1 Sanibalati na Tobiya na Geshemu, Mwalabu na wang'honyo wa hetwe wanji, lowahuliche kota natusinda kuzenga kahi lukanzi na kota haduhu honhu hasigale kuzenjigwa, hanga mbaka mhela awo natwali hatuwichile lwizi hali honhu hake, 2 Sanibalati na Geshemu nawalajiza usenga kwa heni wolonga, "Uye, tuting'hane kuli chijiji chimwenga cha kuli isi ya ibalalika lya Ono." Ila nawali wonuwila kunditila vibi. 3 Lelo, nani kahi nandiwalajiza wasenga kwa hewo, nandonga, "Mijito jondilingukola ndo mikulu lukami, ahyo siweza kuya kwa hemwe. Lekachoni ndechelele mijito leka mbuye kwa hemwe?"

4 Nawalutilila kulajiza usenga kwa heni mala zine, wogana ndute kwa hewo, ila nandiwedichila hihila. 5 Lelo, lwa kahano, Sanibalati nakamlajiza chitumagwa wa heye yangalile heni baluwa iwele haiwopigwe leka wanji waweze kusoma. 6 Baluwa ayo nayandichigwa hino, "Hana mbuli ziwele nazenela hali wanhu wa isi zinji za habehi, naye Geshemu kangutawiza mbuli azi, kota hegwe hamwe na Wayahudi wayago mwangunuwila kubelenhuka, ahyo acho ndo chiwalo cha hemwe kuzenga kahi lukanzi. Kwa kiwhana na mbuli azo, hegwe kwangunuwila kuwa mndewa wa hewo, 7 leka kutawiza majesa ga hegwe, nakiwichila waloli kuli muji wa Yelusalemu leka wawikule kota ‘Hana mndewa kuli isi ya Yuda.’ Mbuli ayi yohilikwa kwa mndewa Alitashasta. Ahyo, hegwe na heni tuting'hane na kulongasa kwa chiwalo cha mbuli ayi."

8 Nani nandimhilichila usenga awu, "Haduhu mbuli kota ayo. Mbuli azo zangulawa kumutwi kwa hegwe hela." 9 Wang'honyo wa hetwe nawali wogana kutudita tuwe na lunhwinhwi leka tulechelele mijito. Ila nandimlanda Nguluwi leka yamhe heni mong'ho.

10 Zuwa limwe londutile kaye kwa Shemaya, mwana wa Delaya, mwana wa Mehetabeli, yawele nayali yalemezwe kulawa kaye kwa heye, nakandonjela, "Tulute kiting'hana kuli ng'handa ya Nguluwi na kuhinda lwizi jake, kwa vila lehano nechilo wanhu wanguya kukukopola." 11 Ila heni nandimwidichila, "Ndaze, munhu kota heni kanguganigwa kubilima? Ama munhu kota heni kanguganigwa kwinjila kuli ng'handa ya Nguluwi leka yalohole ukomu wa heye? Hambe nyinjile kuli ng'handa ya Nguluwi." 12 Nandivizela kota nayali halajizwe na Nguluwi, ila nakapegwa sendi na Tobiya na Sanibalati leka yawikule mbuli zihile kuwala heni. 13 Nayali yapegwe sendi leka kundita ndumbe, ahyo ndite gehile, hamba waweze kuliwifya itagwa lya heni na kumbasa soni.

14 Nandimlanda Nguluwi ndilonga, "Gwa Nguluwi, ukumbuchile geng'ha gowaditile Tobiya na Sanibalati, mbaka yula mloli mdala yalinguchemigwa Noadiya na waloli wanji wawele nawali wogana kundita ndumbe."

15 Lelo, mijito ja kuzenga kahi lukanzi najisinda kuli zuwa lya makumi meli na gahano lya mwezi wa Eluli, mijito aji najikoleka kwa mhela wa mazuwa makumi gahano na meli (52). 16 Wang'honyo wa hetwe wa kuli isi za habehi, lowahuliche kota natusinda mijito, nawadumba na kona soni ng'hatu, kwa vila nawavizela kota mijito aji natusinda kwa kutanzigwa na Nguluwi wa hetwe.

17 Mhela awo weng'ha, vilongozi wa Wayahudi nawali womwandichila Tobiya baluwa nyinji, naye Tobiya nayali yolutilila kuwedichila. 18 Wanhu wenji kuli Wayahudi nawelaha kilumba na Tobiya, kwa vila Tobiya nayali mkweye Shekaniya, mwana wa Ala. Mzidi wa ago Yehohanani, mwana wa Tobiya, nayali yamhesile mhinza wa Meshulamu, mwana wa Belekiya. 19 Kahi nawasimila heni madito ganojile ga Tobiya na mbuli za heni nawali womhilichila Tobiya. Naye Tobiya nayali yonyandichila baluwa za kundumbiza.