1 Kuli mwezi wa Nisani mwaka wa makumi meli (20) wa ulongozi wa mndewa Alitashasta, mhela divai loigaligwe kwa heye, nandiihola divai ayo na kumha mndewa. Siwahiche kuwa na masinzo hali heye. 2 Lelo mndewa Alitashasta nakambuza, "Ndaze, lekachoni kumeho kwa hegwe kwangoneka kuna masinzo hanga haulingoneka kota kwa mtamwa? Mbuli ayi haiwele chinhu chinji, ila ndo masinzo ga mnhumbula." Ahyo nandumba ng'hatu, 3 nandimwidichila mndewa, "Gwa mndewa, wikale mazuwa gose! Lekachoni ndeche kuwa na masinzo kuno muji wa Yelusalemu uwele na vilaga vya wasekulu wa heni nausigala mahame hela na lwizi jake najilakazwa?"

4 Mndewa Alitashasta nakambuza, "Lelo kwangulanda choni?" Nani nandimlanda Nguluwi wa kilanga, 5 hamba nandimwidichila mndewa, "Gwa mndewa, wone konojezwa na heni na wone namhata uganililo hali hegwe, ndangukulanda undajize ndute kuli isi ya Yuda leka ndikauzenje kahi muji wa Yelusalemu uwele na vilaga vya wasekulu wa hetwe." 6 Hamba mndewa nakambuza kuno mchewake yawele habehi na heye, "Majendo ago gowa ga mhela wachi na kohiluka nili hano?" Mndewa nakakunda kulanda kwa heni, ahyo nandimlonjela mhela wa kuhiluka kwa heni. 7 Nandimlonjela kahi, "Gwa mndewa, wone konojezwa na heni, ndangulanda mhegwe baluwa leka ndizihiliche kwa vilongozi wa mkowa wa kolizinjilaga isanya mwa lwanda lwa Eyufulate leka wang'hundize kukola leka ndute kuli isi ya Yuda. 8 Ndangulanda kahi mhegwe baluwa leka nyhiliche kwa Asafu, yalingwamila chihulo cha chiundewa leka yamhe heni mbawo kwa chiwalo cha kugongomanya fulemu za lwizi ja ngome iwele habehi na ng'handa ya Nguluwi na lukanzi lwa muji na ng'handa ya heni iwele ndochikala amo." Mndewa nakakunda kulanda kwa heni kwa vila Nguluwi nayali hamwe na heni.

9 Londiwafichile wakulu wa mkowa wa kolizinjilaga isanya mwa lwanda lwa Eyufulate, nandiwapa baluwa za mndewa. Mndewa nayali yandajize hamwe na vilongozi wa wamizi na wakwina falasi. 10 Ila Sanibalati, Mholoni na Tobiya, Mwamoni, lowahuliche kota nanduta leka kukola mijito jinojile kwa chiwalo cha wanhu wa Isilaeli, nawazudila ng'hatu.

11 Nanduta ako Yelusalemu na kikala ako kwa mazuwa kadatu, 12 hamba nambuka nechilo hamwe na wanhu wachefu. Simlonjele munhu yoneche gala gawele Nguluwi nayali yagawichile mnhumbula mwa heni kwa chiwalo cha muji wa Yelusalemu. Nakwali na igongolo limwe hela, liwele nandali ng'winile. 13 Nandawa mgati nechilo ndikolela kuli Lwizi lwa Kibindi, kulutila kuli Ideho lya Izoka na kuli Lwizi lwa Mboto, nandizikagula ng'hanzi za muji wa Yelusalemu ziwele nazali zibomoligwe na lwizi jake jiwele najali jilakazwe. 14 Hamba, nanduta mbaka kuli lwizi lwa Nzasa na kuli Izimbo lya Mndewa. Ila hakuwele na honhu ha kuhega kwa chiwalo cha igongolo lya heni kukola, 15 ahyo nanduta kuli ibindi nechilo yila kuno ndikagula lukanzi. Hamba nanyhiluka na kwinjila kahi kwa kukolela Lwizi lwa Kibindi.

16 Vilongozi hawavizelele honhu hawele nanduta ne choni chonditile kwa vila nandali siwalonjele Wayahudi ne watambika ne vilongozi ne wang'hangala ne wala wanhu wawele wokola mijito ja kuuzenga kahi wula muji. 17 Hamba nandiwalonjela, "Mwangugona magazo gotuwele nago, muji wa Yelusalemu nausigala mahame na lwizi jake najilakazwa kwa chiluli. Lelo, muye tuzenje kahi lukanzi lwa Yelusalemu, natwe hatuweza kuwa kuli soni ayi." 18 Nandiwalonjela ndaze Nguluwi vyoyawele hamwe na heni yonhanza kwa kunoga kwa heye. Nandiwalonjela kahi ulonzi uwele mndewa nayali yandonjele. Lowahuliche ago, nawalonga, "Goya, twaluche mijito ja kuzenga." Ahyo nawaluka kiwika goya kwa mijito ajo jinojile. 19 Ila Sanibalati na Tobiya na Geshemu, Mwalabu, lowahuliche mbuli ayo, nawatuseka na kutubeza wolonga, "Ndo chinhu chachi achi chomlingudita? Ndaze, mwangugana kumbelenhuka mndewa?"

20 Nandiwedichila kwa kulonga, "Nguluwi wa kilanga kotutanza kuli mijito aji, natwe tuwele ndo vitumagwa wa heye tokwaluka kuzenga. Ila hemwe mwahela honhu ne hachi ne kukumbuchila koneche kuli muji wa Yelusalemu."