndolendole kwa chiwalo cha Walawi na Walawi nawo nawabagula honhu hamwenga ha nhambiko ayo kwa chiwalo cha walelwa wa Aluni.